«Kroŭ vajny». Čym važnyja ataki Ukrainy na rasijskija NPZ i ci jość ad hetaha efiekt

Jak časta Ukraina bje pa rasijskich NPZ

Pavodle padlikaŭ Bi-bi-si, za minuły 2024 hod ukrainskija vojski prynamsi 81 raz atakavali rasijskija NPZ i paliŭnyja bazy.

Pryčym źmianiłasia stratehija takich udaraŭ. Kali ŭ pačatku hoda pad udarami byli zavody, jakija pracujuć na ŭnutrany rynak, to ź viasny ataki pravodzili na pradpryjemstvy, jakija niepasredna pastaŭlajuć paliva ŭ vojski.

Adnak z vosieni kolkaść udaraŭ źniziłasia. Mahčyma, heta mahło być źviazana z prośbaj ZŠA ŭstrymacca ad napadaŭ, kab strymać rost suśvietnych cenaŭ na naftu. Paviedamlałasia i pra nibyta płany Rasii i Ukrainy adnosna ŭzajemnaha spynieńnia ŭdaraŭ pa enierhietyčnych abjektach, ale infarmacyja zachodnich miedyja nie paćvierdziłasia.

Pad kaniec 2024-ha ŭkrainskija ataki adnavilisia. 19 śniežnia byŭ atakavany Navašachcinski zavod naftapraduktaŭ u Rastoŭskaj vobłaści. Hety abjekt — adziny ŭ rehijonie, jaki zabiaśpiečvaje rasijskija vojski palivam, a niezadoŭha da ŭdaru na im tolki zaviaršyŭsia ramont paśla letniaj ataki.

Pierad samym Novym hodam USU ŭdaryli pa naftabazie ŭ Jarcavie Smalenskaj vobłaści. Jana taksama vykarystoŭvałasia dla patreb rasijskaj armii, a paśla ataki byli zafiksavanyja mahutnyja vybuchi i pažary na paliŭnych reziervuarach.

4 studzienia 2025 hoda byŭ atakavany port Uść-Łuha ŭ Leninhradskaj vobłaści — adzin z asnoŭnych punktaŭ ekspartu rasijskaj nafty. 8 studzienia — naftaschoviščy na avijabazie «Enhiels» pad Saratavam. Hetaja ataka vyklikała mocny pažar, jaki nie mahli patušyć ciaham piaci dzion. Cellu stała naftabaza «Kambinat Kryštal», dzie zachoŭvajecca paliva dla rasijskaj stratehičnaj avijacyi. Praź dzień paśla taho, jak pažar patušyli, tam znoŭ fiksavali pryloty.

11 studzienia byŭ atakavany adzin z najbujniejšych u Rasii naftapierapracoŭčych zavodaŭ «Tanieka» ŭ Nižniakamsku (Tatarstan). 16 studzienia — naftabaza ŭ horadzie Liski (Varoniežskaja vobłaść) za 120 km ad miažy z Ukrainaj.

18 studzienia jak minimum dziesiać prylotaŭ prypali na naftabazu kala horada Vuzłavaja (Tulskaja vobłaść), taksama paviedamlałasia pra paražeńnie schoviščaŭ u Kałužskaj vobłaści. A paśla masiravanaha nalotu ŭ noč na 24 studzienia tolki ŭ Razanskaj vobłaści hareli try reziervuary na miascovym naftapierapracoŭčym zavodzie. Praź niekalki dzion pa Razanskim NPZ udaryli paŭtorna.

U noč na 29 studzienia było pa mienšaj miery čatyry pryloty pa bujnoj naftabazie «Łukojł» u Kstovie (Nižaharodskaja vobłaść). Taksama na hetym tydni pad udary trapiła raźmierkavalnaja stancyja naftapravoda «Družba» ŭ Branskaj vobłaści, a hetaj nočču — šosty pa vieličyni rasijski NPZ u Vałhahradskaj vobłaści. Tam fiksavali ŭspyški i vybuchi, ciapier vyniki ahniavoha paražeńnia ŭdakładniajucca.

Čym Ukraina bje pa NPZ i jakija vyniki

Ataki źjaŭlajucca vynikam sumiesnych apieracyj Słužby biaśpieki Ukrainy, Hałoŭnaha ŭpraŭleńnia raźviedki Minabarony i inšych składnikaŭ Sił abarony Ukrainy, takich jak Siły śpiecyjalnych apieracyj i Siły bieśpiłotnych sistem.

Jak praviła, pa naftavych abjektach bjuć dalnabojnyja drony, ale nie tolki. Pavodle zvodki Hienštaba, da apieracyi pa paražeńni Navašachcinskaha NPZ u śniežni pryciahvali padraździaleńni VMS. Jak piša ŭkrainskaje profilnaje vydańnie Defense Express, heta namiok na prymianieńnie rakiet «Niaptun», jakimi daŭno moža nanosić udary pa naziemnych celach.

