«Бульба — тэма для беларусаў, прывозьце». Беларус у Варшаве раздае прадукты эмігрантам, якія маюць у іх патрэбу
Сергій Мельянец — хрысціянскі прапаведнік, бард і бацька семярых дзяцей. Апошнія сем месяцаў ён з сям'ёй жыве ў Польшчы. За гэты час мужчына стаў валанцёрам пяці дабрачынных арганізацый, а цяпер пачаў раздаваць ежу беларусам і ўкраінцам, якія жывуць у нястачы. Most пагаварыў з Сергіем пра тое, адкуль бяруцца бясплатныя прадукты, каму іх выдаюць і чаму іншых корміць той, хто сам вымушаны ўтрымліваць вялікую сям'ю.
У прыярытэце шматдзетныя сем'і і палітвязні
Ідэя прадуктовай дапамогі нарадзілася дзякуючы знаёмству з дырэктарам польскага хрысціянскага фонду — тады Сергій дапамагаў у арганізацыі дзіцячых лагераў для ўкраінскіх, беларускіх і польскіх дзяцей.
«Я выпадкова даведаўся, што ён яшчэ займаецца прадуктовай дапамогай бедным сем'ям. Неяк ён патэлефанаваў мне і спытаў: «Можа, вам прывезці бульбы?» Я кажу: «Бульба — гэта тэма для беларусаў, прывозьце».
Так сям'і Сергія яшчэ некалькі разоў перадавалі ежу, а ён, у сваю чаргу, дапамагаў яшчэ некалькім беларускім сем'ям, якія знаходзіліся ў цяжкім становішчы.
Потым мужчына вырашыў, што мог бы дапамагаць большай колькасці людзей прадуктовымі наборамі. Ён стварыў чат у тэлеграме і дадаў туды эмігрантаў, якія маюць патрэбу ў ежы. У прыярытэце шматдзетныя сем'і, былыя палітвязні і пажылыя людзі.
Ёсць у чаце і некалькі ўкраінскіх сем'яў. Цяпер там больш за 70 удзельнікаў.
«Апостал Ян амаль дзве тысячы гадоў таму напісаў: «Калі чалавек, які жыве ў дастатку, бачыць свайго брата ў патрэбе і не пашкадуе яго, то як у ім можа быць Божая любоў?» — тлумачыць Сергій.
Як ежа трапляе да людзей, якія жывуць у нястачы
Прадукты прывозіць грузавая машына, а затым Сергій фасуе іх па скрынках. Усе прадукты дастаўляюцца з крамаў, тэрмін прыдатнасці большасці з іх падыходзіць да канца.
Са слоў мужчыны, крамам нявыгадна выкідаць ежу, бо яе вываз каштуе грошай. Таму для іх лепш аддаваць прадукты дабрачынным арганізацыям. Звычайна гэта крупы, садавіна, гародніна, сыры, ёгурты. Беларус стараецца фасаваць іх так, каб у кожнай скрынцы быў прыкладна аднолькавы набор прадуктаў.
«Зразумела, што таварны выгляд у іх не вельмі. Асабліва ў садавіны — яна трохі вялая. Але ўсё гэта можна спажываць. З апошняга, што было, — мука для выпечкі булачак, упакоўкі з селядцом і прадуктовыя наборы з гароднінай, сырам, алеем, хлебам і пірагамі».
Месца, куды прыязджае грузавік, знаходзіцца на ўскраіне Варшавы, за два кіламетры ад найбліжэйшага прыпынку. Таму, каб давезці скрынкі з ежай да месца раздачы, Сергію даводзіцца звяртацца па дапамогу. Уласнай машыны ў беларуса няма.
«На маю аб'яву ў чаце адгукнулася жанчына, якая наведвае са мной адну царкву. У яе ёсць вольны час, машына і жаданне паслужыць людзям. Другі чалавек, які адгукнуўся, — беларус, у якога шматдзетная сям'я. Таксама хрысціянін. У яго ёсць машына», — расказвае Сергій.
Расфасаваныя скрынкі з ежай захоўваюцца ў здымнай кватэры сыноў Сергія. Удзельнікі тэлеграм-чата прыязджаюць туды і забіраюць прадукты.
На мінулым тыдні Сергію ўдалося дапамагчы 30 сем'ям, а ў пачатку гэтага тыдня мужчына раздаў скрынкі з ежай яшчэ 15 беларусам.
Друкарка, машына і вольныя рукі
І ўсё ж адсутнасць машыны — гэта перашкода. Некалькі разоў Сергій развозіў скрынкі на старэнькім ровары, які «ўжо на ладан дыхае». Другая праблема — недахоп часу і вольных рук.
На фасоўку і раздачу ежы трэба выдаткаваць цэлы дзень. А Сергію трэба яшчэ працаваць, каб пракарміць уласную шматдзетную сям'ю.
«Патрэбна друкарка, каб раздрукоўваць паперы і весці ўлік таго, што адбываецца. Таксама патрэбныя валанцёры з машынамі, якія гатовыя гэтым займацца, — пералічвае беларус. — Бачу, што тэма вельмі актуальная: людзям патрэбныя прадукты. Трэба проста ўсё пісьменна арганізаваць».
«Зашмат у вас дзяцей». Як жыве сям'я з сямю дзецьмі, якой давялося выехаць з Беларусі
Беларусы за два тыдні назбіралі 15 тысяч еўра для падтрымкі шматдзетнай сям'і Сергія Мельянца
«Давялося ісці ў КДБ на допыт з дэтэктарам хлусні». Прапаведнік Мельянец выехаў з Беларусі з сямю дзецьмі і расказаў пра пераслед
У які дзень у 2020-м маглі здарыцца перамены? Польскі дыпламат выдаў кнігу аб працы ў Беларусі і даў адказ на гэта пытанне9
Каментары