Dźmitryj Mieziencaŭ zajaviŭ, što zatrymanyja rasijanie nakiroŭvalisia tranzitam u treciuju krainu, ale praz spaźnieńnie na rejs zastalisia i pasialilisia ŭ sanatoryj «Biełarusačka» pad Minskam, piša Tut.by.
Jon taksama nazvaŭ biespadstaŭnymi śćviardžeńni ab sprobie ŭmiašańnia zatrymanych rasijanaŭ va ŭnutranyja spravy Biełarusi. Na jaho dumku, heta «tolki dapamahaje voraham Sajuznaj dziaržavy ŭnosić razład u brackija adnosiny našych krain».
— Rasijanie, jakija prybyli ŭ sanatoryj «Biełarusačka» pad Minskam, byli vymušanyja heta zrabić u suviazi z tym, što spaźnilisia na rejs z Nacyjanalnaha aeraporta stalicy Biełarusi, nakiroŭvajučysia tranzitam u treciuju krainu. Jany mieli namier vylecieć ź Minska 25 lipienia [ŭ Stambuł] i nie źbiralisia znachodzicca ŭ Biełarusi na niejki praciahły čas, a paźniej płanavali viarnucca ŭ rasijskuju stalicu ź inšaj dziaržavy taksama samalotam, abychodziačy terytoryju Biełarusi. Padstavaj dla ich pryjezdu ŭ krainu źjaviŭsia kantrakt z adnoj z kamiercyjnych firmaŭ, jakaja zarehistravanaja tut u Biełarusi, a kožny mieŭ z hetym pradpryjemstvam zaklučany pracoŭny dahavor, — zajaviŭ Mieziencaŭ.
Jon taksama adznačyŭ, što, pavodle infarmacyi, jakuju jašče treba ŭdakładnić, ci rasijanie mohuć źjaŭlacca supracoŭnikami pryvatnaha achoŭnaha pradpryjemstva, jakoje zabiaśpiečvaje achovu enierhietyčnaj infrastruktury i resursaŭ za miažoj — zusim nie ŭ Biełarusi.
— Čakajem ad kampietentnych orhanaŭ Respubliki Biełaruś dokaznaj infarmacyi, jakaja paćviardžaje abhruntavanaść praviedzienaha zatrymańnia rasijskich hramadzian i pradjaŭlenych im abvinavačvańniaŭ pa šerahu artykułaŭ Kryminalnaha kodeksa RB, jak i zaviadzieńnia kryminalnaj spravy, ab čym abvieščana 30 lipienia — padkreśliŭ pasoł.
Mieziencaỳ taksama raspavioŭ, što 30 lipienia ŭ chodzie sustrečy z kiraŭnikom MZS Biełarusi Uładzimiram Makiejem, zapatrabavaŭ zabiaśpiečyć dostup konsulskich supracoŭnikaŭ da rasijan, ab čym była nakiravana adpaviednaja nota.
Adkazvajučy na adno z pytańniaŭ karespandentaŭ, dypłamat adznačyŭ, što «našeńnie kamuflažnaj formy, jak i niežadańnie padtrymać chlebasolnyja słavianskija tradycyi, «niehatoŭnaść» padniać «dobruju čarku» za siabroŭ — u pieryjad znachodžańnia ŭ lubym sanatoryi Biełarusi — nie bačacca padstavaj dla takoj pilnaj uvahi ŚMI, jak i asnovaj dla dziejańniaŭ pravaachoŭnych orhanaŭ bieź pierakanaŭčych i važkich na toje padstaŭ».
Kamientary