Vajna

Treci bujny rasijski NPZ spyniŭsia z-za ŭdaru ŭkrainskaha drona

Šerah napadaŭ ukrainskich bieśpiłotnikaŭ na rasijskija rehijony ŭ pačatku 2025 hoda paralizavaŭ pracu jašče adnaho bujnoha naftapierapracoŭčaha zavoda. Vałhahradski NPZ «Łukojła», jaki ŭvachodzić u top-10 najbujniejšych u Rasii i źjaŭlajecca hałoŭnym pastaŭščykom paliva dla Paŭdniovaj fiederalnaj akruhi, spyniŭ pracu praz udar drona 3 lutaha, paviedamlaje Reuters sa spasyłkaj na try krynicy ŭ halinie.

Vałhahradski NPZ. Fota: petrodigest.ru

Pa słovach surazmoŭcaŭ ahienctva, u vyniku pažaru na zavodzie mahli atrymać paškodžańni adna z ustanovak pieršasnaj pierapracoŭki nafty, a taksama čyhunačnaja estakada nalivu naftapraduktaŭ.

Ramontnyja raboty na paškodžanych učastkach mohuć zaniać adzin-paŭtara miesiaca, choć častkovaje adnaŭleńnie pierapracoŭki mahčymaje ŭ bližejšy čas, udakładniła adna z krynic.

Vałhahradski NPZ, jaki vypuskaje 4% usiaho bienzinu ŭ Rasii i 7% — dyzpaliva, staŭ trecim zavodam za apošnija tydni, jakija spynili vypusk paliva z-za udaraŭ USU. 24 studzienia adhruzki spyniŭ razanski NPZ «Rasnafty», a 4 lutaha vytvorčaść paliva spyniŭ Astrachanski HPZ «Hazprama».

U minułym hodzie pad naloty BPŁA patrapili nie mienš za 15 bujnych NPZ. U vyniku abjomy pierapracoŭki nafty ŭ krainie ŭpali da 12-hadovaha minimumu — 267 młn ton, a ekspart naftapraduktaŭ prasieŭ na 9%, da 62 młn ton.

Pavodle źviestak rasijskaha Minenierha, vypusk bienzinu ŭ Rasii za hod asieŭ na 6,4%, a dyzpaliva — na 7,4%.

Kamientary da artykuła