Kambinavanyja ataki dazvalajuć realizavać niekalki scenaryjaŭ. Naprykład, spačatku pierahruzić dronami varožuju SPA, kab prarvalisia rakiety. Abo praredzić supraćpavietranuju abaronu rakietami, kab svabodnym kalidoram dalacieli drony.

U kožnym razie na Navašachcinskim NPZ vynik byŭ dasiahnuty. Na im spynili pracu abiedźvie ŭstanoŭki pieršasnaj pierapracoŭki nafty, a spadarožnikavyja zdymki zafiksavali pa mienšaj miery adzin zhareły reziervuar z palivam.

Adnak ilvinaja dola atak usio ž prypadaje na ŭdary dalnabojnymi bieśpiłotnikami. Naprykład, padčas masiravanaha nalotu na Sarataŭski NPZ drony pacelili prynamsi ŭ dva reziervuary, jakija vyhareli całkam.

Pavialičyć

Vielmi vynikovy ŭdar byŭ naniesieny pa Razanskim NPZ, asabliva z ulikam kolkaści zadziejničanych dronaŭ. Viadoma, sapraŭdnaja kolkaść nieviadomaja, ale, pavodle źviestak miascovych ŚMI, abjekt atakavali 12 BPŁA. Pra efiektyŭnaść havoryć i adlehłaść — kala 470 km ad linii frontu, i pieraadoleńnie srodkaŭ abarony, pakolki, akramia SPA, zavod sprabavali vyratavać śpiecyjalnaj abaronaj ad dronaŭ u vyhladzie naciahnutych mietaličnych trosaŭ.

Jak piša Reuters, tam pałała schovišča, paškodžanyja pahruzačnaje abstalavańnie i ŭstanoŭka hidraačystki. Ź minułaj piatnicy na Razanskim NPZ spynienaja zahruzka naftapraduktaŭ, što pryviało da jaho poŭnaha prypynieńnia.

Reuters taksama apublikavaŭ materyjał pra dalnabojnyja drony, u jakim pahutaryŭ z pradstaŭnikami 14-ha asobnaha pałka bieśpiłotnych avijacyjnych kompleksaŭ (14-y AP BpAK) Sił bieśpiłotnych sistem USU.

Pa słovach kamandzira 1-ha bataljona z pazyŭnym «Kaśpier», jahonaje padraździaleńnie naličvaje niekalki sotniaŭ čałaviek, a hałoŭnaja meta — nanosić udary pa abjektach u rasiejskim tyle. Były kamandzir pałka z pazyŭnym «Fidel» adznačyŭ, što na ŭzbrajeńni ŭ ich jość drony, zdolnyja pieraadolvać 2000 km. A dla ŭdaraŭ jany ŭ pryvatnaści vykarystoŭvajuć drony An-126 «Luty».

«Efiektyŭnaść našaj zbroi składaje 40-50%», — dadaŭ «Fidel», nie ŭdakładniŭšy, idzie havorka mienavita pra pracu «Lutaha» ci pra apieracyi ŭ cełym. 

Pavodle adkrytych danych, dron «Luty « zdolny danieści bajavuju častku masaj u 75 kh na adlehłaść da 1000 km. Adnak jość padstavy mierkavać, što Ukraina asvoiła prymianieńnie bieśpiłotnikaŭ z bolš mahutnaj bajavoj častkaj, chaj i na škodu dalokaści.

Pavialičyć

Vajskovy ahladalnik Forbes Devid Eks źviarnuŭ uvahu na fota va ŭkrainskim pabliku z fuhasnaj avijabombaj FAB-250 i 120-mm minaj, zamacavanymi na BPŁA. I vykazaŭ zdahadku, što niadaŭni ŭdar pa nasosnaj stancyi naftapravoda «Družba» ŭzdoŭž rasijska-biełaruskaj miažy ŭ Branskaj vobłaści nanios pa sutnaści samalot, zdolny skidać takija bomby.

Pavodle jaho, Ukraina daŭno vykarystoŭvaje byłyja cyvilnyja spartyŭnyja samaloty, madyfikavanyja dla dystancyjnaha kiravańnia. Ale raniej jany nie skidali bomby, a paražali celi pa pryncypie drona-kamikadze.

Eks taksama miarkuje, što z ulikam taho, što nahružany vybuchoŭkaj samalot Aeroprakt A-22 zdolny pieraadolvać 1300 km u adzin bok, to ŭ vypadku z udaram pa «Družbie» (usiaho za 40 km ad miažy) jość vierahodnaść, što jon moh viarnucca na bazu. Takim čynam, takija drony mohuć być šmatrazovymi.

Čamu važna atakavać NPZ i naftabazy na terytoryi Rasii

Važnaść paražeńnia rasiejskich naftavych abjektaŭ u asnoŭnym tłumačycca z vajskovaha punktu hledžańnia. Naprykład, stratehičny NPZ «Tanieka» ŭ Tatarstanie źjaŭlajecca adnym z najbujniejšych i samych sučasnych zavodaŭ, jaki adyhryvaje klučavuju rolu ŭ zabieśpiačeńni rasijskaj armii palivam.

