Biełarus zachavaŭ archiŭ pradzieda i ździviŭ im polskich čynoŭnikaŭ
5.02.2025 / 19:20
Dakumient 1920 hoda ŭ polskim užondzie ŭspryniali jak «muziejnuju relikviju», raskazaŭ biełarus. Jaho historyju zaŭvažyŭ MOST.
Paśviedčańnie asoby dzieda Dzimy. Fota: jutub-kanał @livepriyut
Z 2020 hoda biełarus Dzima ź siamjoj žyŭ na Bali. Paźniej im daviałosia pierajechać u Polšču i tut u lehalizacyi dapamahli staryja dakumienty pradzieda Dzimy.
Dzima naradziŭsia ŭ nievialikim horadzie na zachadzie Biełarusi. Da 1939 hoda heta terytoryja ŭvachodziła ŭ skład Polščy i, jak kaža mužčyna, vychoŭvali jaho ŭ polskaj tradycyi.
Pradzied mužčyny słužyŭ u polskaj armii, jakaja vystupała suprać napadu Savieckaha sajuzu.
«I pašancavała majmu pradziedu, što jon nie byŭ aficeram, tamu što nam usim viadoma, što zdaryłasia z aficerami, jakija abaraniali Polšču ad napadu Savieckaha Sajuza. Ich usich źvieźli ŭ łahiery, a potym prosta jany byli pakaranyja — prosta utylizacyja niepažadanych. Ale niejkuju bolšuju častku polskaha vojska raspuścili pa damach. Voś moj pradzied byŭ takim prostym sałdatam, jaki viarnuŭsia, vyžyŭ i byŭ vymušany žyć užo na terytoryi Savieckaha Sajuza», — raskazaŭ jon.
U siamji atrymałasia zachavać dakumienty ad pradzieda Dzimy i kali jon apynuŭsia ŭ Polščy, mužčyna zmoh vykarystać ich dla svajoj lehalizacyi.
«Vielmi dobra pamiataju, kali ŭpieršyniu pryjšoŭ u užond u Biełastoku. Ja prynios Davud paśviedčańnie asoby, jakoje datavana 1920 hodam. Jano vyhladała jak staradaŭniaja karta skarbaŭ, jakaja paciortaja, padpalenaja», — padzialiŭsia biełarus.
Pa jaho słovach, supracoŭniki užonda, pabačyŭščy taki archiŭny dakumient, źbiehlisia z usich akiencaŭ, tamu što heta była «realna jak niejkaja relikvija muziejnaja».