«Ja taja jašče pamidorka». Što Ihar Tur piša ŭ telehram-čatach sa svajho asnoŭnaha akaŭnta
Akaŭnt prapahandysta Ihara Tura, jaki viadziecca z 2021 hoda i ni razu nie mianiaŭ svaju nazvu, byŭ vyjaŭleny dziakujučy pytańniu adnoj maładoj studentki. Voś u jakich čatach siadzić Tur i jakija dumki prasoŭvaje.
Čarhovy telehram-akaŭnt prapahandysta Ihara Tura byŭ znojdzieny ŭ pryvatnym kanale pieršakurśnicy žurfaka BDU Hanny Burdo. Jaje niadaŭniaje pytańnie da Łukašenki pra adklučeńni internietu ŭ 2020-m aktyŭna raskručvała dziaržprapahanda i vystaŭlała za dokaz isnavańnia ŭ Biełarusi svabody słova.
Ihar Tur, jaki taksama prykłaŭ ruku da raskručvańnia Hanny Burdo na telebačańni, pakinuŭ kamientar da dopisu dziaŭčyny, dzie taja dzialiłasia pačućciami paśla pytańnia da Łukašenki.
Burdo ŭ razmovie ź inšym karystalnikam vykazała zdahadku, što «ŭ hetym hodzie, jak i ŭ 2020-m, płanujucca novyja adklučeńni internetu». Vierahodna, dziaŭčyna mieła na ŭvazie pieryjad novych prezidenckich vybaraŭ u studzieni 2025 hoda.
U razmovu ŭmiašaŭsia Tur i zajaviŭ, što ničoha nie płanujecca, ale dadaŭ cytatu Łukašenki, što «kali pratesty paŭtoracca, to interniet budzie adklučany zusim».
Akaŭnt Tura akazaŭsia adkryty, byŭ padpisany jahonym imiem i proźviščam, a taksama źmiaščaŭ u sabie biełaruski numar telefona prapahandysta i jahonaje imia karystalnika ŭ telehramie.
Prahnaŭšy atrymanuju infarmacyju praź śpiecyjalnyja siervisy, «Naša Niva» daviedałasia, u jakich čatach siadzieŭ ci praciahvaje siadzieć prapahandyst i što toj u ich pisaŭ.
Akaŭnt «Ihoŕ Tur» pad nikam @Tur_ONT pačaŭ prajaŭlać aktyŭnaść jašče letam 2021 hoda i dahetul nie mianiaŭ svajoj nazvy, z čaho my robim vysnovu, što heta asabisty ci pracoŭny akaŭnt prapahandysta.
Śpis čataŭ, u jakich pisaŭ Tur, taki (ahułam 140 paviedamleńniaŭ za amal try z pałovaj hady). Siarod čataŭ jość niekalki apazicyjnych.
- Samyj avtoritarnyj čat (67 paviedamleńniaŭ, apošniaje ź jakich — 31 kastryčnika 2024).
- Kommientarii (18 paviedamleńniaŭ, apošniaje ź jakich — 25 vieraśnia 2024).
- Post-Rudzik čat (15 paviedamleńniaŭ, apošniaje ź jakich — 4 lipienia 2023).
- Hrafačat (13 paviedamleńniaŭ, apošniaje ź jakich — 22 listapada 2024).
- Media IQ-chat (9 paviedamleńniaŭ, apošniaje ź jakich — 21 listapada 2023).
- ZmeyMarini4_Chat (5 paviedamleńniaŭ, apošniaje ź jakich — 25 maja 2022).
- Krutalevič Chat (2 paviedamleńni, apošniaje ź jakich — 11 červienia 2022).
- Kniha HU«BAZA» Chat (2 paviedamleńni, apošniaje ź jakich — 2 kastryčnika 2024).
- Guzel Chat (1 paviedamleńnie, 8 kastryčnika 2024).
- Chat TS (1 paviedamleńnie, 8 maja 2024).
