Kraŭcoŭ ličyć, što Łukašenka hatovy adpuskać i znakavych palitviaźniaŭ

«U žyćci tak byvaje, što my niejkija namahańni robim, niešta nie atrymlivajecca. Ukrainie, viadoma, možna nie damaŭlacca z Rasijaj, pačakać, pakul Rasija zachopić Zaparožža, naprykład, taksama varyjant. Nam taksama možna, naprykład, nie abmiarkoŭvać z pradstaŭnikami režymu vyzvaleńnie ludziej, pačakać hadoŭ dziesiać, pakul tam chto-niebudź ź ich pamre. Ale zatoje my, viadoma, budziem mieć racyju i budziem adčuvać, što ŭsio nie darma»,

— adznačyŭ Ivan Kraŭcoŭ padčas dyskusii ab metazhodnaści pieramoŭ z režymam Łukašenki ŭ novym vypusku jutub-kanała «Mnie taksama nie padabajecca».

Sankcyi, jakija byli ŭviedzieny, pa słovach Kraŭcova, «dakładna nie ŭjaŭlajuć ekzistencyjnaj pahrozy dla krainy, dla režymu ŭ tym vyhladzie, u jakim jon jość». U toj ža čas jon nie pahadžajecca ź mierkavańniem, što dalejšaje ŭzmacnieńnie sankcyj moža pryvieści da čakanaha efiektu. Pryčyna ŭ mocnaj suviazi ekanomiki Biełarusi z ekanomikaj Rasijaj. I jon nie ŭpeŭnieny ŭ tym, što technična jość sankcyjnyja instrumienty, jakija mahli b davieści rasijskuju ekanomiku da stanu, jaki praviadzie da razvału dziaržaŭnaha ładu.

Kraŭcoŭ źviartaje ŭvahu na toje, što biełaruskija ŭłady niadaŭna pakazali Viktara Babaryku i Maryju Kaleśnikavu. Heta, pa jaho mierkavańni, śviedčyć ab tym, što biełaruskija ŭłady hatovy vypuścić znakavych fihur. Pytańnie tolki ŭ tym, što režym choča atrymać uzamien.

Kraŭcoŭ ličyć, što dla režymu Łukašenki ciapier hałoŭnym jość ekanamičnyja pytańni i tyja rečy, jakija dapamahajuć pavialičvać niezaležnaść ad Rasii.

«Dla ich (biełaruskich uład. — NN) heta taksama zaraz vialikaja prablema. Dla ich heta łaviravańnie pamiž Zachadam i Uschodam tradycyjnaje ciapier niemahčyma. I ŭ tym liku z-za vajny va Ukrainie. Jany ŭ hetym sensie taksama zakładniki hetaj situacyi. Viadoma, jość unutranaja takaja patreba, ja b skazaŭ, intuityŭnaja, z hetaha vuzkaha miesca vychodzić. Tamu što voś heta realnaja ryzyka», — davodzić pradstaŭnik štabu Babaryki.

U adkaz na pytańnie, ci treba iści na sastupki režymu Łukašenki ci vybrać stratehiju zakručvańnia hajek, Kraŭcoŭ prapanavaŭ «być krychu realistam i aceńvać taksama svaje mahčymaści»:

«Vydatna, viadoma, zajmacca šapkazakidalnicvam i kazać «davajcie my zaraz z Varšavy, ź Vilni, z Łondana pamianiajem režym Łukašenki». Ale fakt u tym, što za apošnija čatyry hady mietadyčnymi represijami i aryštami jany dabilisia efiektyŭnaha kantrolu ŭ krainie.

Toje, što my budziem zapalnyja pramovy pramaŭlać, rabić pasty ŭ tvitary, što my nie pryznajem jaho demakratyčna abranym lidaram, heta pa vialikim rachunku nie ŭpłyvaje na situacyju ŭnutry krainy. Što ŭpłyvaje, heta jakraz voś hetyja aryšty i represii, i jany zahaniajuć ludziej jašče bolš pad plintus. Abmiežavańnie mabilnaści, ludzi na miažy stajać pa 30 hadzin, voś heta ŭpłyvaje na hramadstva, heta robić straty hramadstvu.

Ja liču, što treba vyrašać prablemy pa miery ich pastupleńnia. Tamu dla pačatku treba troški pryjści ŭ siabie i, jak adzin kłasik u nas, Zianon Stanisłavavič Paźniak, kazaŭ jašče dva z pałovaj hoda tamu, treba dać narodu dychnuć, bo biez hetaha dychańnia nie budzie nijakaj mabilizacyi.

U 2020 ža hodzie mabilizacyja nie adbyłasia z-za taho, što ludzi na sucharach siadzieli ci na vadzie, jana adbyłasia z-za taho, što pryvatny siektar u dva razy amal pavialičyŭsia ŭ krainie, z-za taho, što kantakty z Zachadam raśli, z-za hetaha 2020 hod adbyŭsia. A kali b jany na sucharach, na vadzie siadzieli, to ničoha nie było b».

• 4
• 5
• 2
• 7
• 0
• 0
• 4
• 0