Biełaruska, jakaja śviatkuje Chełaŭin 18 hadoŭ zapar: «Nam usim nie paškodzić lišni raz padureć»
Napiaredadni Dnia ŭsich śviatych, jaki śviatkujuć nie tolki za miažoj, ale i ŭsio aktyŭniej u nas, u Biełarusi, my pahutaryli z Chryścinaj Rybiankovaj, dla jakoj 31 kastryčnika — heta ŭžo šmat hadoŭ adnačasova i dzień naradžeńnia, i dadatkovy dzień, kali možna zabycca pra surjoznyja ofisnyja abaviazki śpiecyjalista pa kamunikacyjach, pieraŭvasobicca ŭ vobrazy sa strašnych kašmaraŭ i pahruzicca ŭ atmaśfieru samaha mistyčnaha śviata ŭ śviecie.
«Siamiejka Adams» z Chryscinaj Ryččy, «Bajki sa sklepa», chełłaŭinskija vypuski dysnejeŭskich mulcikaŭ na kasietach, kanał «Nikiełodyjon», filmy Cima Biortana — roznyja trymcieńniki i tajamnicy na ekranie i ŭ knižkach zachaplali Chryścinu z samaha dziacinstva.
Vidać, na heta jakraz paŭpłyvaŭ toj fakt, što jana naradziłasia 31 kastryčnika. Takim čynam pytańnie, u jakim styli rabić pieršy maštabny dzień naradžeńnia, jaki vypaŭ na navučańnie ŭ trecim kłasie, adpała samo pa sabie. Chutka heta pieratvaryłasia ŭ siamiejnuju tradycyju, ułasny rytuał Rybiankovych.
«Mnie vielmi padabałasia Uenździ z «Siamiejki Adams». U pačatkovaj škole ja maryła ŭ jaje pieraŭvasobicca. U hieraini filma jarka-čornyja vałasy, my šukali tonik takoha ž koleru pa ŭsim Minsku, ale znajšli tolki bakłažanavy. Ja pafarbavałasia — i pryjšła tak u škołu. Usie nastaŭniki byli ŭ šoku», — zhadvaje Chryścina.
Z vobrazam Uenździ tak i nie atrymałasia, ale paśla dziaŭčyna prymiarała na siabie roli ŭsio bolš składanych piersanažaŭ: jaje kaściumy prajšli evalucyju ad standartnych kštałtu Viadźmarki i Turemščyka da Džokiera i zubra Vołata z čempijanatu śvietu pa chakiei — 2014.
«Kožny moj kaścium my stvarajem razam z maci ŭručnuju: šyjem, ładzim kanstrukcyi, prydumlajem makijaž… U Biełarusi, kaniečnie, da hetaha času składana znajści patrebnyja atrybuty, aksesuary, niezvyčajnuju kaśmietyku i paryki — niešta prychodzicca pryvozić z-za miažy, a niešta źbirać pa Minsku pa krupinkach. Tak, dla stvareńnia kaściuma vajskoŭca nam vielmi dapamahło «Pole cudaŭ» na Ždanovičach: tam my adšukali kaburu z furažkaj», — uvodzić u niuansy padrychtoŭki viečaryny Chryścina.
Ale, vidać, adnymi z samych składanych kaściumaŭ dla Chryściny byli vobraz Čyrvonaj Karalevy z «Alisy ŭ krainie cudaŭ» i Šyvy — sami pahladzicie, kolki detalaŭ pryjšłosia ŭličyć, kab dasiahnuć praŭdapadobnaści.
Siabry Chryściny chutka padchapili tradycyju śviatkavać jaje dzień naradžeńnia takim čynam i ciapier navat admaŭlajucca iści ŭ hety dzień kudyści ŭ kłub, bo heta čarhovaja nahoda sustrecca ciopłaj kampanijaj dy jašče i ŭ vobrazach roznych «varjataŭ»: za 18 hadoŭ na śviata da haspadyni prychodzili i Čarli Čaplin, i Ajpod, i Maks Korž, i Fryda Kało, i Aŭrył Łavin z pradziusaram, i Remba, i hierainia Umy Turman z «Kryminalnaha čytva», i Maryjo, i vampiry…
Kab dadatkova dasiahnuć mistyčnaj atmaśfiery, Rybiankovy nie vypuskajuć ź vidu i dekornuju častku, pradumvajučy ŭsio da drobiaziaŭ: natupalna, štohod vyrazajucca harbuzy, a na adno sa śviataŭ na ich leciščy źjavilisia štučnyja pomniki i mohiłki — voś susiedzi afihieli!
Tych, chto nie razumieje, navošta adznačać zamiežnaje śviata, Chryścina prosić rassłabicca: heta fajnaja mahčymaść čarhovy raz paviesialicca. Dla chałodnaj i pachmurnaj vosieni heta aktualna ŭdvaja: lišni raz padurycca nie paškodzić nikomu.
«Tym bolš u 26 hadoŭ pavoli pačynaješ uśviedamlać, što darosłych na samaj spravie nie isnuje», — razvažaje Chryścina.
Na pytańnie, kolki jašče hadoŭ jana źbirajecca śviatkavać Chełaŭin, jana adkazvaje słovami hierojaŭ «Hary Potara»: «Ja pracytuju prafiesara Snejpa, jaki na dambłdarskaje «I paśla stolkich hadoŭ?» adkazaŭ «Zaŭsiody!». Pakul u mianie jość natchnieńnie i pazityŭnyja ŭražańni siabroŭ z hetaj nahody, ja budu heta rabić».
Dzialiciesia svaimi historyjami i vobrazami na heta śviata ŭ kamientach!
Kamientary