Ad Saładuchi da Karža. Što biełaruskija sielebryci pościać padčas vajny i jak pra jaje vykazvajucca
Vajna va Ukrainie idzie amal dva miesiacy. Za hety čas dakładna možna było razabracca z tym, chto ŭ joj vinavaty, i zaniać vyraznuju pazicyju datyčna trahičnych padziej. Pahladzieli, što ŭ sacsietkach pościać biełaruskija sielebryci, jakija ŭ mirny čas u tym liku pryjazdžali na hastroli va Ukrainu.
Alaksandr Saładucha tradycyjna chvalicca svaimi kancertnymi pośpiechami i rekordami: 35 hod na scenie, «pachać 24 hadziny na sutki», 30 hod miehachitu «Zdravstvuj, čužaja miłaja», 120 kancertaŭ z 14-m albomam «My živy». Hastrolaŭ unutry krainy śpievaku, vidać, chapaje, tamu jon i nie ličyć vartym źviartać uvahu na toje, što adbyvajecca vakoł krainy (dy i ŭnutry).
Dziejny rekardsmen na «Jeŭrabačańni» ad Biełarusi Źmicier Kałdun zapaŭniaje stužku siamiejnymi fotazdymkami i sełfi ź fiłasofskimi podpisami kštałtu: «Ja zaniał miesto i nie ślezu popustu. A vy kak?». Na biahučyja padziei jon adreahavaŭ tolki adnojčy: kali pajšli čutki pra błakiroŭku Instahrama. Padstrachavaŭšysia, jon raźmiaściŭ na svajoj staroncy qr-kod na profil va «UKantakcie».
Z hetaj ža nahody ŭ jaho ŭ sakaviku źjaviŭsia i telehram-kanał. Tam jon u aŭdyjafarmacie vykazvaje svaju hałoŭnuju zaniepakojenaść: «Źbirajusia jechać u Maskvu, viartacca, vielmi šmat čutak, što tam palicy pustyja, nie kupić kavu, srodki hihijeny, cukru nie chapaje. Padkažycie, što z saboj uziać? Praŭda heta ci nie? Ci ŭsio hłupstva, usio dobra, žyviom, jak i raniej?» Kałdun svaje asnoŭnyja tvorčyja prajekty ciapier realizuje ŭ Rasii, u 2018 hodzie jon vystupiŭ u «DNR» na vybarach kiraŭnika samaabvieščanaj respubliki.
Padobna da Kałduna dziejničie i Iryna Darafiejeva: zaviała telehram-kanał na ŭsiaki vypadak. U astatnim — repartažy z kancertaŭ, fotazdymki ŭ pryhožych kaściumach i sukienkach, nie bolš za toje.
Jašče adna ŭdzielnica i pieramožca «Jeŭrabačańnia» (užo dziciačaha), Ksienija Sitnik, vajnu asudžaje. Jana piša: «Ja Ksiuša ź Biełarusi, jakaja vystupaje suprać bratazabojčaj punsovaj łaźni», — i raskazvaje historyju pra toje, jak u Čechii, pačuŭšy ruskuju movu, jaje admoviŭsia vieźci taksist: «Ruskim terarystam nie miesca ŭ majoj mašynie».
«Narodžanaja ŭ maleńkim horadzie Biełarusi na miažy z Ukrainaj, ja identyfikavanaja ruskaj, choć etnična ŭ majoj siamji niama nivodnaha takoha. Ale šmatpakutny kulturny kod uniesieny ŭ DNK praz historyju, transhienieracyjnuju pamiać i linhvistyčnuju sistemu», — piša Sitnik. I zakančvaje nastupnaj vysnovaj. — «Navošta nam śviet, u jakim nie budzie Rasii», — dekłaravaŭ niejak u intervju spadar Pucin. Niesuciašalnaja navina: jaje ŭžo niama. Toj Rasii, jakuju my lubili».
U lubimicy Łukašenki Alony Łanskoj pa płanie iduć viasnovyja hastroli pa Biełarusi, premjera pieśni, praca na RTR-Biełaruś u jakaści viadučaj. 13 krasavika Łanskaja adkryła ŭ Breście fiestyval Millennium, prymierkavany da Hoda histaryčnaj pamiaci. Časam na staronkach u sacsietkach śpiavački taksama možna pabačyć fotazdymki z Pałaca niezaležnaści — na fonie tamtejšych dekaracyj jana, naprykład, vinšuje ŭsich z Dniom Kanstytucyi.
Skandalnyja siostry Hruździevy abaznačajuć svaju hramadzianskuju pazicyju. «Niachaj Boh zaŭsiody achoŭvaje Biełaruś i Rasiju! Historyja ŭsim nam nieadnarazova davodziła, što tolki razam my zdolnyja hodna adkazać na lubyja vykliki i pahrozy», — pišuć jany 2-ha krasavika, jaki pa dziaržaŭnym kalendary źjaŭlajecca Dniom jadnańnia Biełarusi i Rasii.
Siostry ŭvohule lubiać śviaty: na 8 sakavika, naprykład, chvalacca nadrukavanymi paštoŭkami ad Łukašenki, a na Dzień milicyi vinšujuć «biełaruskich chłopcaŭ» jak anłajn, tak i afłajn.
