Pryhožyn u Rastovie. Što viadoma na hety momant pra «miaciež Pryhožyna»
Davoli niečakanaje abvastreńnie piatničnym viečaram 23 červienia ŭnutrypalityčnaj situacyi ŭ Rasii, źviazanaje z «miaciažom», jaki padniaŭ zasnavalnik i kiraŭnik PVK «Vahnier» Jaŭhien Pryhožyn sieryjaj svaich pastoŭ u telehramie, u jakich abviaściŭ pra pačatak adkrytaha vajennaha supraćstajańnia z vajskovymi čaściami, viernymi rasijskamu Minaabarony, prymusiła na heta reahavać i palitykaŭ, i siłavikoŭ, i žurnalistaŭ, i błohieraŭ. Voś što adbyłosia na heta momant, miarkujučy pa paviedamleńniach rasijskich miedyja i telehram-kanałaŭ.
11:30
Adbyłasia telefonnaja razmova Łukašenki i Pucina — Puł pieršaha
«Prezident Rasii patelefanavaŭ siońnia ranicaj prezidentu Biełarusi, adbyłasia telefonnaja razmova. Uładzimir Pucin painfarmavaŭ biełaruskaha kalehu ab situacyi ŭ Rasii», — piša TH-kanał pres-słužby Łukašenki.
11:11
Najbolšy rasijski aeradrom Milerava pad Rastovam-na-Donie pad kantrolem vahnieraŭcaŭ
«Milerava pačało lotać pa zadačach. PVK dazvoliła. Na bort skača adzin PVKšnik, kab viertalot nie palacieŭ kudy nie treba, i lacić» — infarmavany rasijski kanał @fighter_bomber.
10:20
Klučavy momant u sprobie vajskovaha pieravarotu ŭ Rasii: ci paśla zvarotu Uładzimira Pucina vahnieraŭcy spyniacca
10:12
«Udar u śpinu». Pucin vystupiŭ sa zvarotam da vajskoŭcaŭ i nasielnictva
7:35
Pryhožyn paviedamiŭ 24 červienia ŭ 7 hadzin 30 chvilin ranicy, što vahnieraŭcy zachapili štab Paŭdniovaj vajskovaj akruhi i što rasijskija samaloty praciahvajuć bambić ukraincaŭ.
Štab jany zachapili, sa słoŭ Pryhožyna, kab hetyja samaloty nie bambili vahnieraŭcaŭ.
Taksama Pryhožyn paviedamiŭ, što całkam kantraluje Rastoŭ, zabłakavany ŭsie vajskovyja abjekty i zachopleny aeradrom.
U telehram-kanałach taksama apublikavana jašče adno videa ź Jaŭhienam Pryhožynym u štabie Paŭdniovaj vajskovaj akruhi ŭ Rastovie-na-Donie (vyhladaje, što supracivu jamu nie akazali). Na hetych kadrach jon viadzie pieramovy z namieśnikam ministra abarony Junus-Biekam Jaŭkuravym.
«My siudy pryjechali. My chočam atrymać načalnika Hienštaba i Šajhu. Pakul ich niama, my znachodzimsia tut, błakujem horad Rastoŭ i idziom u Maskvu», — kaža Pryhožyn na videa.
Uzmacnieńnie siłavych struktur
Hałoŭnaje, što adbyvałasia spačatku, — heta toje, što ŭźniali pa tryvozie i pieraviali ŭ stan pavyšanaj bajavoj hatoŭnaści roznyja rasijskija siłavyja padraździaleńni, pieradusim u Maskvie i tych rehijonach, jakija blizkija da zony bajavych dziejańniaŭ va Ukrainie.
Vydańnie Astra sa spasyłkaj na svaje krynicy ŭ viedamstvie paviedamiła, što z Maskvy ŭ Biełharad vylecieŭ samalot z bajcami «Hrom» MUS Rasii. «Hrom» — heta śpiecyjalnaje padraździaleńnie rasijskaha MUS, stvoranaje dla siłavoj padtrymki śledčych i apieratyŭnych mierapryjemstvaŭ MUS i inšych «pravaachoŭnych» viedamstvaŭ.
