Žychary Valensii paśla pavodki vyjšli na pratest z patrabavańniem adstaŭki kiraŭnictva rehijona
10.11.2024 / 9:53
U ispanskaj Valensii bolš za 100 tysiač čałaviek vyjšli na akcyi pratestu z patrabavańniem adstaŭki kiraŭnika rehijona Karłasa Mazona. Padčas pavodki ŭ kastryčniku ŭ pravincyi zahinuli bolš za 200 čałaviek. Pratestoŭcy abvinavačvajuć ułady ŭ zapoźnienym infarmavańni ab stychijnym biedstvie.
Pratesty supravadžalisia sutyčkami z palicyjaj. Mer horada Maryja Chase Katalja apublikavała fota raźbitych voknaŭ i ahniu, jaki razvodzili pratestoŭcy, dadaŭšy, što «vandalizm heta nie rašeńnie», piša VVS.
Na minułym tydni raźjušanyja pratestoŭcy zakidali brudam karala i karalevu Ispanii, kali tyja naviedvali adzin z najbolš paciarpiełych ad stychii haradoŭ. Z takim ža staŭleńniem natoŭpu sutyknuŭsia i premjer-ministr Piedra Sančez, jakoha paśla hetaha terminova evakuiravali.
Karłas Mazon, jaki ŭznačalvaje administracyju pravincyi, z kansiervatyŭnaj «Narodnaj partyi» nastojvaje na tym, što dziejničaŭ adekvatna. Jon śćviardžaje, što ŭłady pravincyi nie atrymali adpaviednych papiaredžańniaŭ ad urada krainy, a taki maštab biedstva niemahčyma było pradbačyć.
U Ispanii za dziejańni pry stychijnych biedstvach adkazvajuć ułady rehijonaŭ, ale jany mohuć zapytvać dapamohu ŭ Madryda. Ispanskaje mietearałahičnaje ahienctva vypuściła papiaredžańnie ab urahanie 25 kastryčnika, ale ŭłady Valensii razasłali tryvožnyja paviedamleńni na mabilnyja telefony žycharoŭ tolki za ličanyja hadziny da pavodki 29 kastryčnika.