U Rečycy kiroŭca aŭtobusa daviedaŭsia, što zabyŭ pasažyrku — i z poŭnym sałonam ludziej pajechaŭ jaje zabirać
Žančyna z Rečyckaha rajona raspaviała ŭ tyktoku, jak z pryhodami jechała na pracu rejsavym aŭtobusam. Amal la Rečycy kiroŭca daviedaŭsia, što nie zabraŭ u ahraharadku adnu z pasažyrak. Jon vyrašyŭ viarnucca pa jaje — razam z usimi ŭ aŭtobusie.
![](http://d2u25kyqy2mqv5.cloudfront.net/img/w840d4webp1/photos/z_2025_02/autobus-emuon.jpg.webp)
Tyktokierka padpisana jak Natalla Uładzimiraŭna. Jana raspaviadaje pra siabie, što naradziłasia i vyrasła ŭ Kazachstanie, niekatory čas pracavała ŭ Paŭdniovaj Karei. A ciapier voś asieła ŭ Biełarusi — pracuje ŭ Rečycy, a žyvie ŭ ahraharadku Sałtanovie za 17 kiłamietraŭ ad horada.
Natalla kaža, što situacyja, jakaja adbyłasia ź joj niadaŭna, mahčyma tolki ŭ Biełarusi. Jana z synam śpiašałasia na aŭtobus, jaki pavinien byŭ vyjechać z Sałtanova ŭ Rečycu ŭ 8.40. Paśpieli, ale čamuści kiroŭca startavaŭ raniej — u 8.27.
— My ŭzradavalisia — raniej ža pryjedziem. Kažu synu: «Ja krychu pasplu».
Ale amal la Rečycy syn razbudziŭ Natallu i ździŭlena paviedamiŭ, što čamuści kiroŭca raźviarnuŭsia i, vierahodna, viartajecca ŭ ahraharadok.
— Usie pasažyry takija: «A što zdaryłasia? Kudy my jedziem?». Ja pytajusia ŭ dziaduli-susieda: «Dyk my što, nie jedziem u horad?». Jon adkazvaje: «Asabista ja jedu… Tolki čamuści nie tudy». Pajšoŭ da kiroŭcy spytać.
Vyśvietliłasia: adna žančyna pryjšła na prypynak pad samy čas pryjezdu aŭtobusa i była vielmi ździŭlena tym, što jon nie źjaviŭsia.
— Jana patelefanavała na aŭtavakzał z pytańniem, dzie ž aŭtobus. Tam pierad joj vybačylisia: «Oj, u nas kiroŭca biez vopytu, u jaho nie było raskładu. Zaraz jon za vami vierniecca».
Natalla kaža, što ŭsie pasažyry maciukalisia (chto pra siabie, a chto i hučna), kali viartalisia nazad u Rečycu.
— Ja mahu zrazumieć tuju žančynu — joj treba na pracu. Ale i my ŭsie na pracu spaźnilisia. Ja raspaviała pra heta dačce — jana ŭ Ałmaty žyvie. Jana nie pavieryła: «I ŭvieś aŭtobus viarnuŭsia? Dziela adnaho pasažyra?!» Vy takoje dzie-niebudź bačyli?
Za dva dni rolik nabraŭ 575 tysiač prahladaŭ i bolš za 9 tysiač łajkaŭ. Šmat chto z kamientataraŭ pahadziŭsia, što kiroŭca pastupiŭ pravilna, bo sapraŭdy pajechaŭ raniej za raskład — i viny pasažyrki ŭ hetym niama, jana ž nie spaźniłasia. Na heta Natalla adkazvała, što va ŭsim śviecie aŭtobus, jaki źjechaŭ raniej za raskład — prablema vyklučna pasažyraŭ, jakija nie paśpieli sieści.
Žančyna nie vielmi zadavolenaja tym, što praz katańni tudy-siudy spaźniłasia na pracu na 20 chvilin. Jana taksama adznačyła, što kali b sama apynułasia na miescy zabytaj pasažyrki, to pajechała b na pracu na spadarožnym aŭto.
Niekatoryja padzialilisia svaim dośviedam taho, jak vyrašalisia anałahičnyja situacyi. «Heta jašče što. Mianie aŭtobus nie zabraŭ, prajechaŭ mima prypynku. Było 22:00. Paśla zvanka dyśpietčaru mnie vyklikali taksi, a zapłaciŭ za taksi kiroŭca aŭtobusa. Salihorsk», — napisaŭ adzin z kamientataraŭ.
U Połacku kanduktarka vysadziła piacikłaśnika z aŭtobusa — dziciaci pryjšłosia iści 5 kiłamietraŭ u zaviruchu
Žychary Smalavičaŭ skardziacca na prablemy z dajezdam u Minsk
«Biełarusy takija biełarusy». U tyktoku zachaplajucca, jak pasažyry dapamahli kiroŭcu tralejbusa ŭ Minsku
U Polščy ŭkrainski kiroŭca aŭtobusa schavaŭsia siarod pasažyraŭ, a na svajo miesca chutka pasadziŭ biełarusa
Kamientary