Вайна

Расійскае камандаванне накіроўвае на фронт аслоў, бо тэхнікі не хапае. Гэта не жарт

«Проста прымі гэта як данасць. Не пытайся. Факт у тым, што нам выдалі осліка».

Вослік, якога накіравалі на фронт для перавозкі боепрыпасаў. Фота: dva_mjors_kOrtiZoL / Telegram

Шэраг расійскіх тэлеграм-каналаў паведамілі аб тым, што расійская армія ў якасці новага транспарту для перавозкі боекамплектаў на перадавую вырашыла выкарыстоўваць аслоў. Як пішуць самі ваенныя, гэтых жывёл ім выдалі замест аўтатранспарту, якога не хапае.

«Я проста пачуў. Потым сам убачыў, ах**ў. Проста прымі гэта як данасць. Не пытайся, адкуль, чаму, хто, навошта, як. Я не я*у. Але факт у тым, што нам выдалі восліка. Ён ва ўзводзе забеспячэння прыпаркаваны. Гавораць: «Вось вослік. У нас жа х***а з транспартам? Х***а. «Уралы» гараць? Гараць. Вось вослік. Вазіце на ім боекамплект на перадавую». Вослік. Сапраўдны жывы вослік. Гэта не гумка (гуманітарная дапамога — НН) прывезла. Гэта абозная машына «Урал» паехала на атрыманне маёмасці, і яму выдалі там асла», — кажа аўтар відэа.

Іншы ваеннаслужачы паведамляе, што яны атрымалі адразу чатыры жывёлы.

Агульнавядома, што аслы ў якасці гужавога транспарту актыўна выкарыстоўваліся на войнах мінулага. У каментарыях нехта згадаў: «У Чачні ў нас два ішакі былі. Лёгка па 120 кілаграмаў насілі. Былі яны паважанымі і незаменнымі».

У 2004 годзе паведамлялася аб планах паставіць на ўзбраенне часцей расійскай арміі, размешчаных на Паўночным Каўказе, 150 аслоў і мулаў. Іх павінны былі выкарыстаць пры правядзенні пошукавых аперацый ва ўмовах высакагор'я.

Невядома, наколькі гужавы транспарт пашыраны ва ўкраінскай арміі, але некалькі тыдняў назад паведамлялася аб эвакуацыі з зоны баявых дзеянняў баявога асла па мянушцы Хаймарс. Украінскія СМІ пісалі, што ён знаходзіўся ў Данецкай вобласці і вазіў снарады на перадавой. Але з цягам часу ў ваенных з'явіўся аўтамабіль, і жывёліна стала непатрэбнай.

У расійскім войску сітуацыя адваротная — раней былі машыны, а цяпер замест іх жывёлы. У адным з каналаў з паведамленнем аб накіраванні аслоў на фронт заўважаецца, што згодна з загадам Мінабароны аб пераліку тэхнікі, гужавога і ўючнага транспарту, у якасці сродку цягі могуць выкарыстоўвацца жывёлы, у тым ліку аслы. Гэты пералік, зацверджаны ў 1999 годзе, уключае таксама коней, вярблюдаў і ездавых аленяў.

Тэлеграм-канал «Два маёры» жартуе, што расійскае войска «непераможнае з-за сваёй кемлівасці, умення дзейнічаць нечакана не толькі для саперніка, але і для сябе самога».

Праўда, у асла з'явіліся і прыхільнікі. Адзін з Z-блогераў напісаў, што яго падраздзяленне таксама задумвалася аб набыцці асла, таму што гэта жывёла бясшумна перамяшчаецца.

Іншыя пішуць, што смешнага ў выкарыстанні аслоў нічога няма. «Засталося яшчэ кавалерыю адрадзіць, пакуль вораг масава наладжвае вытворчасць беспілотнікаў».

Каментары да артыкула