Za minuły hod Litvu pakinuli bolš za 400 biełaruskich ajcišnikaŭ
28.01.2025 / 19:34
Pra toje, što IT-siektar Litvy za 2024 hod straciŭ bolš za 400 biełaruskich śpiecyjalistaŭ, paviedamlaje litoŭski telekanał TV3 sa spasyłkaj na źviestki mihracyjnych słužbaŭ, zaŭvažyŭ Devby.io.
Pavodle infarmacyi telekanała, na siońnia ŭ Litvie pracujuć 3605 biełaruskich ajcišnikaŭ. Na pačatku minułaha hoda takich śpiecyjalistaŭ było bolš za 4 tysiačy. Takim čynam, za 2024 hod IT-siektar straciŭ bolš za 10% biełaruskich ajcišnikaŭ.
Infarmacyja TV-3 pa adtoku biełaruskich ajcišnikaŭ ź Litvy prykładna supadaje ź infarmacyjaj dev.by pra skaračeńnie za minuły hod štatu bolš čym 20 litoŭskich IT-kampanij ź biełaruskimi karaniami.
Jašče na pačatku 2024 hoda ŭ bolš čym 20 viadomych IT-kampanijach ź biełaruskimi karaniami ŭ Litvie pracavała amal 3,9 tysiačy supracoŭnikaŭ. Na hety momant u ofisach zarehistravana tolki 3,4 tysiačy śpiecyjalistaŭ — na 10 ź liškam pracentaŭ mienš.
Adna z mahčymych pryčyn — aptymizacyja IT-kampanijami vydatkaŭ na piersanał va ŭmovach niestabilnaha popytu na rynku pasłuh, deficytu prajektaŭ i rostu vydatkaŭ. Adnych supracoŭnikaŭ kampanii zvalniajuć, druhich pieravodziać u inšyja łakacyi. Akramia taho, ajcišniki mohuć vyjazdžać ź Litvy ŭ pošukach novaj pracy.
Taksama adtok ajcišnikaŭ źviazany ź niepaśladoŭnaj mihracyjnaj palitykaj Litvy. Anulavańni DNŽ biełarusam (u tym liku ajcišnikam) ciapier užo nie redkaść.
Pavodle źviestak Departamienta mihracyi Litvy, na pačatku 2025 hoda ŭ krainie žyli 57 511 hramadzian Biełarusi, jakija majuć dazvoł na žycharstva. Za minuły hod kolkaść biełarusaŭ z DNŽ skaraciłasia na 7,5%, abo bolš čym na 4,6 tysiačy čałaviek.