Аргенціна прапанавала Брытаніі вярнуць Фалкленды
4.01.2024 / 7:54
Вайна за Фалкленды ў 1982 годзе прывяла да сакрушальнай паразы Аргенціны, што мела вялікія наступствы.
На фота аргенцінскі крэйсер «Генерал Бельграна» тоне ў паўднёвай частцы Атлантычнага акіяна, 1 мая 1982 года, пасля таго, як быў тарпедаваны Каралеўскім ваенна-марскім флотам Вялікабрытаніі. Фота: AP Photo, File
Буэнас-Айрэс прапанаваў Лондану вярнуцца да пытання Фалклендскіх выспаў, падкрэсліўшы, што лічыць іх акупаванымі. Прэзідэнт Мілей дапускаў паўтарэнне схемы з перадачай Ганконга, але Брытанія адмаўляецца, піша РБК.
Аргенціна гатовая аднавіць перамовы з Вялікабрытаніяй, каб знайсці мірнае рашэнне спрэчкі вакол Фалклендскіх выспаў як мага хутчэй, паведаміў аргенцінскі МЗС.
Ведамства падкрэсліла, што лічыць выспы незаконна акупаванымі Вялікабрытаніяй з 1833 года, і нагадала, што ўсе аргенцінскія ўрады працягвалі настойваць на сваім суверэнітэце над гэтай тэрыторыяй. Пазіцыю Буэнас-Айрэса падтрымлівалі спецкамітэт Генасамблеі ААН, Арганізацыя амерыканскіх дзяржаў (ААД) і іншыя ўплывовыя бакі.
«Канстытуцыя вызначае, што аднаўленне нашага суверэнітэту над названымі тэрыторыямі ў адпаведнасці з міжнародным правам і з павагай да ладу жыцця іх жыхароў уяўляе сабой пастаянную і неад'емную мэту аргенцінскага народа», — адзначылі ў аргенцінскім МЗС.
Новы аргенцінскі прэзідэнт Хаўер Мілей, які заняў гэтую пасаду ў сярэдзіне снежня мінулага года, падчас выбарчай кампаніі не раз закранаў пытанне Фалклендскіх выспаў. Ён падкрэсліваў бясспрэчнасць суверэнітэту краіны над імі і неабходнасць вывучыць варыянты іх вяртання, пры тым, што «варыянт вайны не з'яўляецца рашэннем».
«У нас была вайна, якую мы прайгралі, і цяпер мы павінны прыкласці ўсе намаганні, каб вярнуць выспы праз дыпламатычныя каналы», — тлумачыў Мілей.
У інтэрв'ю La Nacion ён прапанаваў план вяртання Фалклендаў па аналогіі з перадачай Ганконга, які быў вернуты Вялікабрытаніяй Кітаю ў 1997 годзе.
Улады Вялікабрытаніі адхілілі прапановы Мілея. У канцылярыі брытанскага прэм'ера нагадалі, што пытанне прыналежнасці выспаў «некаторы час таму было канчаткова вырашана», а Лондан працягне «актыўна абараняць права жыхароў Фалклендскіх выспаў на самавызначэнне».
***
Фалклендскія выспы знаходзяцца ў паўднёва-заходняй частцы Атлантычнага акіяна. Яны знаходзяцца прыблізна за 12 тыс.км ад Вялікабрытаніі і 500 км ад мацерыковай часткі Аргенціны. У красавіку 1982 года на Фалклендскіх выспах высадзіліся аргенцінскія войскі з мэтай вярнуць іх, вайна доўжылася амаль тры месяцы, перамогу атрымала Вялікабрытанія, а параза ў вайне прывяла да паразы дыктатуры ў Аргенціне.
У 2013 годзе на гэтай тэрыторыі прайшоў рэферэндум, 99,8% выказаліся за тое, каб застацца часткай Злучанага Каралеўства. Буэнас-Айрэс адмаўляецца прызнаць вынікі галасавання.
Чытайце таксама:
Прэзідэнт Аргенціны паляцеў звычайным самалётам. І гэта самалёт «Белавія»
Хаўер Мілей афіцыйна напісаў Пуціну і Сі, што Аргенціны не будзе ў БРІКС
У Аргенціне выпусцілі купюры, якія ў 25 разоў перавышаюць намінал ранейшай самай вялікай