Ci možna abiedać prosta na pracoŭnym miescy? Adkaz moža vas ździvić
Časta ŭ ofisach i na pradpryjemstvach uźnikajuć prablemy z pakojami dla adpačynku i pryjomu ježy. Ich albo niama, albo tam źbirajecca zanadta šmat ludziej. Ale ci možna abiedać na pracoŭnym miescy?
Abiedać prosta na pracoŭnym miescy pa biełaruskim zakanadaŭstvie nielha.
Jurydyčnyja niuansy patłumačyŭ advakat Mahiloŭskaj abłasnoj kalehii advakataŭ Uładzimir Harbačoŭ, piša «AiF».
«Pavodle ahulnaha praviła, užyvać ježu na pracoŭnym miescy zabaroniena niezaležna ad taho, ci heta ofis pradpryjemstva, budaŭničy abjekt abo administracyjny budynak. Heta supiarečyć praviłam achovy pracy i sanitarna-hihijeničnym normam», — adznačyŭ advakat.
Abiedać na pracy možna tolki ŭ śpiecyjalna adviedzienych pamiaškańniach. Najmalnik abaviazany abstalavać pakoj dla adpačynku i pryniaćcia ježy, kali ŭ rabotnikaŭ niama dostupu da abjektaŭ hramadskaha charčavańnia.
Adnak z hetaha praviła jość vyklučeńni.
«Kali charaktar pracy nie dazvalaje ŭstalavać pierapynak, supracoŭnik vymušany abiedać na pracoŭnym miescy. U takim vypadku čas, vydzieleny dla adpačynku i pryniaćcia ježy, uklučajecca ŭ pracoŭny čas», — raskazaŭ Harbačoŭ.
Pieralik takich rabot, paradak i miesca pryniaćcia ježy vyznačajucca najmalnikam u adpaviednaści z kalektyŭnaj damovaj, pahadnieńniem abo praviłami ŭnutranaha pracoŭnaha rasparadku.
Kali pa vytvorčych umovach rabotnik nie moža pakinuć pracoŭnaje miesca, najmalnik pavinien stvaryć umovy dla pryjomu ježy ŭ pracoŭny čas. Heta aktualna, naprykład, dla vartaŭnika. Taki supracoŭnik nie moža spać na pracoŭnym miescy, ale prymać ježu moža — z uklučeńniem hetaha času ŭ pracoŭny i apłataj u poŭnym abjomie.
Akramia taho, advakat padkreśliŭ, što treba adroźnivać paniaćci «pierapynak dla adpačynku i charčavańnia» i «čas dla pryjomu ježy». U pieršym vypadku možna pakidać pracoŭnaje miesca, a ŭ druhim — nielha, bo pierapynak u pracoŭnym časie adsutničaje.
Varta taksama pamiatać pra praviły achovy pracy. Naprykład, kali supracoŭnik pracuje kala niebiaśpiečnaha abstalavańnia, jon pavinien vykonvać techniku biaśpieki navat padčas abiedziennaha pierapynku.
Kali ž najmalnik nie zabiaśpiečyŭ mahčymaść zrabić pierapynak i arhanizavać miesca dla charčavańnia, rabotnik vymušany jeści na pracoŭnym miescy. U takim vypadku najmalnik nie moža jaho pakarać, bo sam nie stvaryŭ adpaviednych umoŭ dla adpačynku i pryniaćcia ježy.
Kamientary