Čały raskazaŭ, čamu staviŭ na Krutoha i ŭ čym pamyłka Łukašenki

U novym vypusku tok-šou «Žyćcio-malina» ekanamist Siarhiej Čały raskazaŭ, čym Łukašenka rasčaravaŭ čynoŭnikaŭ i jakuju pamyłku zrabiŭ. A taksama patłumačyŭ svaje pamyłki ŭ prahnozach.

Čym Łukašenka rasčaravaŭ čynoŭnikaŭ

«Mahu skazać, chiba što navat paśla 2020 hoda, paśla ŭsich žachaŭ, jakija vyklikali demanstracyi, (…) u Łukašenki byŭ šaniec niejak nie pieraharnuć staronku, typa «ja zastajusia», a ŭsio ž taki prydumać niejki varyjant [adstaŭki]. Jon nasamreč i byŭ u jaho. Jon šmat u čym byŭ naviazany jamu Pucinym. «Davaj damovimsia, što heta tvoj apošni termin».

I jon roŭna tak raskazvaŭ svaim čynoŭnikam. Kali zhadać apošnija tydni vybarčaj kampanii 2020 hoda, jon ža nie z [prostymi] ludźmi razmaŭlaŭ. Jon razmaŭlaŭ ź siłavikami i čynoŭnikami. I voś tam byŭ miesiedž «ja viedaju, što ja vam nadakučyŭ», — zaŭvažaje Čały i zhadvaje pra raspracoŭku «varyjanta adychodu na zapasnyja pazicyi» — praviedzienyja źmieny ŭ Kanstytucyju, nadańnie kanstytucyjnaha statusu Usiebiełaruskamu narodnamu schodu.

«Jak heta ŭsio było kłasna pradumana. Pazicyja takaja (staršyni Usiebiełaruskaha narodnaha schodu — NN) naŭprost pad Łukašenku pisałasia. (…) Ty znachodzišsia na pazicyi, dzie ničoha nie robiš, ale pry hetym možaš pry žadańni navat źniać prezidenta», — havoryć Čały i davodzić, što ŭpeŭnieny ŭ tym, što hety varyjant byŭ by pryniaty biełaruskim hramadstvam. Bo ŭ vyniku na pasadzie prezidenta byŭ by novy čałaviek, jaki b abiacaŭ, što pry im «budzie ŭsio pa-inšamu, naładzim adnosiny z Zachadam».

«Hety varyjant byŭ by mahčymy. I ja viedaju: toje, što adbyłosia, vyklikała prosta vializnaje rasčaravańnie», — davodzić ekanamist.

Pavialičyć

Čamu Čały staviŭ na Krutoha

U svoj čas Siarhiej Čały dastatkova doŭha havaryŭ ab tym, što ŭ budučych prezidenckich vybarach zamiest Łukašenki budzie prymać udzieł Dźmitryj Kruty.

«Ja absalutna sumlennym sposabam, nazirajučy za rečami, sa šmatlikich askiepkaŭ skłaŭ viersiju, jakaja pracavała sapraŭdy praciahły čas», — zaŭvažaje Čały i tłumačyć:

«Ja prosta kazaŭ ab tym, što całkam vidavočna, što hetaha čałavieka viali. Pa-pieršaje, vielmi chutkaja karjera. Pa-druhoje, jon sam patomny čynoŭnik. Jość ža vielmi daŭno ŭžo adpracavanaja paśladoŭnaść chadoŭ. Čałaviek, jaki patencyjna razhladajecca na pierajemnika, pavinien prademanstravać peŭnyja jakaści na roznych pasadach.

Heta pažadana kiraŭnik pradpryjemstva. Heta pažadana jaki-niebudź profilny ministr ci vice-premjer pa halinie. (…) Heta pasoł u Rasii. Chacia moža być i ministram krainy. (…) I heta kiraŭnik administracyi. U ideale ty pavinien byŭ jašče zavieršyć premjeram. Čamu? Tamu što ty pavinien prademanstravać viedy mikra[ekanomiki], haliny, kiravańnia narodnaj haspadarkaj, apieryravać z Rasijaj, to-bok navučycca adtul zdabyvać resursy. Što takoje administracyja [prezidenta]? Administracyja — heta kiravańnie kadrami», — tłumačyć Čały. I zhadvaje, što «roŭna pa takim šlachu išoŭ Kabiakoŭ». Adznačym, što Andrej Kabiakoŭ nie moh stać prezidentam, bo naradziŭsia ŭ Rasii.

Adnosna Krutoha analityk zaŭvažaje, što na fonie źmien u Kanstytucyi, uviadzieńnia pasady staršyni UNS, «było dakładna vidać, što jaho daviaduć» da pasady prezidenta. A sam Łukašenka «pastajanna jaho z saboju ciahaŭ i pastajanna palcam na jaho pakazvaŭ.