- Po suŝiestvu. Tok-šou go on Chat (1 paviedamleńnie, 24 červienia 2024).
- PODPOLJE (1 paviedamleńnie, 7 śniežnia 2023).
- Bołtałka BS (1 paviedamleńnie, 23 žniŭnia 2023).
- Małanka Čat (1 paviedamleńnie, 6 śniežnia 2022).
- Centr Čat (1 paviedamleńnie, 4 śniežnia 2022).
- Valerij Ciepkało obsuždienije (1 paviedamleńnie 16 žniŭnia, 2022).
- Obŝajemsia (1 paviedamleńnie, 3 lipienia 2021).
Z usich vyšejpieraličanych čataŭ prapahandyst Ihar Tur zastajecca na dadzieny momant tolki ŭ dvuch: «Samyj avtoritarnyj čat» i «Hrafačat».
Voś što ŭ hetych čatach piša prapahandyst.
Abaraniaje vybary i kakietničaje ź Illom Biehunom
Siarod usich čataŭ pa kolkaści paviedamleńniaŭ ad Tura značna vyłučajecca «Samyj avtoritarnyj čat», u jaki prapahandyst pačaŭ pisać jašče ŭ lutym 2023 hoda (na momant napisańnia materyjału ŭ čacie znachodziacca 89 udzielnikaŭ).
Uładalnikam čatu źjaŭlajecca jašče adzin łukašenkaŭski prapahandyst Illa Biahun, były aktyvist štaba Capkały, jaki, pavodle jaho słoŭ, vajuje va Ukrainie na rasijskim baku i nibyta źjaŭlajecca kamandziram adździaleńnia radyjoelektronnaj baraćby (Biahun niadaŭna skardziŭsia ŭ svaim telehram-kanale, što nie ŭsie łukašysty vierać u jahonaje znachodžańnie va Ukrainie i jašče zajaŭlajuć, što toj daŭno viarnuŭsia ŭ Minsk, nie pabyvaŭšy na ŭkrainskaj terytoryi).
Adnak, kali adkryć «Samyj avtoritarnyj čat» Biehuna, to nasamreč možna adrazu ŭbačyć videakružok ad jaho i pabačyć, što toj spakojna hulaje pa Minsku i nijakimi bajavymi dziejańniami nie zajmajecca.
Ale vierniemsia da Ihara Tura. Jašče ŭ kancy kastryčnika pamiž im i Biahunom u čacie ŭźnikła sprečka nakont taho, a «ci patrebnyja ŭvohule ŭ Biełarusi prezidenckija vybary» i jak spraŭlacca z pratesnymi hałasami na ich.
Pačałasia sprečka tak — 31 kastryčnika Tur u svaim kanale pasprabavaŭ abvierhnuć publikacyi niezaležnych miedyja nakont taho, što Volha Čamadanava była vyłučana na vybary nie pa svajoj ułasnaj inicyjatyvie.
Biahun reposnuŭ hety dopis i raskrytykavaŭ samu ideju dapuskać na vybary navat kišennych kandydataŭ, bo tyja, pavodle prapahandysta, nie vartyja pasady prezidenta (asabliva Čamadanava, «bo jana jašče i žančyna») i tym samym «piarečać praciahu kursu, zakładzienaha kiraŭnikom dziaržavy».
Tur u adkaz na heta zajaviŭ, što kišennyja kandydaty nie iduć suprać Łukašenki, a prosta pieraškadžajuć sapraŭdnaj antysistemnaj apazicyi. Ale sprečka ad hetaha tolki ŭzmacniłasia.
U pracesie sprečki Tur pytaje ŭ Biahuna, jakimi, na jahony pohlad, pavinny być vybary prezidenta ŭ Biełarusi — z roznymi kandydatami ci tolki z adnym Łukašenkam. U adkaz Biahun iznoŭ nastojvaje, što nijakich vybaraŭ być nie pavinna.