Svajo staŭleńnie da vajny siostry pieradajuć słovami taho ž Łukašenki: «Jak by ni sprabavali siońnia asobnyja siły (vy ich viedajecie) uciahnuć nas u bajavyja dziejańni na terytoryi Ukrainy, u vas niama padstaŭ dla turbot».
Razynka staronki Hruździevych — publikacyi z vyjavami ikon i malitvami da ich, u tym liku, naprykład, malitvy za mir.
Rusłan Alachno akreśliŭ svaju pazicyju jašče bolš vyrazna i nie dvuchsensoŭna: jon byŭ adnym z vystupoŭcaŭ na kancercie «Krymskaja viasna — 2022».
Tam ža zaśviaciłasia i uradženka Mahilova Natalla Padolskaja. Pry hetym napiaredadni, 24 lutaha, jana napisała na svajoj staroncy: «Mnie chočacca, kab usio było jak raniej! Kali ŭ 2005 hodzie było «Jeŭrabačańnie» ŭ Kijevie i kvitnieli kaštany».
Ryta Dakota ź liku artystaŭ, chto pracuje pieravažna na rasijskim muzyčnym rynku. Ale jana padtrymała biełaruskich pratestoŭcaŭ u 2020 hodzie i nie maŭčyć u hety raz: «Usio, što adbyvajecca siońnia — jo****ie dno, nivodny razumny čałaviek na ziamli nie padtrymaje vajnu. U vajnie niama pieramožcaŭ, u vajnie prajhrajuć usie. My braty, nie davajcie palityčnym hulniam źmianiać heta».
«Asudžaju ŭvarvańnie i bambardziroŭku suviarennaj dziaržavy. Heta vajna, jakaja źmienić žyćcio kožnaha nazaŭsiody, niavažna, dzie ty žyvieš», — napisaŭ u pieršy ž dzień vajny Maks Korž. U kamientaryjach repieru dziakujuć i kažuć, što akurat hałasy viadomych ludziej mohuć na niešta paŭpłyvać.
U Aleha ŁSP z 19 krasavika pa płanie pavinien startavać tur pa Rasii. Na 23-ha zapłanavany vialiki kancert u Maskvie. Pra admienu ničoha nie paviedamlałasia, kvitki ŭsio jašče mahčyma kupić, ale z 23 lutaha na staronkach ŁSP — cišynia, niahledziačy na toje, što ludzi zaklikajuć: «Nie maŭčycie pra situacyju va Ukrainie», — a taksama pytajucca, ci adbuducca ŭsio ž zapłanavanyja kancerty.
UPD: kali hety tekst užo byŭ apublikavany, ŁSP napisali, što pieranosiać svoj tur: «Siabry, ja i maja kamanda ličym niedarečnym praviadzieńnie kancertaŭ u siońniašniaj situacyi».
Takaja ž cišynia z 23-ha lutaha nazirajecca ŭ biełaruskaj aktrysy, viadomaj pa filmach «Ja chudzieju», «Duchless 2» Sašy Borcič.
Maŭklivymi zastajucca zorki pakaleńnia Z: Uład Bumaha, Cima Biełaruskich, Mevł. U hetaj ža kaście viadomyja spartoŭcy kštałtu frystajlistki Hanny Huśkovaj. Pasprabavała vykazacca nakont situacyi va Ukrainie słavutaja bijatłanistka Darja Domračava, ale ŭ vyniku jana bolš asudziła sankcyi suprać biełaruskich i rasijskich spartoŭcaŭ, čym camu vajnu.
Illa Škuryn byŭ adzinym futbalistam, jaki admoviŭsia hulać za zbornuju Biełarusi, pakul uładu ŭ krainie ŭtrymlivaje Łukašenka. Ciapier u sacsietkach na avatarkach u jaho susiedničajuć ukrainski ściah i bieła-čyrvona-bieły.
U padtrymku Ukrainy pry hetym vykazałasia niamała alternatyŭnych artystaŭ: J:mors, Nizkiz, adnoŭleny «Lapis», lidar «Daj Darohu!» Juryj Stylski i «Leprykonsaŭ» Illa Mićko, Lavon Volski.
Vystupili suprać vajny taksama opiernaja śpiavačka Marharyta Laŭčuk, tajbaksior Vital Hurkoŭ, Palina, Łarysa Hrybalova, NaviBand, Intelligency, Molchat doma, komik Słava Kamisaranka, piśmieńniki Uładzimir Niaklajeŭ, Alaksandr Filipienka i Śviatłana Aleksijevič, viadučyja Hanna Bond, Dzianis Dudzinski, Źmicier Kachno i mnohija inšyja. Varta adznačyć, što šmat hetych i inšych artystaŭ zładzili dabračynnyja kancerty i akcyi, hrošy ź jakich iduć na padtrymku ŭkraincaŭ.
Čytajcie taksama:
«Minsk nibyta staŭ pustym». Jak ciapier žyvuć tusovačnyja Zybickaja, Kastryčnickaja i Revalucyjnaja
«Maja pamyłka, što zapisvaju videa». Čym skončylisia rezanansnyja zvaroty da Łukašenki?8
Kamientary