Jon realna prosta na jaho pakazvaŭ: «Vy mnie daremna ciapier dziakujecie. Vy pavinny pryvykać da taho, što mianie chutka nie budzie. I buduć inšyja ludzi». Hop — i na jaho [pakazvaŭ]», — zhadvaje Čały i pryvodzić u prykład siužet ab Krutym, pakazany biełaruskim telebačańniem:

«Hety siužet realna zrobleny prafiesijanałam. Heta adrazu vyrazna vidać. Jon prosta adroźnivajecca ad usiaho hetaha h***a, jakoje jany robiać pa lakałach. (…). Heta całkam była dakładnaja praca na Krutoha. (…) Tam była nastaŭnica, jakaja jaho zhadvała, jakraz pra ŭśmiešku. Tam była jaho historyja pra biełaruskuju movu, dzie jon uspaminaŭ, što jamu składana było paśla škoły pa-rusku razmaŭlać. Heta ž taksama miesiedž. Voś heta voś historyja ź ješybaj adnoŭlenaj, jakuju mienavita jon pajšoŭ adkryvać. Nu, Łukašenka ž nie moža. My ž viedajem jaho adnosiny da jaŭrejaŭ. (…)

Tamu jon heta robić. I tam nastolki byŭ sabrany vobraz adkaznaha čałavieka, jaki vydatnik i da hetaha. Plus jašče i čałaviečnaja rysa. I tam navat unutry ničoha nie značnych kavałkaŭ byli ŭsio roŭna zakładzieny rečy, jakija pavinny zachodzić u padśviadomaść, jakija davali b ludziam, jakija hladziać hety siužet, razumieńnie taho, što jon radykalna ničoha nie pamianiaje, ale prosta zrobić lepš, čałaviečniej i hetak dalej».

Samaja nievytłumačalnaja padzieja biełaruskaj palityki

Siarhiej Čały nie pahadžajecca ź mierkavańnie ab tym, što jon pamylaŭsia ŭ svaich prahnozach adnosna Dźmitryja Krutoha jak kandydata na pasadu prezidenta:

«Što značyć «pamylaŭsia»? Tendencyja isnavała. Krutoha, niesumnienna, viali. Usie, z kim ja spračaŭsia na hetuju temu, nichto nie zmoh mnie zapiarečyć».

«Ja, viadoma, razumieŭ, što šaniec vielmi małavierahodny. Ale dla mianie było važna raskazvać ab tym, što hety płan surjozna razhladaŭsia. Heta nie častka šou», — zaŭvažaje analityk.

Čały nahadvaje, što svaju viersiju jon vykazaŭ u lutym 2024 hoda i jana «pracavała vielmi doŭha», ułady «viali siabie mienavita tak, što paćviardžaje jaje sapraŭdnaść».

Ale potym, jak zhadvaje analityk, adbyłasia nievytłumačalnaja padzieja — pryznačeńnie daty vybaraŭ.

«Heta pryznačeńnie daty, jakuju pieranieśli ž na miesiac napierad. Heta źjaŭlajecca adnoj z samych nievytłumačalnych padziej biełaruskaj palityki zaraz.

I bolš za toje, ja śćviardžaju, što kali my zdolejem daviedacca i zrazumieć, čamu heta zdaryłasia, my zrazumiejem vielmi šmat z taho, čaho nie razumiejem da hetaha času. Bo hetaje rašeńnie złamała navat im samim płan. Naohuł u hetym nie było nijakaj nieabchodnaści», —

ličyć Čały i dadaje, što zajava Łukašenki ab udziele ŭ vybarach stvaryła dla čynoŭnikaŭ «šmat prablem, jakija ni ź jakoj łohiki nie vyciakali» i «vyklikała vielmi vialikaje rasčaravańnie, u tym liku ŭ jaho ŭłasnym aparacie».

U čym pamyłka Łukašenki: niečakany prahnoz Čałaha

Padčas razmovy Čały zrabiŭ prahnoz, jaki jon sam adnios da małavierahodnych, ź sieryi «čornych lebiedziej», adnak jaki jamu padajecca «scenarna łahičnym».

«Mnie zdajecca, što admova Łukašenki ad schiemy pierajemnictva na karyść schiemy naśledavańnia, heta pamyłka. U jakim sensie? Jon abraŭ scenar niekantralavanaj pieradačy ŭłady», — davodzić analityk, i zaŭvažaje, što dla Łukašenki rabili «scenar kiravanaj pieradačy». Abrany ž scenar, jak jon ličyć, heta scenar «chałodnaha leta 1953 hoda», jaki «dla krainy, i dla jaho prychilnikaŭ, i dla jaho sapiernikaŭ adzin z samych horšych varyjantaŭ».

«Ničoha demakratyčnaha ŭ takich rečach niama. Heta značyć, kali my pahladzim na statystyku, značna mienš pracentaŭ demakratyzacyi aŭtarytarnaha režymu ŭ vypadku śmierci pieršaj asoby», — davodzić Čały.

• 7
• 0
• 3
• 5
• 1
• 0
• 0
• 0