Mahiloŭcu, jaki z nažom adbivaŭsia ad hubazikaŭcaŭ, pahražaje prymusovaje lačeńnie

Sudzić Alaksandra Kandryčyna buduć jak «asobu, jakaja ździejśniła hramadska niebiaśpiečnaje dziejańnie». Juryst «Viasny» Pavieł Sapiełka tłumačyć, što ŭ takim vypadku budzie prymianiacca ŭ dačynieńni da abvinavačanaha:

«U hetym vypadku budzie razhladacca pytańnie ab nakiravańni jaho na prymusovaje psichijatryčnaje lačeńnie. Heta značyć, što nie budzie stajać pytańnia ab pryznańni abo niepryznańni jaho vinavatym — jon albo pryznany niedziejazdolnym na momant ździajśnieńnia złačynstva, albo zachvareŭ paśla ździajśnieńnia złačynstva, i ciapier niedziejazdolny».

Akramia hetaha, Pavieł Sapiełka dadaje:

«Ale, kali b išła razmova pra razhlad kryminalnaj spravy ŭ zvyčajnym paradku, to adkaznaść za zamach na złačynstva nastaje pavodle taho ž artykuła, pa jakim praduhledžvajecca adkaznaść za skončanaje złačynstva z dadatkovaj spasyłkaj na č. 1 art. 14 KK. Art. 67 KK ustanaŭlivaje praviły pryznačeńnia pakarańnia za niaskončanyja złačynstvy: pry pryznačeńni pakarańnia ŭličvajucca charaktar ​​i stupień hramadskaj niebiaśpieki dziejańniaŭ, ździejśnienych vinavatym, stupień ažyćciaŭleńnia złačynnaha namieru i abstaviny, u siłu jakich złačynstva nie było daviedziena da kanca.

Adzin z artykułaŭ, jaki stavicca ŭ vinu Alaksandru Kandryčynu, praduhledžvaje śmiarotnaje pakarańnie, adnak u hetym vypadku jano nie pahražała b abvinavačanamu: śmiarotnaje pakarańnie za padrychtoŭku da złačynstva i zamach na złačynstva nie pryznačajecca. Vyklučeńnie składajuć zamachi na ździajśnieńnie złačynstvaŭ, praduhledžanych č. 2 art. 124, č. 3 art. 126, č. 3 art. 289 i č. 2 art. 359 KK. A č. 2 art. 139 KK siarod ich niama.

Da ŭniasieńnia ŭ 2022 hodzie źmienaŭ u KK, jakija pašyryli śfieru prymianieńnia śmiarotnaha pakarańnia, vyklučeńniaŭ z praviła naohuł nie było. Pašyreńnie śfiery prymianieńnia pakarańnia śmierciu stała istotnym parušeńniem Respublikaj Biełaruś Mižnarodnaha pakta ab hramadzianskich i palityčnych pravach».

Pavialičyć

Prymusovyja miery biaśpieki i lačeńnia — heta vid kryminalna-pravavoha ŭździejańnia, jaki nie źjaŭlajecca kryminalnym pakarańniem i ŭjaŭlaje saboj sistemu psichaterapieŭtyčnych, miedyka-prafiłaktyčnych i miedyka-reabilitacyjnych, a taksama miedycynskich mier pa dahladzie i nahladzie za asobami, jakija chvarejuć na psichičnaje rasstrojstva (zachvorvańnie), što pazbaŭlaje ich mahčymaści ŭśviedamlać značeńnie svaich dziejańniaŭ ci kiravać imi, kali hetyja asoby pa charaktary ŭčynienaha imi dziejańnia i svaim psichičnym stanie ŭjaŭlajuć niebiaśpieku dla hramadstva.

Jany pryznačajucca «asobie, jakaja ździejśniła hramadska niebiaśpiečnaje dziejańnie, praduhledžanaje kryminalnym zakonam, u stanie biesśviadomaści abo jakaja zachvareła paśla ździajśnieńnia złačynstva na psichičny razład (zachvorvańnie)» (p. 13 art. 6 KPK).

U zaležnaści ad charaktaru zachvorvańnia (rasstrojstva) asoby, stupieni niebiaśpieki ŭčynienaha joj hramadska niebiaśpiečnaha dziejańnia sud moža prymianić nastupnyja prymusovyja miery biaśpieki i lačeńnia:

• prymusovaje ambułatornaje nazirańnie i lačeńnie va ŭrača-śpiecyjalista ŭ śfiery akazańnia pischijatryčnaj dapamohi;
• prymusovaje lačeńnie ŭ psichijatryčnym stacyjanary sa zvyčajnym, uzmocnienym abo strohim nazirańniem.

• 0
• 0
• 0
• 1
• 1
• 0
• 2
• 0