10 hadoŭ. Vyniesieny prysud nobieleŭskamu łaŭreatu Alesiu Bialackamu
Sudździa Maryna Zapaśnik vyniesła siońnia žorstkija prysudy pravaabaroncam «Viasny» za ich pravaabarončuju dziejnaść.
Staršyni «Viasny» i nobieleŭskamu łaŭreatu Alesiu Bialackamu — 10 hadoŭ kałonii.
Namieśniku staršyni «Viasny» i vice-prezidentu FIDH Valancinu Stefanoviču — 9 hadoŭ kałonii.
Kaardynataru kampanii «Pravaabaroncy za svabodnyja vybary» Uładzimiru Łabkoviču — 7 hadoŭ kałonii.
Pravaabaroncu «Viasny» Dźmitryju Sałaŭjovu — 8 hadoŭ kałonii zavočna.
Taksama sudździa Maryna Zapaśnik pastanaviła spahnać u salidarnym paradku ź Bialackaha, Stefanoviča, Łabkoviča i Sałaŭjova sumu ŭ pamiery 752 438 rubloŭ 62 kapiejki jakuju jany nibyta «zdabyli złačynnym šlacham» praz «kantrabandu arhanizavanaj złačynnaj hrupaj». Uličvajučy taksama štraf, ahułam z pravaabaroncaŭ chočuć spahnać amal $450 000.
Pravaabaroncaŭ abvinavacili pavodle č. 4 art. 228 (kantrabanda arhanizavanaj hrupaj) i č. 2 art. 342 Kryminalnaha kodeksa (finansavańnie hrupavych dziejańniaŭ, jakija hruba parušajuć hramadski paradak).
Troje viasnoŭcaŭ utrymlivajucca pad vartaj z 14 lipienia 2021 hoda.
Pa spravie ŭsiaho 283 tamy materyjałaŭ pa 300 staronak — heta rekord pa palityčnaj spravie, pa jakoj prachodzić kala 100 śviedak, było praviedziena 120 pieratrusaŭ pa ŭsioj krainie.
Letaś pravaabaronca Aleś Bialacki staŭ łaŭreatam Nobieleŭskaj premii miru razam z pradstaŭnikami pravaabarončych arhanizacyj «Miemaryjał» z Rasii i «Centr hramadzianskich svabod» z Ukrainy. Jon nie zmoh trapić na cyrymoniju — pramovu Bialackaha na ŭručeńni «Nobiela» začytała jaho žonka.
Zału suda na začytvańni prysudu zapoŭnili kursantami Akademii milicyi.
U toj ža čas zvyčajnych ludziej u zału nie puskali, jany zmahli pabačyć nobieleŭskaha łaŭreata tolki ŭ kalidory, kali jaho viali. Nie dapuścili nie tolki ŭ zału, a i ŭ sam budynak, zamiežnych dypłamataŭ. A zasnavalnika rasijskaha pravabarončaha tavarystva «Miemaryjał» Aleha Arłova, jaki mieŭ namier trapić na sud, nie puścili ŭ Biełaruś. Aleh Arłoŭ nazvaŭ sud nad nobieleŭskim łaŭreatam Alesiem Bialackim i jahonymi kalehami «prajavaj fašyzmu».
Čytajcie taksama:
U apošnim słovie Aleś Bialacki zaklikaŭ da dyjałohu dziela nacyjanalnaha prymireńnia
U bresckim ofisie «Viasny» stajała špijonskaja videakamiera. Što viadoma z čarhovaha pasiadžeńnia pa spravie arhanizacyi
Pakazańni zasakrečanych śviedak i dopyt mytnikaŭ: prajšli čaćviortaje i piataje pasiadžeńni pa «spravie Viasny»
Ślady ad kajdankaŭ na rukach Bialackaha FOTAFAKT
Stała viadoma, jak dobra ŭładkavaŭsia ŭ žyćci muž starejšaj unučki Łukašenki12
Kamientary
Navat u hitleraūcau sud byū spraviadliviejšy.