Tramp raspavioŭ, jak jahonaja razmova z Pucinym nibyta adterminavała ŭvarvańnie RF va Ukrainu na niekalki hadoŭ
20.06.2023 / 14:38
Tramp paviedamiŭ, što padčas razmovy z Pucinym jon skazaŭ, što ŭvarvańnie budzie «katastrofaj» i što za heta daviadziecca «płacić u piekle».
Donald Tramp i Uładzimir Pucin na samicie G20 u Osacy (Japonija), 29 červienia 2019 hoda. Fota: Presidential Press Service/Pool Photo via AP
Były prezident ZŠA Donald Tramp raspavioŭ, što jahonaja razmova z kiraŭnikom Kramla Uładzimiram Pucinym nibyta adterminavała ŭvarvańnie Rasii va Ukrainu na niekalki hadoŭ. Pra heta jon raskazaŭ u intervju telekanału Fox News, paviedamlaje «Jeŭrapiejskaja praŭda».
Tramp raspavioŭ, što padčas razmovy z Pucinym jon skazaŭ, što ŭvarvańnie budzie «katastrofaj» i što za heta daviadziecca «płacić u piekle».
Kamientujučy svaje zajavy ab namierach zaviaršyć vajnu RF suprać Ukrainy, Tramp skazaŭ pra svaje «vielmi dobryja stasunki» z Pucinym.
«Z Pucinym u mianie vielmi dobryja stasunki. Ja maju na ŭvazie, što ja nie razmaŭlaŭ ź im doŭhi čas, ale ŭ mianie byli [ź im] vielmi blizkija stasunki», — adkazaŭ Tramp na pytańnie, jak jon źbirajecca skončyć vajnu ciaham 24 hadzin, pra što jon nieadnarazova zajaŭlaŭ.
Tramp taksama śćviardžaje, što Pucin nie pajšoŭ by na ŭvarvańnie va Ukrainu, kali b prezidentam ZŠA zastaŭsia jon.
Na pytańnie, ci ličyć jon Ukrainu samastojnaj dziaržavaj, Tramp adkazaŭ, što tak, ale dadaŭ, što raniej «heta była adna kraina z Rasijaj» i «Pucinu heta padabałasia».