Kultura

Niaklajeŭ adznačaje narodziny vychadam novaj knihi

Uładzimir Niaklajeŭ, jakomu 9 lipienia spoŭniłasia 78 hadoŭ, vypuściŭ novy zbornik paezii «Biez Ajčyny. Kniha turmy i zamiežža», piša bellit.info.

Kniha vyjšła ŭ polskim vydaviectvie Kollegium Europy Wschodniej (KEW). Navinoj Uładzimir Niaklajeŭ padzialiŭsia ŭ svaim fejsbuku i apublikavaŭ niekalki vieršaŭ z novaj knihi.

JERUSALIM

1

Jak zbroju, Słova ŭziaŭ — i kinuŭ vyklik Bohu.
«Nie Ty mnie — vuście. I nie Ty — vytok».
Piaskom na škle namalavaŭ darohu.
Svoj los na joj. A viecier źnios piasok.

Naŭprost za vietram rušyŭ. Biez darohi.
Pa tym piasku, jaki pad nohi loh.
Nie stałasia nad Boham pieramohi.
I navat los svoj jon nie pieramoh.

Za krokam krok dakročyŭ da pustečy,
Da prorvy ŭ joj, kuda ściakaŭ piasok…

Sił nie znachodziŭ na apošni krok.
Ciamnieła biezdań. Jon stupić nie moh.
I niechta zzadu padšturchnuŭ u plečy.
Jon azirnuŭsia. Heta byŭ nie Boh.

2

Jana adna była na miescy tym,
Dzie być chacieła ź im. Jerusalim
Stajaŭ prad joj. Jana prad im stajała.
«Kachała ty?» — spytaŭ. Jana skazała:
«Kachała ja». — «Čamu ž tady niama
Kachanaha z taboju?» — «Bo turma
Jaho zabrała i nie addała».

I ŭpała ź nieba Viečnaja Imhła
Na Viečny horad. I za toj Imhłoju
Byŭ Hołas: «Azirnisia. Jon z taboju.
Z taboj Imhła. Ty ŭ śmierci nie adna».

Ale nie azirnułasia jana.

Kamientary da artykuła