«Navošta hetyja vybary? Śnikiers abirajem?» — ździekliva adkazaŭ Biahun, čym vyklikaŭ žorstkuju reakcyju Tura, jaki nazvaŭ takija vykazvańni niekanstytucyjnymi.
U dadatak da hetaha Tur padzialiŭsia svaim bačańniem formuły paśpiachovych vybaraŭ u łukašenkaŭskaj Biełarusi i techniki zmahańnia z pratesnym elektaratam.
Dobry varyjant dla Łukašenki, pavodle prapahandysta, heta «kali ŭmoŭnyja 10% niełukašenkaŭskaha elektaratu razmazvajucca tonkim płastom pamiž 5-6 inšymi kandydatami sa śmiećcievymi 1-2%, a mienšaje zło — kali 10% biare kandydat suprać usich».
Biahun, u svaju čarhu, raskrytykavaŭ i hety arhumient Tura, zajaviŭšy, što «razmazvańnie pratesnaha elektaratu pamiž umoŭnymi Hajdukievičami i Čamadanavymi — śmiešnaje i biessensoŭnaje».
Zrešty, adnosiny pamiž dvuma prapahandystami ŭ čacie nie zaŭsiody napružanyja. Byvajuć i kamplimienty. «Ihar Piatrovič, kaniečnie, kruty. Ale nie taki, jak samyja krutyja hatunki pamidoraŭ, što stajać pad hetymi fitalampami», — napisaŭ Biahun. «Ja taja jašče pamidorka», — adkazaŭ Tur. «Ty pierčyk», — prylacieła ad Biehuna.
Što piša Tur u astatnich čatach?
U čacie «Hrafačat» (naležyć praŭładnamu telehram-kanału «Hrafač», viadzieńnie jakoha prypisvajuć ministru infarmacyi Maratu Markavu) ničoha admietnaha Ihar Tur nie pisaŭ. Toje ž samaje tyčycca pryvatnych čataŭ «Kommientarii» (naležyć maskoŭskaj karespandentcy ANT Śviatłanie Karulskaj), «Chat TS» (čatam vałodaje biehły polski sudździa Tomaš Šmit) i astatnich łukašenkaŭskich resursaŭ.
U toj ža čas Tur byŭ zaŭvažany ŭ pryvatnym čacie prajekta Media IQ (naležyć Pres-kłubu), dzie raspavioŭ, što jamu prychodziać apaviaščeńni ad telehrama, kali ŭ hrupavych čatach niechta piša jahonyja imia i proźvišča (heta pracuje, kali ŭ telehram-kanałach, da jakich prymacavanyja čaty, praz nałady dazvolena kamientavańnie publikacyj).
U inšym apazicyjnym čacie «Post-Rudzik čat» prapahandyst Ihar Tur adpuskaŭ špilki ŭ adras Jana Rudzika, kali ŭ dopisach apošniaha źjaŭlalisia zhadvańni imia i proźvišča prapahandysta. Toje ž tyčycca i astatnich apazicyjnych čataŭ.
***
Nahadajem, što jašče ŭ žniŭni hetaha hoda prapahandyst Ihar Tur u efiry ANT vypadkova zapaliŭ svoj akaŭnt pad nikam @Valdis133, praź jaki na praciahu troch hadoŭ napisvaŭ u dva dziasiatki čataŭ (pieravažna apazicyjnyja).
U ich prapahandyst, prykidvajučysia zvyčajnym karystalnikam ź Biełarusi, prasoŭvaŭ nastupnyja naratyvy: što cisk na Łukašenku nie pracuje, što Cichanoŭskaja pavinna pierastać być lidaram apazicyi, što Paŭła Vusava, Ivana Kraŭcova i Volhu Karač varta słuchać i padtrymlivać, i hetak dalej.
Tur anansuje, što Łukašenku napišuć na vybarach bolš za 90%
Prapahandysty vypadkova paviedamili, kolki płaciać za stvareńnie kryndžovych stykieraŭ da Dnia narodnaha adzinstva
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ
Kamientary