Google adkryŭ skryniu Pandory. Revalucyjny instrumient stvaraje fejkavuju realnaść u adzin klik
Zamianić bieł-čyrvonyja-biełyja ściahi na čyrvona-zialonyja ŭ pratestoŭcaŭ u Biełarusi, prybrać niezadavolenych kitajskimi ŭładami studentaŭ z płoščy Ciańańmeń, dadać vybuch, miortvyja cieły ci źniščanuju vajskovuju techniku na vulicy Ńju-Jorka — ciapier Google dazvoliŭ rabić padobnaje imhnienna, aŭtamatyčna i praŭdapadobna. Usio dziakujučy novamu štučnamu intelektu Reimagine, jaki vyklikaŭ surjoznyja aściarohi ŭ ekśpiertaŭ pa biaśpiecy.
Dla fotaredaktara Magic Editor ad Google, jaki pa zmaŭčańni staić u dadatku Google Photo, byŭ vypuščany novy štučny intelekt pad nazvaj Reimagine (Pieraasensuj), jaki ŭ adzin klik dazvalaje mianiać kantekst i sens lubych fatahrafij (ŠI pakul dastupny tolki dla najnoŭšych madelaŭ smartfonaŭ Google Pixel).
Novy instrumient, jaki ŭžo byŭ nazvany revalucyjnym, adkryvaje vielizarnyja mahčymaści dla śpiekulacyj, padmanu i prapahandysckaha pieratvareńnia realnaści, «da čaho śviet jašče nie hatovy», papiaredžvaje bujnoje vydańnie The Verge sa spasyłkaj na ekśpiertaŭ pa biaśpiecy.
Revalucyjnaść novaha ŠI tłumačycca ŭ pieršuju čarhu nie jahonymi mahčymaściami redahavańnia fota, a mienavita tym, što raniej dla stvareńnia padrobak było nieabchodna choć krychu raźbiracca ŭ instrumientach i pryncypach pracy fatašopa i padobnych prahram. Niahledziačy na adnosna niadaŭniaje źjaŭleńnie ŭ takich prahramach ubudavanych niejrasietak, jakija istotna paskarali praces źmieny fatahrafij, častka pracy ŭsio roŭna ładziłasia karystalnikami ŭručnuju. Da hetaha momantu.
Ciapier Reimagine tolki pa adnym tekstavym zapycie za siekundy robić uvieś kompleks pracy, na jaki zvyčajna patrabujecca peŭny čas i chacia b minimalnyja ŭmieńni karystacca fatašopam.
Tak, na prykładzie suśvietna viadomaj fatahrafii pratestaŭ na kitajskaj płoščy Ciańańmeń «Našaj Nivie» ŭdałosia za siekundu naturalna prybrać pratestoŭca, jaki vyjšaŭ nasustrač tankam. Prahrama aŭtamatyčna prybrała navat drobnuju detal u vyhladzie adkidanaha čałaviekam cieniu na biełaj raźmietcy darohi.
Sens fatahrafii ad hetaha istotna mianiajecca i stanovicca niezrazumieła, što na joj adbyvajecca (mahčyma, zvyčajny vajskovy parad).
Druhi prykład — kultavaje fota «Dydžejaŭ pieramien», zroblenaje ŭ razhar prezidenckich vybaraŭ u Biełarusi ŭ žniŭni 2020-ha. U adzin klik štučny intelekt ad Google zdoleŭ całkam prybrać i ich, ale ŭsio ž pakinuŭ niekalki drobnych artefaktaŭ, kali pryhledziecca.
Inšymi mahčymaściami Reimagine padzialiłasia i vydańnie The Verge. Pa adnym tekstavym zapycie žurnalisty zmahli «pieraasensavać» niekalki zvyčajnych zdymkaŭ, kudy byli dadadzieny tryvožnyja detali.
Naprykład, na adnu sa stancyj mietro možna chutka i praŭdapadobna dadać bombu, źmiaścić na pryłavak kramy žyvuju źmiaju, skinuć vajskovy viertalot u vadajom ci zładzić DTZ sa śmiarotnym vynikam tam, dzie jaho nikoli nie było. Košt pytańnia — niekalki siekund.
The Verge adznačaje, što novy instrumient Google časam sam daje karystalniku padkazki, jak zrabić fatahrafii bolš pravakacyjnymi ci niebiaśpiečnymi. Z-za chutkaj masavaj dastupnaści Reimagine śviet moža sutyknucca ź biesprecedentna vialikaj kolkaściu fejkavych navin, jakija buduć padmacoŭvajecca bolš detalizavanymi i praŭdapadobnymi fotapadrobkami, jakija zmoža zrabić luby čałaviek u ličanyja siekundy.
Sama kampanija Google u adkaz na ŭsiu krytyku i zaściarohi niezaležnych ekśpiertaŭ pryznała, «što časam jaje štučny intelekt spryjaje złoŭžyvańniam i pierachodzić miežy dazvolenaha», ale pry hetym padkreśliła, što praciahnie zmahacca z hetym dziela biaśpieki karystalnikaŭ.
Znaŭcy štučnaha intelektu prahnazujuć, što nieŭzabavie padrobki stanie niemahčyma vyjavić
U Iłana Maska raptam abjaviŭsia «syn z Kienii». Prosić hrošaj na «ŭźjadnańnie z baćkam»
Japonskaja kampanija pakazała pieršy ŭ śviecie štučny intelekt dla navukovych adkryćciaŭ. Jon adrazu pasprabavaŭ pierapisać svoj kod
Stała zrazumieła, čamu kiraŭnik biełaruskaha Ernst&Young nie zmoh asabista raźvitacca z kalektyvam4
Kamientary