Dla bolšaści ludziej prateinavyja dabaŭki niepatrebnyja. Ale ŭ niekatorych vypadkach jany karysnyja

Pratein, ci białok — heta pažyŭnaje rečyva, nieabchodnaje dla narmalnaha funkcyjanavańnia arhanizma. Jon važny budaŭničy materyjał dla kletak, tkanak i orhanaŭ, a taksama adyhryvaje klučavuju rolu ŭ farmavańni muskułaŭ, umacavańni kostak, padtrymcy imunnaj sistemy i ŭzroŭniu harmonaŭ.

U formie parašku pratein časta vykarystoŭvajecca ŭ jakaści dadatkovaj krynicy białku. Ale ci sapraŭdy nam nieabchodnaja hetaja charčovaja dabaŭka? U hetym pasprabavała razabracca žurnalistka The New York Times.

Dla ludziej, jakija viaduć zvyčajny ład žyćcia, rekamiendujecca ŭžyvać kala 0,8 hram białku na 1 kiłahram masy cieła ŭ dzień. Naprykład, dla čałavieka vahoj 80 kiłahram treba prykładna 64 h białka ŭ dzień, padletkam — 1,2-1,6 hram na kiłahram vahi ŭ sutki.

Jak adznačajuć nutrycyjołahi, pieravažnaja bolšaść nasielnictva atrymlivaje dastatkovuju kolkaść białku z praduktaŭ. Najlepšyja jaho krynicy — heta miasa, u tym liku kuryca, a taksama ryba, johurt, tvaroh, jajki, arechi, baby i sačavica. Hetyja pradukty zaadno taksama zabiaśpiečvajuć šyroki śpiektr inšych karysnych rečyvaŭ: vitaminy, minierały, klatčatka, zdarovyja tłuščy i raślinnyja złučeńni.

Pa słovach śpiecyjalistaŭ, zališniaje spažyvańnie białku nie prynosić karyści, pakolki arhanizm nie moža jaho «zachavać» dla budučaha vykarystańnia. Jon budzie rasščaplacca nyrkami i pieratvaracca ŭ kałoryi, jakija mohuć być vykarystanyja nieadkładna, ci kanviertavacca ŭ tłuščavuju tkanku.

Dla ludziej z zachvorvańniami nyrak heta asabliva važna, bo pierapracoŭka vialikaj kolkaści białku moža stvaryć dadatkovuju nahruzku.

Kamu moža być karysny prateinavy parašok?

Jak śćviardžajuć ekśpierty, prateinavy parašok moža być karysny dla peŭnych katehoryj ludziej.

Heta datyčyć, naprykład, pacyjentaŭ z rakam, u jakich źnižany apietyt, abo ludziej, jakija adnaŭlajucca paśla surjoznych apieracyj na straŭnikava-kišečnym trakcie i mohuć spažyvać tolki vadkaści ci nievialikija porcyi ježy.

Daśledavańni śviedčać, što pažyłyja ludzi mohuć atrymać karyść ad pavieličeńnia spažyvańnia białku na 50%.

Ludzi starejšaha vieku majuć patrebu ŭ mienšaj kolkaści kałoryj i časta nie majuć apietytu. U vyniku prykładna pałova žančyn i tracina mužčyn starejšych za 71 hod u ZŠA nie dasiahajuć rekamiendavanaha ŭzroŭniu spažyvańnia białku, što pavialičvaje ryzyku straty myšačnaj masy i moža ŭ svaju čarhu pryvieści da padzieńniaŭ i pierałomaŭ kostak.

Prateinavy parašok pažyłyja mohuć dadavać u aŭsianku ci johurt, kab zabiaśpiečyć siabie nieabchodnaj kolkaściu białku.

Daśledavańni demanstrujuć, što prateinavy parašok moža dapamahčy pavialičyć myšačnuju masu i siłu. Niahledziačy na toje, što białok sa zvyčajnaj ježy moža być takim ža efiektyŭnym, šmatlikija spartsmieny vybirajuć prateinavy parašok z-za jaho zručnaści.

Tym nie mienš, važna pamiatać, što spažyvańnie białku nie aznačaje, što jon aŭtamatyčna pieratvorycca ŭ myšcy. Dla hetaha nieabchodnaja pravilna arhanizavanaja prahrama siłavych trenirovak, a taksama dadatkovaja kolkaść kałoryj.

Akramia taho, arhanizm nie moža vykarystoŭvać bolš za 20—40 hramaŭ białku za adzin pryjom ježy dla pabudovy muskułaŭ. 

Jakija niedachopy ŭ prateinavych paraškoŭ?

Ekśpierty adznačajuć, što isnujuć niekatoryja patencyjnyja ryzyki pry vykarystańni prateinavych paraškoŭ.

Z-za taho, što ich bolšaść kłasifikujucca jak charčovyja dabaŭki, jany nie padlahajuć strohamu kantrolu z boku śpiecyjalnych nahladnych orhanaŭ. Heta aznačaje, što jany mohuć nie ŭtrymlivać paznačanuju kolkaść białku, a ŭ niekatorych vypadkach mieć u svaim składzie škodnyja dabaŭki.

Chacia bolšaść białkovych paraškoŭ ličacca biaśpiečnymi, ekśpierty rajać vybirać tyja, jakija majuć siertyfikaty ad niezaležnych łabaratoryj.

Treba taksama pamiatać, što prateinavyja paraški — heta ŭltraapracavanyja pradukty, i ich inhredyjenty mohuć vyklikać prablemy sa zdaroŭjem.

Jany mohuć utrymlivać dadadzieny cukar ci štučnyja padsaładžalniki, jakija, pavodle niekatorych daśledavańniaŭ, mohuć vyklikać sardečna-sasudzistyja zachvorvańni, dyjabiet 2 typu i źmieny ŭ mikrabijomie.

Taksama ŭ niekatorych paraškach mohuć prysutničać emulhatary, takija jak lecycin abo ksantanavaja kamiedź, jakija, jak pakazali daśledavańni, mohuć pavialičvać zapaleńnie ŭ kišečniku.

Jak tłumačać ekśpierty, dla ludziej ź miedycynskimi pakazańniami prateinavy parašok pryniasie bolš karyści, čym škody. Adnak dla astatnich niedastatkova źviestak pra doŭhaterminovyja ryzyki, kab dakładna śćviardžać, što jany nie pavialičvajuć imaviernaść chraničnych zachvorvańniaŭ.

Jaki prateinavy parašok vybrać

Ekśpierty adznačajuć, što syrovatačny białok, jaki atrymlivajecca z małaka, lepš za ŭsio pieratraŭlivajecca i źjaŭlajecca «paŭnavartasnym», bo ŭtrymlivaje dastatkovuju kolkaść dzieviaci niezamiennych aminakisłot. Raślinnyja białki, takija jak harochavy, sojevy i rysavy, taksama efiektyŭnyja dla naroščvańnia ciahlic, choć jany mohuć być krychu mienš poŭnymi pa aminakisłotach.

Adnak pry vybary bolš važna vybrać parašok ź minimalnaj kolkaściu niepatrebnych dabavak, takich, jak dadadzieny cukar, vitaminy i minierały, jakija pieravyšajuć rekamiendavanuju sutačnuju normu. Lepš prytrymlivacca pryncypu «čym praściejšy, tym lepšy».

• 9
• 1
• 0
• 0
• 0
• 0
• 0
• 0