«Adnakłaśniki paabiacali pazvanić pa zumie z restarana». Sustrečy vypusknikoŭ źmianili farmat
Tradycyjna ŭ pieršuju subotu lutaha ŭ Biełarusi prachodziać sustrečy vypusknikoŭ. Praz palityku trapić na ich moža ciapier nie kožny. Ale vyjście jość: biełarusy padzialilisia, jak ładziać sioleta takija sustrečy anłajn.
Usie imiony surazmoŭcaŭ źmienieny ŭ metach biaśpieki.
Dzianis rodam z rajcentra. Niekalki hadoŭ tamu jon byŭ vymušany źjechać ź Biełarusi. Ale sioleta jaho adnakłaśniki śviatkujuć kruhłuju datu z taho momantu, jak skončyli škołu.
— Kali pačali arhanizoŭvać sustreču, bolšaść zrazumieła, čamu ja nie mahu pryjechać u Biełaruś — pytańniaŭ amal nichto nie zadavaŭ. U pryvat dasyłali sumnyja žarty. Adzin z adnakłaśnikaŭ paabiacaŭ patelefanavać mnie z restarana pa zumie, kali ŭsie źbiarucca. Ja taksama padrychtavaŭ sabie krychu smačnaha, kab śviatkavać ź imi razam. Nu i pieraličyŭ hrošy, kali ŭsie skidvalisia na kvietki dla kłasnaj kiraŭnicy.
Alesia ź Minska taksama sioleta adznačaje pryhožuju datu.
— Kali adnakłaśnica zaniałasia arhanizacyjaj viečara sustreč vypusknikoŭ, jana zrazumieła, što amal pałova kłasa znachodzicca za miažoj. I bolšaść źjechała paśla 2020 hoda, tamu nie moža prysutničać fizična. My žartavali, što praściej sustrecca niedzie ŭ Vilni ci Varšavie — tudy šmat u kaho bolš šansaŭ pryjechać. U vyniku vyrašyli pravodzić sustreču anłajn. Damovilisia pić (chto harbatu, a chto i vino) pierad ekranami. Ja vyrašyła, što pajdu padčas anłajn-sustrečy ŭ kafe, kab było bolš atmaśfierna. A kłasnaj zamovili dastaŭku kvietak damoŭ.
Kaciaryna taksama sa stalicy, ale ŭ jaje ŭ adroźnieńnie ad inšych surazmoŭcaŭ usio atrymałasia nie vielmi hładka.
— Sama ja zastałasia ŭ Biełarusi. Viedała, što dvoje maich adnakłaśnikaŭ dakładna nie zmohuć pryjechać z-za miažy. Tamu prapanavała ŭ ahulnym čacie varyjant z zumam. Adna dziaŭčyna pačała aburacca praz heta. Kazała, što nam źbiehłyja niepatrebnyja i joj budzie soramna. Čat na niekalki dzion zamaŭčaŭ — usie ž razumiejuć, što aburacca ŭ takoj situacyi niebiaśpiečna. Chto ž viedaje, čaho čakać ad takoha čałavieka. Raptam jana potym pakryŭdzicca i skrynšoty ŭ HUBAZiK dašle. Pryjšłosia schłusić joj, što narod nie sabraŭsia, i stvarać asobny čat bieź jaje.
Na pachavańni snajpierki Maryi Zajcavaj u Kijevie byŭ zaŭvažany niezvyčajny bieł-čyrvona-bieły ściah3
Kamientary