Na pracesie pa karniku Sierafinoviču prakuror pałovu dnia začytvaŭ proźviščy zabitych
6.02.2025 / 15:13
Dziaržaŭnamu abvinavaŭcu pa kryminalnaj spravie suprać karnika Siamiona Sierafinoviča spatrebiłasia niekalki hadzin, kab pieraličyć usie proźviščy jaŭrejaŭ, źniščanych u Mirskim hieta, — piša «Sputnik».
Symon Sierafinovič. Fota: Stefan Rousseau — PA Images/PA Images via Getty Images
6 lutaha Viarchoŭny sud pačaŭ razhlad kryminalnaj spravy Sierafinoviča, jaki paśmiarotna abvinavačvajecca ŭ hienacydzie biełaruskaha naroda.
Jak vynikaje z abvinavačańnia, jakoje siońnia ŭ sudzie začytvaje prakuror, u pieryjad akupacyi nacysckimi vojskami Sierafinovič uznačaliŭ padraździaleńnie Mirskaj rajonnaj dapamožnaj palicyi. Pa jaho zahadzie ŭ Mirskim hieta było źniščana bolš za 3700 jaŭrejaŭ, u tym liku dziaciej i starych.
Prakuror padčas abviaščeńnia abvinavačańnia pieraličyŭ usie ŭstanoŭlenyja proźviščy źniščanych u Mirskim hieta, jon pačaŭ začytvać śpis u pačatku pasiadžeńnia i zaviaršyŭ tolki paśla pierapynku ŭ sudovym pasiedžańni.
Akramia źniščeńnia Mirskaha hieta, Sierafinovič abvinavačvajecca ŭ asabistym udziele ŭ rasstrełach mirnych žycharoŭ, praviadzieńni akcyj zapałochvańnia.
Jak vynikaje z materyjałaŭ spravy, jakuju rasśledavała Hienieralnaja prakuratura Biełarusi, Sierafinovič vinavaty ŭ śmierci bolš jak čatyroch tysiač mirnych hramadzian.
Spravu składajuć 30 tamoŭ, pa joj prachodziać bolš za 50 śviedak.