Грамадства

«Сустрэліся і гаварылі пару гадзін». Канапацкая расказала, як Румас клікаў яе ва ўрад

У кастрычніку 2019 года тагачасны прэм'ер-міністр Сяргей Румас публічна ці то жартам, ці сур'ёзна запрасіў Ганну Канапацкую ва ўрад. Яна расказала, што было далей.

Сяргей Румас. Архіўнае фота 2018 года. Maxim Guchek / BelTA Pool Photo via AP

Канапацкая тады была дэпутаткай Палаты прадстаўнікоў. Падчас папярэдняга чытання па праекце бюджэту Беларусі на 2020 год яна спытала ў Румаса, як урад збіраецца выконваць прагнозны паказчык на пяць гадоў.

У адказ прэм'ер раскрытыкаваў свой урад за слабую працу, адзначыў, што эканоміцы патрабуюцца структурныя рэформы і прапанаваў Канапацкай месца ў Саўміне.

«Я афіцыйна вас запрашаю на працу ва ўрад, каб вы дапамаглі нам вырашыць гэтую задачу», — сказаў тады Румас Канапацкай, якая пакідала парламент.

Ганна падзякавала прэм'еру за прапанову, і яны дамовіліся абмеркаваць гэтае пытанне пазней.

Ганна Канапацкая. Фота з яе сацсетак

Цяпер Канапацкая ў інтэрв'ю «Точцы» распавяла, што было далей. Паводле яе слоў, яна сапраўды сустрэлася з прэм'ерам, і яны прагаварылі пару гадзін сам-насам.

«Думаю, што гэта была спроба наладзіць дыялог з той часткай грамадства, якая прытрымліваецца іншых поглядаў на эканамічную мадэль… Я ў прынцыпе засталася ў добрых адносінах з Сяргеем Мікалаевічам», — адзначыла Канапацкая.

Канкрэтную пасаду ва ўрадзе яны, паводле слоў Ганны, не абмяркоўвалі, паколькі прызначэнне міністраў — гэта прэрагатыва Лукашэнкі. Але, як адзначыла Канапацкая, тая размова матывавала яе ісці на выбары 2020 года.

Каментары да артыкула