Chto takija Šachrajeŭ i Paŭlučenka, jakija ŭznačalili Słužbu achovy prezidenta i Apieratyŭna-analityčny centr?
Alaksandr Łukašenka 11 śniežnia zrabiŭ kadravyja rašeńni ŭ siłavym błoku. Jašče 13 kastryčnika jon adchiliŭ ad pasady kiraŭnika Apieratyŭna-analityčnaha centra Siarhieja Špiehuna.
«Ja chacieŭ by pahavaryć i abmierkavać u hetym składzie prablemy asobnych pravaparušeńniaŭ u našaj krainie. U tym liku i na samym vysokim uzroŭni, u tym liku źviazanych z karupcyjnymi prajavami», — tak pačaŭ tuju naradu Alaksandr Łukašenka.
Novym kiraŭnikom AAC staŭ Andrej Paŭlučenka, jaki da hetaha byŭ načalnikam słužby achovy prezidenta. Praŭda, na hetaj pasadzie Paŭlučenka nie adpracavaŭ navat hoda. Cikava, što bijahrafii Paŭlučenki niama ŭ adkrytym dostupie. Tady jak źviestki pra jahonaha papiarednika — Viktara Šynkieviča — adrazu byli nadrukavanyja na aficyjnych sajtach.
Pra Paŭličenku viadoma tolki, što letaś jon staŭ słuchačom fakulteta padrychtoŭki i pierapadrychtoŭki Instytuta dziaržaŭnaj słužby Akademii kiravańnia pa śpiecyjalnaści «dziełavoje administravańnie».
Admietna, što adnym z byłych kiraŭnikoŭ AAC byŭ Valeryj Vakulčyk, jaki ciapier uznačalvaje KDB. U abaviazki AAC uvachodzić, u tym liku, rehulavańnie internetu. Heta samaje zakrytaje siłavoje viedamstva ŭ krainie.
«Paŭlučenka — čałaviek daśviedčany, jakomu charakternaja vysokaja vykanalnaść», — tak charaktaryzavaŭ svajho ciełaachoŭnika Łukašenka.
«Pałkoŭnik Paŭlučenka paśpiachova pracavaŭ na pasadzie načalnika Słužby biaśpieki prezidenta. Da jaho niama nijakich pretenzij. Ale, uličvajučy jaho patencyjał jak apieratyŭnaha rabotnika, jak śpiecyjalista-analityka, pryniata takoje rašeńnie», — skazaŭ dziaržsakratar Rady biaśpieki Stanisłaŭ Zaś.
Usie kiraŭniki AAC
- Valeryj Vakulčyk (2008—2011)
- Siarhiej Špiahun (24 kastryčnika 2011 — 13 kastryčnika 2017)
- Andrej Paŭlučenka (11 śniežnia 2017 — da ciapierašniaha času)
Słužbu achovy prezidenta ciapier budzie ŭznačalvać Dźmitryj Šachrajeŭ, jaki da hetaha času byŭ namieśnikam u Paŭlučenki. Admietna, što mienavita Šachrajeŭ byŭ vykanaŭcam abaviazkaŭ kiraŭnika AAC, kali Špiahun byŭ adpraŭleny ŭ adstaŭku.
«Pałkoŭnik Šachrajeŭ daŭ rady zadačy, jakaja pierad im stajała ŭ AAC, — uskałychnuć kalektyŭ, navieści paradak i naładzić pracu», — skazaŭ Zaś.
U 2005 hodzie Šachrajeŭ atrymaŭ miedal «Za biezdakornuju słužbu» III stupieni. Na toj momant jon byŭ nie pałkoŭnikam, a majoram. Zajmaŭ pasadu staršaha aficera pieršaha adździeła asabistaj achovy słužby biaśpieki prezidenta.
Čytajcie taksama: Novy kiraŭnik Słužby biaśpieki Łukašenki vučyŭsia ŭ PTV handlu na pradaŭca
Pasada kiraŭnika słužby biaśpieki — adna z samych źmianialnych u krainie. Šachrajeŭ staŭ užo adzinaccatym hałoŭnym ciełaachoŭnikam Łukašenki za 23 hady znachodžańnia taho va ŭładzie. Najdaŭžej zmoh pratrymacca Andrej Uciuryn — až 7 hadoŭ.
Usie kiraŭniki słužby biaśpieki prezidenta
- Viačasłaŭ Karaloŭ (1994—1995)
- Juryj Barodzič (1995—1998)
- Uładzimir Navumaŭ (1999—2000)
- Leanid Jeryn (vierasień — śniežań 2000)
- Hienadź Niavyhłas (2000—2001)
- Jaŭhien Dviarnicki (2001—2003)
- Juryj Žadobin (2003—2007)
- Andrej Uciuryn (2007—2014)
- Viktar Šynkievič (20 kastryčnika 2014 — 21 śniežnia 2016)
- Andrej Paŭlučenka (21 śniežnia 2016 — 11 śniežnia 2017)
- Dźmitryj Šachrajeŭ (11 śniežnia 2017 — da ciapierašniaha času)
***
Kamientary