«Biełaruski siłavik» iznoŭ zbrachaŭ. Hetym razam — na miljony
5.02.2025 / 22:54
Prapahandysty śćviardžajuć, što USAID płaciła miljony suśvietnym zorkam za naviedvańnie Ukrainy. Što ž, pravieryli hetuju infarmacyju.
Skryn paviedamleńnia ŭ adnym z pablikaŭ u telehramie
Niama ni dnia, kab łukašenkaŭskija kanały nie publikavali hrubych fejkaŭ. Hetym razam jany rašyli vykarystać chvalu ŭvahi da dziejnaści Ahienctva ZŠA pa mižnarodnym raźvićci (USAID).
«USAID płaciła halivudskim zorkam vialikija hanarary za toje, kab tyja pryjazdžali va Ukrainu. Pa publikavanych danych, jany atrymali: van Dam — $1 500 000, Ben Styler — $ 4 000 000, Šon Pen — $5 000 000, Arłanda Blum — $8 000 000, Andžalina Džali — $20 000 000», — paviedamleńni prykładna takoha źmiestu stali raspaŭsiudžvacca 5 lutaha pa roznych pablikach u internecie. Ich raspaŭsiudziŭ telehram-kanał «Biełaruski siłavik».
Admietna, što na anhlijskaj movie padobnaja infarmacyja apublikavanaja tolki na sajcie news-pravda.com, jaki resurs Media Bias/Fact Check aceńvaje jak vydańnie ź nizkim uzroŭniem faktyčnaj dakładnaści. Hety sajt krytykujecca za niedastatkovuju pravierku krynic, raspaŭsiudžvańnie dziaržaŭnaj prapahandy i teoryj zmovy, a taksama publikacyju niesapraŭdnych navin.
Aŭtary tekstu spasyłajucca na infarmacyju «zamiežnych ŚMI», a kankretna viadomy amierykanski partał navin E!News, jaki publikuje roznyja cikavostki pra znakamitaściaŭ. Prapahandysty pastaralisia — u sacyjalnych sietkach raspaŭsiudzilisia zdymki zorak z paznačeńniem pamieru hanararu i łahatypam partała.
Ale kožny, chto naviedaje E!News, moža ŭpeŭnicca, što nijakaj infarmacyi pra hanarary za pajezdki va Ukrainu halivudskich zorak tam niama, jak niama jaje i ŭ inšych surjoznych anhłamoŭnych internet-vydańniach.
Nahadajem, što van Dam, Ben Styler, Šon Pen i Andžalina Džali naviedali Ukrainu ŭ 2022 hodzie. Pryčym Šon Pen byŭ tam trojčy i navat atrymaŭ ad Uładzimira Zialenskaha orden za zasłuhi III stupieni. Arłanda Blum ździejśniŭ svoj vizit u 2023 hodzie jak pasoł dobraj voli JUNISEF. Ben Styler — jak pasoł dobraj voli AAN.
Ale śpis zorak, jakija naviedali Ukrainu padčas vajny, našmat bolšy. Čamu prapahandysty spynilisia tolki na piaci, nieviadoma.