Сталі вядомыя тэхнічныя характарыстыкі звышсакрэтных дронаў, якія ЗША пастаўляюць Украіне
Пра пастаўкі дронаў Украіне ЗША паведамілі яшчэ ў красавіку 2022 года. Аднак на працягу двух гадоў не з'явілася ніводнай дакладнай фатаграфіі ці відэа гэтых беспілотнікаў з палёў бітваў. З іх кампанентаў перад адпраўкай выдаляюцца ўсе ідэнтыфікацыйныя меткі, а паверхня праціраецца, каб прыбраць адбіткі пальцаў.
Як піша Forbes, аб існаванні праекта Phoenix Ghost як часткі ваеннай дапамогі Украіне Міністэрства абароны ЗША ўпершыню згадала ў красавіку 2022 года.
З той пары кампанія Aevex Aerospace ў рамках праекта паставіла Украіне больш за 5000 дронаў — больш, чым любы іншы вытворца ў ЗША, — на суму $582 мільёна. Але да нядаўняга часу сакрэтнасць, прадугледжаная кантрактамі Пентагона, вымушала Aevex і ўкраінскую армію захоўваць маўчанне, што параджала розныя чуткі і здагадкі.
Само месца вырабу дронаў захоўвалася ў таямніцы. Кампанія была папярэджана, што Расія спрабуе вылічыць пастаўшчыкоў зброі для Украіны, у тым ліку супрацоўнікаў кампаніі. Каб абараніць іх, з кампанентаў апаратаў выдаляюцца ўсе ідэнтыфікацыйныя меткі, а самі дроны перад адпраўкай старанна праціраюцца, каб не пакінуць слядоў адбіткаў пальцаў ці ДНК.
На працягу двух гадоў не з'яўлялася ніводнай дакладнай фатаграфіі ці відэа гэтых беспілотнікаў з палёў бітваў. Аднак увосень гэтыя абмежаванні саслаблі, і журналісты Forbes змаглі наведаць завод Aevex у горадзе Тампа ў Фларыдзе.
Як высветлілася, у рамках праекта Phoenix Ghost былі распрацаваны некалькі мадэляў беспілотнікаў. Журналістам паказалі толькі некалькі з іх. Іншыя пакуль застаюцца засакрэчанымі.
Для вытворчасці беспілотнікаў па замове Пентагона кампанія Aevex аб'ядналася з кампаніяй Tribe Aerospace, якая ўжо мела невялікую вытворчасць у Тампе. Перад вытворцамі была пастаўлена задача стварэння максімальна таннага ўдарнага дрона.
Інжынеры Tribe Aerospace мадыфікавалі мадэль беспілотніка Dagger, які яны выраблялі ў невялікай колькасці. Да яго дадалася боегалоўка і сістэма ўзбраення, якая прадухіляе заўчасныя выбухі. Для корпуса выкарысталі кардонны паштовы тубус, абгорнуты вуглявалакном.
Як піша інтэрнэт-выданне Militarnyi, даўжыня Dagger складае 1,8 метра, а размах крылаў — 2,6 м. Максімальная ўзлётная маса дасягае 16 кілаграм, з якіх 3,6 кілаграм прыпадае на баявую частку. Дальнасць палёту — 190 кіламетраў, а працягласць — да 80 хвілін.
Па словах вытворцаў, эфект ад выкарыстання Dagger у баявых умовах хутка праявіўся. Нават калі дрон збівалі, яго кошт памерам $49 тысяч апраўдваў сябе, адцягваючы дарагія расійскія ракеты СПА. «Мы жартавалі: кардонная труба каштуе ворагу $500 тысяч», — цытуе выданне кіраўніка падраздзялення дронаў кампаніі Aevex Ліндсі Джонса.
Па меры таго як канфлікт перайшоў у пазіцыйную стадыю, а Украіна наладзіла вытворчасць мноства невялікіх ударных дронаў, патрэбнасць у Dagger знізілася. Aevex пераключылася на выпуск больш буйных і дальнабойных мадэляў Disruptor (коштам $69 тысяч) і Dominator.
Як паведамляе інтэрнэт-выданне Militarnyi, дрон Disruptor мае трубчаты вугляпластыкавы фюзеляж з двума прамымі крыламі і V-падобным апярэннем. Яго даўжыня — 3 метры, размах крылаў — 4,8 метра.
Гэты дрон мае максімальную ўзлётную масу 84 кілаграмы пры запуску з пнеўматычнай катапульты. Маса можа быць павялічана да 93 кілаграм пры выкарыстанні ракетнага паскаральніка. У Aevex таксама заяўляюць, што Disruptor можна запускаць з аўтамабіля, але не паведамляюць ніякіх дадатковых падрабязнасцяў.
Хоць Disruptor і Dominator саступаюць па магчымасцях даражэйшым сістэмам, яны могуць браць на борт шмат выбухоўкі і эфектыўна паражаць важныя нерухомыя цэлі, напрыклад, склады з палівам ці боепрыпасамі.
Абсталяваны невялікім рухавіком унутранага згарання Disruptor можа знаходзіцца ў паветры 4,5 гадзіны і пралятаць дыстанцыю каля 600 кіламетраў з баявой часткай масай 22,5 кілаграма.
Прадстаўнікі Aevex паведамілі журналістам, што Dominator ідэнтычны Disruptor па агульнай даўжыні і размаху крылаў, але мае зусім іншую аэрадынамічную канструкцыю з перавернутым V-падобным хвастом.
Максімальная ўзлётная маса Dominator складае 93-100 кілаграмаў пры запуску з катапульты ці з ракетным паскаральнікам. Як і папярэдняя распрацоўка, ён здольны знаходзіцца ў паветры 4,6 гадзіны ці 11,7 гадзіны з альтэрнатыўным рухавіком (што за рухавік, не паведамляецца). Дальнасць палёту дасягае 500 кіламетраў (1200 кіламетраў з альтэрнатыўным рухавіком).
Канструкцыя беспілотнікаў і пнеўматычнай пускавой устаноўкі дазваляюць іх пакаваць у разабраным выглядзе ў досыць малыя па памерах скрыні, якія могуць змясціцца ў фургоны, што ўкраінцы звычайна выкарыстоўваюць для перавозкі рыштунку па полі бою.
Інжынеры Aevex адзначаюць, што ўвесь час мадыфікуюць свае сістэмы, каб рэагаваць на расійскія контрмеры. Яны таксама прыстасавалі апараты для зборкі ў складаных умовах, напрыклад, у мароз без зняцця пальчатак.
Каб сабраць Disruptor, трэба ўсяго пяць хвілін. Гэта дапамагае хутка паднімаць беспілотнікі ў паветра, што мінімізуе рызыку выяўлення аператараў расійскімі войскамі.
Але дроны кампаніі Aevex арыентаваныя не толькі на выкарыстанне ва Украіне. Як пішуць журналісты, беспілотнікі Disruptor і Dominator адпавядаюць стандартам Пентагона і падыходзяць для планаў ЗША па масавай закупцы аднаразовых дронаў у выпадку вайны з Кітаем.
У кастрычніку Aevex набыла кампанію Veth Research Associates, каб палепшыць навігацыю і аўтаномнасць сваіх апаратаў, зрабіўшы іх эфектыўнымі ва ўмовах падаўлення сувязі і на абшарах акіянаў.
Белыя ды чырвоныя кветкі і мора слёз. Як у Вільні сустракалі Паліну Шарэнду-Панасюк29
Каментары