Staŭki pa valutnych depazitach u biełaruskich bankach rezka źmianilisia proci minułaha hoda
Na siońnia rublovyja depazity stali bolš vyhadnyja za valutnyja.
Staŭki pa ŭkładach źnizilisia ŭ niekalki razoŭ
Letaś pracentnyja staŭki pa ŭkładach mahli pryjemna ździvić układčykaŭ.
Naprykład, u žniŭni minułaha hoda navat karotkaterminovy (3 miesiacy) biezadzyŭny układ u dalarach ad Biełarusbanka mieŭ staŭku ŭ 5% hadavych. Doŭhaterminovyja ŭkłady ŭ valucie byli i pad 7%.
Ciapier Biełarusbank hatovy brać dalary na try miesiacy pad 0,2% hadavych. Maksimum, jaki prapanuje Biełarusbank pa ŭkładach u dalarach, — heta 2,9%, kali razhladać biezadzyŭnyja ŭkłady terminam na 3-5 hod. Padobnyja staŭki i ŭ inšych bankach krainy.
Pracenty pa ŭkładach u biełaruskich rublach składajuć kala 12—13%, kali razhladać biezadzyŭnyja ŭkłady terminam ad hoda. Letaś staŭki pa ŭkładach u rublach dasiahali 21,5—26,5% hadavych.
«U minułym hodzie staŭki byli značna vyšejšyja, pakolki banki byli zacikaŭleny ŭ pryciahnieńni valuty. Asabliva takaja patreba adčuvałasia paśla pačatku vajny, kali ludzi stali masava zabirać valutu.
Tady, kab prypynić adtok, jany byli vymušanyja padymać staŭki, tym samym imknučysia zachavać starych i pryciahnuć novych ŭkładčykaŭ. Kali situacyja narmalizavałasia, jany pajšli šlacham źnižeńnia stavak», — kaža ekśpiertka BEROC Nastaśsia Łuzhina.
Jana tłumačyć nizkuju zacikaŭlenaść u valutnych układach z boku bankaŭ, u tym liku tym, što ŭ Biełarusi davoli vysokija pracentnyja patrabavańni pa adličeńni ŭ fond abaviazkovych reziervaŭ Nacyjanalnaha banka (FAR).
«Ciapier heta 16%, to-bok bank, jaki pryniaŭ hrošy ad ŭkładčyka, abaviazany 16% ad sumy pieravieści ŭ hety fond. Heta taja suma, jakaja pa fakcie nie pracuje i nie prynosić prybytku banku», — adznačaje Łuzhina.
Usio dziela dedalaryzacyi
Pavodle słoŭ ekanamistki, vysokija staŭki pa adličeńni ŭ abaviazkovy reziervovy fond rehulatar uvodzić z metaj dedalaryzavać ekanomiku.
«Kali ŭ zamiežnaj valucie heta 16 pracentaŭ, to ŭ nacyjanalnaj — usiaho 4. U Rasii taksama niadaŭna pajšli šlacham pavyšeńnia staŭki pa valutnych układach u FAR z 5 da 7%», — adznačaje ekśpiertka.
Ciapierašnija staŭki pa valutnych układach nastolki małyja, što nie pakryvajuć ŭzrovień dalaravaj inflacyi.
«Na ich fonie ŭkłady ŭ biełaruskich rublach vyhladajuć bolš pryvabna, bo pracenty pa ich pieravyšajuć uzrovień inflacyi.
Ale pry hetym jany zastajucca mienš pradkazalnym finansavym instrumientam z pryčyny bolš vysokaj vałacilnaść kursu biełaruskaha rubla ŭ paraŭnańni z kursam taho ž dalara. Apošni hod jašče raz paćvierdziŭ, što va ŭmovach ŭzrastajučych ekanamičnych dysbałansaŭ inflacyja ŭ Biełarusi dosyć chutka razhaniajecca, što dosyć chutka moža źjadać dachod ad źbieražeńniaŭ».
Tym nie mienš, ekśpiertka adznačaje, što na bankaŭskija ŭkłady treba hladzieć, jak na instrumient źbieražeńnia, a nie jak na sposab atrymlivać inviestycyjny dachod
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»17
Kamientary