Vydańnie Baza napisała, što ŭ šerahu adździaleńniaŭ palicyi Rastoŭskaj vobłaści abvieščany płan «Krepaść». Hety płan praduhledžvaje ekstranny zbor asabovaha składu i ŭziaćcie pad kantrol asabliva važnych abjektaŭ siłavych viedamstvaŭ. Taksama płan praduhledžvaje hatoŭnaść da adbićcia źniešniaha napadu.
Paśla infarmacyju «Bazy» ab abjaŭleńni płana «Krepaść» u Rastoŭskaj vobłaści paćvierdzili krynicy rastoŭskaha vydańnia «161.ru». Vydańnie taksama apublikavała fatahrafii braniatechniki na vulicach Rastova-na-Donie.
Akramia taho, krynica kanała «VČK-OHPU» paviedamiła, što płan «Krepaść» uviali i ŭ Maskvie. Praŭda, inšych paćviardžeńniaŭ hetaj infarmacyi nie było. Adnak krynicy vydańnia Astra śviedčyli, što maskoŭskija siłaviki nieaficyjna pryviedzienyja ŭ pavyšanuju hatoŭnaść, kiraŭnictva dało supracoŭnikam siłavych viedamstvaŭ rasparadžeńnie «ŭsim być na suviazi, nikudy nie źjazdžać».
Krynicy Ruskaj słužby Bi-bi-si danosili, što pa tryvozie padniatyja maskoŭskaja FSB i maskoŭski vajskovy harnizon.
Pavodle źviestak krynicy vydańnia z vajskovych kołaŭ, na trasie «Don» (heta daroha Maskva — Varoniež — Rastoŭ-na-Donie) FSB pry padtrymcy SACHR (śpiecyjalnych atradaŭ chutkaha reahavańnia vojskaŭ Nachvardyi) vystaŭlaje błokpasty. Tym, chto na ich dziažuryć, addajecca zahad adkryvać ahoń «u vypadku ŭźniknieńnia pahrozy». Technika pry hetym u režymie hatoŭnaści, ale zahadu ab jaje vyjeździe čaści pakul nie atrymlivali.
TASS aficyjna paviedamiŭ, što najvažniejšyja abjekty Maskvy ŭziatyja pad uzmocnienuju achovu, miery biaśpieki ŭ stalicy ŭzmocnienyja. A ŭ sacsietkach razychodziacca videa pieramiaščeńniaŭ u Maskvie broniemašyn i vajskovych hruzavikoŭ.
Reakcyja Kramla
Krynica vydańnia «Možiem objaśniť», blizkaja da Administracyi prezidenta Rasii, śćviardžaje, što «z Pryhožynym pryniata rašeńnie dziejničać pavodle samaha žorstkaha scenara».
«Toje, što adbyłosia, absalutna niedapuščalna z punktu hledžańnia AP. Pryhožyn pajšoŭ suprać vajskovaha kamandavańnia, a značyć — suprać Uładzimira Pucina. Kryminalnaja sprava ab miaciažy — heta pieršy krok, astatnija rušać uśled».
«Mieduza» piša, što jaje krynicy, blizkija da Kramla, na zajavy Pryhožyna adreahavali ŭ asnoŭnym niecenzurna. Adzin z surazmoŭcaŭ vydańnia miarkuje, što Pryhožyn «moža blefavać», a jahonyja vajaŭničyja razvahi nie pryviaduć ni da jakich realnych dziejańniaŭ: «U jaho sarvała dach. Jon robić [takija] zajavy, a ŭ sistemnaha čałavieka navat dumak takich nie pavinna źjaŭlacca».
Krynica «Važnych historyj», blizkaja da pucinskaj Administracyi kaža: «U Administracyi prezidenta panika, tam nie vyklučajuć scenaryj pačatku hramadzianskaj vajny».
Pa słovach surazmoŭcy vydańnia, u AP jašče tydzień tamu była infarmacyja, što Pryhožyn niešta rychtuje. Videa ź nibyta nastupstvami rakietnaha ŭdaru pa raźmiaščeńni PVK «Vahnier» — insceniroŭka, ličyć jon.