«Vybivańnie NPZ i naftabaz niepasredna ŭpłyvaje na zdolnaść RF vieści intensiŭnuju vajnu», — adznačaŭ kiraŭnik Centra supraćdziejańnia dezynfarmacyi pry Radzie nacyjanalnaj biaśpieki i abarony Ukrainy Andrej Kavalenka.

Razanski NPZ uvachodzić u top-4 zavodaŭ z mahutnaściu pierapracoŭki amal 19 młn ton nafty ŭ hod. Jon taksama vypuskaje šyroki śpiektr pradukcyi: ad bienzinu i dyziela da mazutu, bitumu i avijacyjnaha paliva.

Što tyčycca apošniaha, to štohod tut vyrablajuć kala 840 tysiač ton avijacyjnaj hazy TS-1, a heta 8,4% ad ahulnaha abjomu vytvorčaści ŭ Rasii. Strata takoha resursu — heta balučy ŭdar pa łahistycy i zabieśpiačeńni vajennych apieracyj, padkreślivali ŭ Siłach bieśpiłotnych sistem Rasii.

Pra efiektyŭnaść dronavych atak možna havaryć u niekalkich vypadkach: kali NPZ spyniaje pracu, kali «bavoŭna» prychodzić na abjekty, ad jakich krytyčna zaležyć bieśpierabojnaść pastavak paliva dla rasijskaha vojska, i kali vorah vymušany pierabudoŭvać łahistyku i pastaŭlać paliva z addalenych rehijonaŭ, raskazaŭ «RBK-Ukraina» vajskovy ekśpiert, były pres-sakratar Hienštaba USU Uładzisłaŭ Sielaźnioŭ.

«Treba razumieć nastupnaje: naftapradukty — heta kroŭ vajny. Kali ich niama, spyniajucca tanki, braniatechnika, łahistyka padraździaleńniaŭ na piarednim krai i armija ŭ cełym. U minułym hodzie ŭ mianie byŭ niekatory skiepsis. Mnie zdavałasia, što kaštoŭnymi resursami łahičniej bić pa bazach, składach i arsienałach, pa tym, što niasie nam śmierć. Ale pryznaju, što pamylaŭsia. Tamu što nie mienš važna źniščać vytvornyja rečy, jakija adkazvajuć za zabieśpiačeńnie rasijskich sił i srodkaŭ», — padkreślivaje surazmoŭca.

Pry hetym udary pa rasijskich NPZ i naftabazach dajuć efiekt tut i ciapier.

«Možna ŭspomnić, jak paśla prylotaŭ u Tuapse [Krasnadarskaha kraju] na praciahu 2024 hoda rasijanam stała nie chapać paliva dla padraździaleńniaŭ na poŭdni Ukrainy. Chto viedaje, jak by raźvivałasia tam situacyja. Vidavočna, strata była vielmi adčuvalnaj. Źniščajučy sotni tysiač ton paliva i vytvorčaść, my pazbaŭlajem supiernika choć by častki nastupalnaha patencyjału. Spadziajusia, i ŭdary pa NPZ u Razani i Nižnim Noŭharadzie byli nie apošnimi», — dadaŭ jon.

Nakolki ŭdajecca takimi napadami padarvać zdolnaść Rasiei finansavać vajnu, pytańnie składanaje. Dla hetaha ŭdary treba maštabavać u niekalki razoŭ, kazaŭ raniej u kamientary jutub-kanału «RBK-Ukraina» daradca kiraŭnika Ofisa prezidenta Ukrainy Michaił Padalak.

«Na siońnia pad udaram znachodzicca, kali brać naftavuju halinu, 46% pierapracoŭčych mahutnaściaŭ NPZ… Kali heta budzie źniščana, heta budzie istotna… Ale efiektyŭnaść stanie vidavočnaj, kali Rasija nie zmoža tak abjomna finansavać vajennyja prahramy. A dla hetaha treba ŭ 5-7-10 razoŭ maštabavać kolkaść udaraŭ», — zajaviŭ jon.

Vierahodna, Ukraina spyniacca nie maje namieru i ŭdary pa rasijskich NPZ buduć praciahvacca. Prynamsi, heta vynikaje ź niadaŭnich zajaŭ prezidenta Uładzimira Zialenskaha.

Pa jaho słovach, pa-pieršaje, ataki dronami i rakietami viartajuć vajnu na terytoryju Rasii i skaračajuć jaje vajskovy patencyjał. Pa-druhoje, źnižeńnie mahčymaściaŭ pradavać naftu dla finansavańnia vajny — heta toje, što treba, kab spynić jaje ŭžo ŭ 2025 hodzie.

• 29
• 1
• 0
• 0
• 0
• 0
• 0
• 0