У Гомелі настаўнік павёў школьнікаў у мясцовы «Рускі дом», каб пасумаваць з нагоды гібелі Уладлена Татарскага
3.04.2023 / 19:33
Фотасправаздачу пра жалобную акцыю з нагоды гібелі расійскага прапагандыста Уладлена Татарскага апублікавала кіраўніцтва «Рускага дома» ў Гомелі ў сябе ў сацыяльных сетках. На ёй прысутнічалі і вучні сярэдняй школы №59, якіх прывёў настаўнік «патрыятычнага» выхавання Дзмітрый Уклейка.
На Дзмітрыя Уклейку з вучнямі на гэтым мерапрыемстве звярнула ўвагу гомельскае выданне «Штодзень». Паводле яго, Уклейка — вядомы мясцовы прыхільнік Аляксандра Лукашэнкі і «рускага свету».
Дзмітрый Уклейка
«Вельмі кранальная падзея адбылася сёння ў нашым Доме дзякуючы Дзмітрыю Уклейку і яго выхаванцам з СШ №59. Перад кінасеансам хлопцы ўшанавалі памяць расійскага ваенкара Уладлена Татарскага, які трагічна загінуў ад тэракту ў пецярбургскім кафэ. Глыбокія спачуванні… Нагадаем, трагедыя адбылася ўчора ўвечары. У кавярні, дзе праходзіў творчы вечар журналіста, прагрымеў выбух, ударная хваля выбіла шкло. Папярэдне вядома пра 25 пацярпелых, з якіх 19 параненыя», — напісалі прэс-сакратары расійскай арганізацыі.
У прыёмнай школы адказалі, што нічога не ведаюць пра акцыю Уклейкі. Адзіны чалавек які валодае такой інфармацыяй — гэта намесніца дырэктара па ідэалагічнай і выхаваўчай працы Таццяна Халязнікава, аднак яна, маўляў, у школе цяпер адсутнічае.
Чытайце таксама:
Украіна разам з ФБК. У Расіі назвалі арганізатараў забойства ваенкара Татарскага
Забойства Татарскага можа быць сведчаннем унутранай барацьбы ў Расіі — ISW