У Брэсце таксі збіла мужчыну на электрасамакаце
7.02.2025 / 0:12
Інцыдэнт адбыўся раніцай 5 лютага на вуліцы Гарадской у Брэсце. Мужчына на электрасамакаце трапіў пад колы таксі і атрымаў цяжкія траўмы, паведамляе прэс-служба Следчага камітэта.
Фота: Следчы камітэт
23-гадовы кіроўца таксі пры абгоне грузавіка выехаў на сустрэчную паласу і збіў электрасамакат, якім ехаў 45-гадовы жыхар Брэсцкага раёна.
У выніку ДТЗ самакатчык атрымаў цяжкія траўмы, яму аказваецца медыцынская дапамога.
Папярэдне ўстаноўлена, што пацярпелы кіраваў электрасамакатам на праезнай частцы.
У дачыненні да кіроўцы таксі завялі крымінальную справу па ч. 2 арт. 317 (парушэнне правілаў дарожнага руху асобай, якая кіруе транспартным сродкам, што пацягнула па неасцярожнасці прычыненне цяжкага цялеснага пашкоджання) Крымінальнага кодэкса.