Niekatoryja biełaruskija banki značna pavysili staŭki pa valutnych układach
Apošnim časam biełaruskija banki rabili ŭsio, kab ludzi nie trymali ŭ ich dalary. Ale situacyja pačynaje źmianiacca.
Valutnyja ŭkłady znoŭ zajmieli sens
Na pačatku hoda maksimalnaja pracentnaja staŭka pa ŭkładach u dalarach ZŠA składała 1,3% hadavych pry ŭmovie, što heta budzie biezadzyŭny ŭkład terminam ad 24 miesiacaŭ.
Bolšaść bankaŭ naohuł prapanoŭvali 0,01% za ŭkłady ŭ valucie.
Pad kaniec 2024 hoda situacyja pačała źmianiacca. Paśla taho, jak Alfa-Bank padniaŭ staŭki pa depazitach u dalarach, rekordnaj stała staŭka ŭ 2,5%. Jana dasiažnaja ŭ vypadku afarmleńnia biezadzyŭnych depazitaŭ terminam ad 15 miesiacaŭ.
Samymi vyhadnymi źjaŭlajucca ŭkłady na 25 miesiacaŭ, bo pracenty pa ich nie abkładajucca padatkam.
Pa biezadzyŭnych układach terminam na 5 miesiacaŭ Alfa-Bank prapanuje staŭku ŭ 2,2%.
Na druhim miescy paśla Alfa-Banka idzie bank BiełVEB. Ale tam vyhadnyja staŭki pačynajucca tolki z 13-miesiačnych układaŭ. Staŭka pa ich składaje 2%. Takija samyja staŭki i pa ŭkładach na 24 miesiacy.
A voś biezadzyŭnyja ŭkłady ad BiełVEB u dalarach terminam na 7 miesiacaŭ majuć tolki 0,4% hadavych.
Da rekordaŭ 2022 hoda ŭsio adno daloka
Nahadajem, što pikavyja staŭki pa valutnych układach u Biełarusi naziralisia letam 2022 hoda. Tady ŭ dalarach ZŠA možna było adkryć biezadzyŭny depazit ź fiksavanaj staŭkaj da 6% hadavych.
Pryčynaj było toje, što z pačatkam vajny ludzi pačali masava zdymać hrošy z układaŭ, tamu banki byli zacikaŭlenyja ŭ tym, kab ich pryciahnuć.
Z časam takaja patreba źnikła i pracenty pa valutnych układach nastolki źnizilisia, što znachodzilisia ŭ miežach chibnaści.
Kali padaje biełaruski rubiel, to ludzi i kampanii aktyŭniej biaruć u rublach kredyty. Staŭki iduć uvierch śledam za popytam, a taksama sami banki mohuć strymlivać popyt, jaki nie mohuć zadavolić, pavyšeńniem staŭki.
Tyja, kamu hrošy patrebnyja dla viadzieńnia dziejnaści, sutykajucca z tym, što kredyty ŭ rublach stanoviacca vielmi darahimi i łamajuć finansavyja madeli. Takija hulcy rynku pačynajuć zamiaščać darahija biełaruskija rubli adnosna tannaj valutaj. Što, u svaju čarhu, pavyšaje popyt i na valutnyja kredyty, staŭki pa ich rastuć śledam za popytam.
U hety momant u maleńkich bankach zdarajecca kryzis likvidnaści — im nie chapaje nijakaj valuty. Maleńkija banki iduć u bolšyja pazyčać valutu, a tyja akazvajucca nie hatovymi da napłyvu zajomščykaŭ. Heta mienavita toje, što ciapier adbyvajecca z Alfa-Bankam, a chutka adbudziecca z usimi. Chacia na biahučych valutnych rachunkach arhanizacyj i jość dalary, dla banka heta nienadziejnaja krynica valuty — hrošy ŭ luby momant mohuć syści. Tamu Alfa-Bank pavysiŭ staŭku pa valutnych depazitach, kab terminova pryciahnuć valutu z kišeniaŭ hramadzian.
Kamientary