Jeŭropie treba dziesiać hadoŭ, kab całkam padrychtavacca da abarony — kiraŭnik Rheinmetal
Ciapier składy amal pustyja — bojeprypasy adpraŭlenyja Ukrainie.
Jeŭropie spatrebicca dziesiać hadoŭ, kab zapoŭnić svaje składy bojeprypasaŭ i być całkam hatovaj da abarony ad «ahresara, jaki choča vajavać z NATO» — tak ličyć kiraŭnik najbujniejšaj niamieckaj vajenna-pramysłovaj kampanii Rheinmetall Armin Papierhier, piša Bi-bi-si.
«My budziem u paradku praz try-čatyry hady, ale kab całkam padrychtavacca, nam treba 10 hadoŭ», — skazaŭ kiraŭnik Rheinmetal Armin Papierhier Bi-bi-si na cyrymonii zakładki padmurka novaha zavoda, na jakim buduć rabić snarady.
«Nam u Jeŭropie treba vyrablać paŭtara miljona snaradaŭ», — skazaŭ Papierhier, dadaŭšy, što ciapier składy amal pustyja — bojeprypasy adpraŭlenyja Ukrainie.
«Pakul idzie vajna, nam treba dapamahać Ukrainie, a zatym nam spatrebicca minimum piać hadoŭ i nasamreč 10 hadoŭ, kab pa-sapraŭdnamu papoŭnić zapasy», — praciahnuŭ Papierhier.
U cyrymonii pačatku budaŭnictva zavoda bojeprypasaŭ udzielničali kancler Niamieččyny Ołaf Šolc, a taksama ministr abarony Niamieččyny Barys Pistoryus i premjer-ministr Danii Miete Frederyksien.
Šolc u svajoj pramovie, u pryvatnaści, adhuknuŭsia na niadaŭniuju zajavu eks-prezidenta i patencyjnaha kandydata ŭ prezidenty ZŠA Donalda Trampa, jaki znoŭ vykazaŭsia ŭ tym duchu, što nie chacieŭ by abaraniać tyja krainy NATO, jakija sami nie traciać dastatkova hrošaj na abaronu.
«Dazvolcie mnie jasna skazać u suviazi ź niadaŭnimi padziejami, što luby pierahlad harantyj kalektyŭnaj abarony NATO biezadkazny, niebiaśpiečny i adpaviadaje tolki intaresam Rasii. Nichto nie pavinien hulać abo tarhavacca ź biaśpiekaj Jeŭropy», — skazaŭ Šolc.
Rheinmetall płanuje ŭkłaści ŭ novy zavod u miastečku Unterlus u Nižniaj Saksonii, na poŭnačy Hiermanii, bolš za 300 młn jeŭra. Zavod pa płanach budzie vyrablać 200 tys.snaradaŭ u hod.
Adrazu paśla napadu Rasii na Ukrainu Ołaf Šolc abviaściŭ ab t. zv. Zeitenwende — pavarotnym momancie ŭ źniešniaj palitycy Hiermanii — i ab razavych asihnavańniach na abaronu 100 młrd jeŭra.
Tym nie mienš, Niamieččyna, jak i bolšaść krain NATO, dahetul nie daviała svaje vajskovyja vydatki da 2% VUP — takoje abaviazańnie krain NATO kalektyŭna ŭziali na siabie jašče 10 hadoŭ tamu, paśla taho, jak Rasija zachapiła Krym i raźviazała vajnu na Danbasie.
Doktar Kłaŭdyja Major ź niamieckaha Instytuta mižnarodnych spraŭ i palityki biaśpieki kanstatuje, što paśla lutaha 2022 hoda jeŭrapiejskija krainy, viadoma, stali bolš układvać u abaronu.
«Ale kali ščyra, my viedajem, što ŭ dadzieny momant jeŭrapiejcy nie zdolnyja abaranicca ŭ vypadku kanviencyjnaha kanfliktu biez padtrymki Złučanych Štataŭ», — kaža doktar major.
Pavodle jaje słoŭ, z taho času, jak Šolc abviaściŭ ab Zeitenwende, zroblena ŭžo niamała — ale ŭsio ž niedastatkova dla taho, kab supraćstajać usiamu śpiektru pahroz.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie8
Kamientary