Nichto nie vieryŭ u studzieni-lutym 2022 hoda, što Pucin raspačnie vajnu. I ciapier vykarystańnie jadziernaj zbroi z boku Rasii treba razhladać jak mahčymy krok, miarkuje pradstaŭnik pa pytańniach biaśpieki i abarony Abjadnanaha pierachodnaha kabinieta Śviatłany Cichanoŭskaj Valeryj Sachaščyk.
Takoje mierkavańnie Valeryj Sachaščyk vykazaŭ u efiry Radio NV.
Sachaščyk padtrymlivaje ahulnaje mierkavańnie ekśpiertaŭ ab tym, što raźmiaščeńnie rasijskaj taktyčnaj jadziernaj zbroi ŭ Biełarusi — projhryš Łukašenki.
Biełaruś hublaje jašče častku svajho suvierenitetu. Minsk nijak nie moža paŭpłyvať na rašeńnie Maskvy prymianić z terytoryi Biełarusi jadziernuju zbroju. Ale ž adpaviedny ŭdar u adkaz u takim vypadku budzie i pa Biełarusi.
«Reakcyi Łukašenki na hetaje rašeńnie Maskvy pakul niama. Ale za 29 hadoŭ va ŭładzie jon navučyŭsia rabić dobruju minu pry drennaj hulni», — miarkuje Sachaščyk.
A zatrymka ŭ kamientaryjach ź jaho boku tłumačycca tym, što idzie pošuk taho, jak heta kamientavać, kab nie vyhladała zanadta haniebna.
Biełaruskija vajskoŭcy, ź jakimi maje kantakt Sachaščyk, i jaho kalehi — u šoku ad taho, što adbyvajecca. «Jany ličać heta vialikaj trahiedyjaj», — kaža pradstaŭnik kabinieta.
Biełaruś miažuje z krainami — členami NATA.
«Im ni ŭ jakam razie nielha niedaaceńvać pahrozu, jakaja ŭźnikła. Bo treba razumieć, što «nie ŭsio ŭ paradku z hałavoju» ŭ dyktataraŭ u Maskvie i Minsku. Nichto nie vieryŭ u studzieni-lutym 2022 hoda, što Pucin raspačnie vajnu. I ciapier vykarystańnie jadziernaj zbroi z boku Rasii treba razhladać jak mahčymy krok», — pieraścierahaje Suchaščyk.
Naprykład, pry sprobie Ukrainy vyzvalić Krym. Kreml moža taksama vystaŭlać ultymatumy adnosna pastavak zbroi Ukrainie z boku NATA. Takoha možna čakać. I ryzyka, što heta budzie realizavana, uzrastaje.
Da raźmiaščeńnia jadziernaj zbroi Biełaruś rychtavali daŭno. U lutym 2022 hoda byli ŭniesienyja źmieny ŭ Kanstytucyju krainy, ź jakoj było prybranaje pałažeńnie ab biaźjadziernym statusie dziaržavy.
Valeryj Sachaščyk adznačyŭ, što da 1996 hoda ŭ Biełarusi raźmiaščałasia 1120 adzinak jadziernych bojeprypasaŭ. Niekatoryja składy, na jakich jany zachoŭvalisia, da siońnia znachodziacca ŭ dastatkova zdavalniajučym stanie. Ich adnaŭleńnie moža być nie vielmi pracazatratnym.
Tamu zajava ab mahčymaj hatoŭnaści placovak da 1 lipienia moža być realizavanaja, miarkuje Sachaščyk.
«Kryk adčaju». Ukrainski ekśpiert pra raźmiaščeńnie rasijskaj jadziernaj zbroi ŭ Biełarusi
ES hatovy ŭvieści novyja sankcyi, kali ŭ Biełarusi budzie raźmieščana jadziernaja zbroja, — Barel
Kamientary