Tramp moža pryvieści Pucina da krachu navat biez vajny. Treba tolki nie davać palohkaŭ pa nafcie

Pavodle aŭtaraŭ artykuła, jakija niadaŭna praviali analiz rasijskaj ekanomiki, Tramp maje ryčahi, kab prymusić Uładzimira Pucina spynić vajnu Rasii suprać Ukrainy jak maha chutčej, kali jon budzie dziejničać rašuča i paśladoŭna.

Navukoŭcy cytujuć vykazvańnie Trampa, zroblenaje im u pieršy dzień jahonaha kiravańnia:

«Ja dumaju, Zialenski choča miru, ale nie viedaju, ci choča miru Pucin, — skazaŭ Tramp. — Ja dumaju, Rasija sutykniecca z surjoznymi prablemami… Ja dumaju, Pucin razburaje Rasiju».

Sapraŭdy, na dumku prafiesaraŭ Zonenfielda i Cijana:

«Ekanomika Rasii, jakaja ruchaje vajnu, spustošanaja, a Pucin źmianšaje reinviestycyi ŭ pramysłovuju bazu krainy i zachoplivaje kantrol nad mnohimi pryvatnymi pradpryjemstvami, pieratvarajučy byłuju mahutnuju pramysłovaść u ruiny. Karaciej kažučy, Pucin kidaje ŭ ahoń svajoj vajny apošnija reštki ŭłasnaj ekanomiki».

Pry hetym viartańnie Trampa nibyta moža paskoryć ekanamičny krach Rasii i pryvieści da padzieńnia režymu Pucina, choć heta zdavałasia nievierahodnym jašče niekalki tydniaŭ tamu. Tym bolš što Tramp časta havaryŭ pra namier chutka skončyć vajnu, prymusiŭšy Ukrainu pryniać mirnuju ździełku, roŭnuju kapitulacyi. Ale ciapier,

«jak Tramp raniej pakazvaŭ svaju zdolnaść adaptavacca ŭ biznesie, jon, zdajecca, pierahledzieŭ svaje adnosiny da Pucina, daviedaŭšysia, nakolki słabaja nasamreč rasijskaja ekanomika».

A joj nibyta sapraŭdy zastałosia niašmat:

«Kali Pucin stracić prybytak ad ekspartu nafty, jaki padtrymlivaŭ jaho apošnija try hady, jahony režym amal dakładna abvalicca. Jon užo vykarystaŭ reziervy «na čorny dzień» i vybraŭ valutnyja zapasy krainy. Nichto nie choča kuplać rasijskija ablihacyi, kab finansavać deficyt biudžetu. Rubiel słabieje, Centralny bank Rasii hublaje mahčymaści ŭpłyvu, a Pucin nie moža źmienšyć vydatki, nie spyniŭšy darahuju vajnu».

Klučavoje tut naftavaje pytańnie, i Tramp nibyta heta dobra razumieje:

«Sa svaimi abiacańniami źnizić ceny na naftu i pavialičyć vytvorčaść nafty ŭ ZŠA na 3 miljony barelaŭ u dzień Tramp moža zrabić tak, što suśvietu bolš nie spatrebicca rasijskaja nafta, a Pucin pačnie prajhravać navat pry ciapierašnich cenach».

A heta tamu, što:

«Zhodna z Saudi Aramco, sabiekošt zdabyčy rasijskaj nafty składaje kala $44 za barel — heta samy vysoki pakazčyk siarod asnoŭnych vytvorcaŭ nafty i ŭdvaja bolšy, čym u Saudaŭskaj Aravii, AAE i inšych.

Takim čynam, pry sabiekošcie $44 za barel i dadatkovych vydatkach na transpartavańnie ŭ $20-$30 za barel Pucin pačnie hublać hrošy, kali košt nafty ŭpadzie.

Kali Tramp uviadzie novyja sankcyi suprać rasijskich naftavych kampanij, jak prapanuje pryznačany ministr finansaŭ Skot Biesient, Pucin budzie prasić pra palohku, bo jahonaja ekanomika razvalicca.

Historyja pakazvaje, što taki padychod ekanamičnaha cisku na Rasiju ŭžo spracoŭvaŭ. Chałodnaja vajna skončyłasia praź niečakany ekanamičny krach Savieckaha Sajuza. Ciapier u Trampa jość šaniec prymusić Pucina kapitulavać».

• 36
• 1
• 2
• 3
• 0
• 0
• 0
• 2