«Rasija viedała pra padrychtoŭku terakta ŭ Maskvie prynamsi za miesiac da jaho» — Kiryła Budanaŭ
Rasija viedała pra padrychtoŭku terakta ŭ handlovym centry «Krokus Sici Choł» pad Maskvoj jak minimum za miesiac, ale, niahledziačy na heta, Kreml vyrašyŭ dapuścić rasstreł svaich hramadzian, paviedamlaje RBK-Ukraina sa spasyłkaj na zajavu načalnika Hałoŭnaha ŭpraŭleńnia raźviedki Ministerstva abarony Ukrainy Kiryły Budanava.
«Jak minimum 15 lutaha 2024 hoda Rasija viedała pra padrychtoŭku. Ja vam bolš skažu, hetaja infarmacyja prajšła praz raźviedku hrupoŭki ŭ Siryi. Adtul jana pajšła na Maskvu. Heta dziŭnym čynam usio materyjalizavałasia», — zajaviŭ Budanaŭ.
Jon udakładniŭ, što rasiejcy viedali, adkul pryjduć bajavyja hrupy, praź jakija krainy jany pieramiaščalisia ŭ Rasiju. Pa słovach Budanava, jość niekalki viersij, čamu Kreml dapuściŭ terakt.
«Pieršaje — heta, jak u ich pryniata, baraćba «viežaŭ», kab ciapier źniać niekalki čynoŭnikaŭ. Inšy varyjant — jany nasamreč niedaacanili maštaby taho, što adbudziecca. Dumali, što heta budzie bolš łakalna, i chacieli abvinavacić va ŭsim Ukrainu», — ličyć načalnik ukraisnkaha HUR.
Jon nahadaŭ, što rasijskija ŭłady ŭžo trojčy paśpieli pamianiać viersiju taho, što zdaryłasia pad Maskvoj, sprabujučy luboj canoj abvinavacić va ŭsim Ukrainu. U pryvatnaści, źjaviłasia viersija kiraŭnika FSB Rasii Alaksandra Bortnikava, jaki abvinavaciŭ samoha Budanava.
«Heta hłupstva. Darečy, kali my zakranuli hetaje balučaje pytańnie, choć heta i vorah, ale ja nie ŭchvalaju ŭ pryncypie terarystyčnyja akty suprać cyvilnych ludziej», — dadaŭ jon.
Jak padkreśliŭ Budanaŭ, Rasija ŭłasnaručna pasiejała chaos, spadziejučysia, što jana zmoža jaho kantralavać.
«Jość taki ŭstojlivy vyraz, navat iścina. Jana siarod śpiecyjalnych słužbaŭ zaŭsiody pracuje: usie sprabujuć stvaryć kantralavany chaos. Usie bolš-mienš surjoznyja arhanizacyi sprabavali ŭ rozny čas heta rabić. I aksijoma ŭ tym, što nivodnaja ź ich nie zmahła jaho zrabić kantralavanym. Toje ž adbyłosia i tut», — adznačyŭ hałoŭny ŭkrainski raźviedčyk.
Čytajcie taksama:
«Ja budaŭnik i nie maju dačynieńnie da FSB». Mužčyna ŭ sinim z «Krokusa» raskazaŭ pra siabie
95 čałaviek ličacca źnikłymi bieź viestak paśla teraktu ŭ «Krokus Sici Chole»
Aleksin i Tapuzidzis skončyli vajnu za tytuniovy rynak Biełarusi. Abodva prajhrali. A voś chto, zdajecca, pieramoh13
Kamientary