Śviet

Vienhryja i Słavakija admaŭlajucca padpisvać supolnuju zajavu Jeŭrasajuza adnosna vybaraŭ u Biełarusi

Pradstaŭniki Vienhryi i Słavakii nie śpiašajucca padpisvać supolny zvarot krain-členaŭ Jeŭrapiejskaha sajuza adnosna niepryznańnia prezidenckich vybaraŭ, jakija majuć prajści ŭ Biełarusi 26 studzienia. Heta vynikaje ź infarmacyi, jakuju jeŭrapiejski redaktar «Radyjo Svaboda/ Radyjo Svabodnaja Jeŭropa» Rykard Juźviak atrymaŭ ad vartych davieru krynic u Bruseli, piša «Radyjo Svaboda».

Źleva naprava — premjer-ministry Vienhryi i Słavakii Viktar Orban i Robiert Fica. Fota: AP Photo/Omar Havana

U rańniaj viersii prajektu zajavy, jaki «Radyjo Svaboda» maje ŭ rasparadžeńni, išła havorka pra «niedemakratyčnyja prezidenckija vybary» ŭ Biełarusi.

«Niaŭmolny i biesprecedentny ŭzrovień represij, parušeńni pravoŭ čałavieka, abmiežavańnie palityčnaha ŭdziełu i dostupu da niezaležnych ŚMI ŭ Biełarusi pazbavili vybarčy praces luboj lehitymnaści», — havaryłasia ŭ prajekcie zajavy, jakuju rychtuje Jeŭrapiejskaja słužba źniešnich spraŭ.

Taksama ŭ dakumiencie akcentavałasia ŭvaha na dalejšaj padtrymcy biełaruskaha naroda, demakratyčnych sił i hramadzianskaj supolnaści, hučaŭ zaklik da praviadzieńnia svabodnych vybaraŭ i vyzvaleńnia ŭsich palitźniavolenych.

Pavodle infarmacyi «Radyjo Svaboda», Vienhryja i Słavakija admovilisia padpisvać pieršuju viersiju prajektu zajavy ad imia 27 krain — siabraŭ Jeŭrasajuza. Nie vyklučana, što jany admoviacca ad podpisu i pad finalnaj viersijaj.

Hetyja dźvie krainy nieadnojčy vystupali supolna suprać pašyreńnia sankcyj suprać Rasii, pavieličeńnia jeŭrapiejskaj dapamohi Ukrainie i inš.

22 studzienia pradstaŭnik Ministerstva zamiežnych spraŭ Biełarusi Anatol Hłaz vystupiŭ z zajavaj, u jakoj nazvaŭ «najhrubiejšym umiašańniem u elektaralnyja pracesy suvierennaj dziaržavy» prajekt zajavy Jeŭrapiejskaj słužby źniešnich spraŭ, jakuju jana płanuje zrabić pa vynikach vybaraŭ 26 studzienia i jakaja nibyta «trapiła ŭ rasparadžeńnie MZS».

Kamientary da artykuła