U Rasii pieraśledujuć za «dziaržzdradu» raspracoŭščykaŭ hipierhukavych technałohij
U Rasii za apošnija hady aryštavali jak miniimum 12 navukoŭcaŭ, jakija zajmalisia vyvučeńniem fizičnych pracesaŭ pry hipierhukavych chutkaściach, padličyła Ruskaja Bi-bi-si.
Byli aryštavanyja Anatol Masłaŭ, Alaksandr Šypluk, Valeryj Źviahincaŭ, Uładzisłaŭ Hałkin, Anatol Hubanaŭ, Valeryj Hałubkin. Imiony jašče troch navukoŭcaŭ vydańnie nie pryvodzić.
Taksama zatrymlivali navukoŭcaŭ Uładzimira Kudraŭcava, Ramana Kavalova, Dźmitryja Kołkiera, ale jany pamierli padčas śledstva. Usich 12 čałaviek abvinavačvali ŭ dziaržaŭnaj zdradzie (artykuł 275 KK).
Navukoŭcaŭ, jakija vyvučajuć hipierhuk, aryštoŭvali ŭ padmaskoŭnych Centralnym navukova-daśledčym instytucie mašynabudavańnia (CNDImaš), Centralnym aerahidradynamičnym instytucie (CAHI), a taksama ŭ novasibirskim Instytucie tearetyčnaj i prykładnoj miechaniki (ITPM) Sibirskaha adździaleńnia RAN.
«Zabrali samych prystojnych, tych, u kaho była najlepšaja reputacyja», — prakamientavaŭ aryšty supracoŭnik ITPM.
FSB aktyŭna zacikaviłasia śpiecyjalistami ŭ hetaj halinie paśla 2018 hoda — tady prezident Uładzimir Pucin prezientavaŭ «hipierhukavyja rakiety, jakija nie majuć anałahaŭ u śviecie» ŭ pasłańni Fiederalnamu schodu. Jon zajaviŭ, što zbroja zmoža manieŭravać z chutkaściu mietearyta, pieraadolvać usie sistemy SPA i «praktyčna nieparažalnaja».
U pryvatnych hutarkach supracoŭniki FSB pryznavalisia, što aryšty pa abvinavačvańniach u prodažy sakretnaj infarmacyi adbyvajucca «pa vysokim žadańni», raskazaŭ advakat Jaŭhien Śmirnoŭ, jaki baraniŭ u sudach fihurantaŭ spraŭ. Pavodle jaho, śledčyja adkryta kazali, što dakładvajuć Pucinu pra kožnuju takuju spravu ŭ dačynieńni navukoŭcaŭ.
Meta pracy FSB — prademanstravać, što za tajamnicami ab rasijskich rakietach palujuć špijony, udakładniŭ Śmirnoŭ: «Paciešyć eha, pakazać, što rasijskija rakiety — najlepšyja, i ich sprabujuć skraści».
Jon źviarnuŭ uvahu, što amal usie spravy ab dziaržzdradzie suprać navukoŭcaŭ raźvivalisia adnolkava: supracoŭniki FSB prychodzili ŭ instytuty i šukali siarod ich mižnarodnych prajektaŭ za 10-15 hadoŭ toje, što im «maksimalna padychodzić».
Spasyłku na bot «Hajuna» siłaviki znajšli na telefonie zatrymanaj aktyvistki, jakaja praciahły čas chavałasia ŭ Biełarusi6
Kamientary