Adpaviedna z hetym vybudoŭvajecca infarmacyjnaja palityka. Krynicy «Možiem objaśniť» u dziaržaŭnych miedyja raspaviali pra novuju ŭstanoŭku vajennaj cenzury.
«Z nahody kanfliktu Pryhožyna ź Minabarony spuščana dyrektyva z AP: tolki aficyjnaja infarmacyja ź dziaržaŭnych krynic, nijakich cytat Pryhožyna, navat uskosnych».
Toje ž samaje daviedaŭsia sa svaich krynic i telehram-kanał «Ostorožno, novosti». Pavodle jaho, rasijskija dziaržaŭnyja miedyja atrymali «instrukcyju» ab tym, što publikavać infarmacyju ab situacyi z Pryhožynym možna vyklučna z aficyjnych viedamstvaŭ abo cytujučy słovy pieršych asob dziaržavy.
Hienieralnaja prakuratura Rasii aficyjna zajaviła, što kryminalnaja sprava suprać Jaŭhiena Pryhožyna zaviedzienaja «zakonna i abhruntavana».
U svaju čarhu, Centr hramadskich suviaziaŭ FSB Rasii adznačyŭ: «Zajavy i dziejańni Pryhožyna faktyčna jość zaklikami da pačatku ŭzbrojenaha hramadzianskaha kanfliktu na terytoryi RF».
«Sprava pa fakcie pryzyvu da miaciažu z boku Pryhožyna zaviedzienaja ŭ suviazi z surjoznaściu situacyi i pahrozaj eskałacyi, — zajavili ŭ FSB. — Usia infarmacyja ŭ sacsietkach ad imia Pryhožyna ab nibyta naniesienych Minabarony RF udarach pa tyłavych čaściach PVK «Vahnier» nie adpaviadaje rečaisnaści».
Dziejańni «pryhožyncaŭ» i sproby ich pryvieści da rozumu
Što datyčyć dziejańniaŭ samich «pryhožyncaŭ», to niekalki hadzin jany faktyčna abmiažoŭvalisia tolki vystupleńniami ŭ telehramie ich pravadyra dy vystaŭleńniem videa ź nibyta momantam udaru pa ich pazicyjach z boku čaściej Ministerstva abarony, praŭdzivaść jakoha staviłasia pad sumnieŭ.
I tolki apošnim časam stali źjaŭlacca paviedamleńni, što kałony vahnieraŭcaŭ z Łuhanskaj vobłaści Ukrainy zajechali na terytoryju Rastoŭskaj vobłaści Rasii.
«Kałona muzykantaŭ (mianuška vahnieraŭcaŭ. — «NN») jedzie praz KPP Navašachcinsk, praciahłaść kałony kala 50 km. Na KPP Vałošyna takaja ž situacyja, tolki kałona 80 km, i praciahvajuć jechać. Vajskovaja palicyja i pamiežniki nie pieraškadžajuć», — paviedamiŭ rasijski vajenkar Dontstopwar.
Da vahnieraŭcaŭ užo źviarnułasia niekalki vysokapastaŭlenych dziejačaŭ rasijskaj armii. Tak, rasijski hienierał Suravikin zaklikaŭ kamandziraŭ i bajcoŭ PVK «Vahnier» spynicca:
«My adnoj kryvi, — zajaviŭ hienierał, jakoha ličyli blizkim da Jaŭhiena Pryhožyna. — Praciŭnik tolki i čakaje, kali ŭ nas abvostrycca ŭnutrypalityčnaja abstanoŭka. Nielha hulać na ruku praciŭniku ŭ hety ciažki dla krainy čas. <…> Pakul nie pozna… Nieabchodna padparadkavacca voli i zahadu prezidenta RF. …Spynić kałony i viarnuć ich u PPD».
Taksama ŭschvalavany zvarot zapisaŭ pieršy namieśnik kiraŭnika HRU Hienštaba VS RF Alaksiejeŭ:
«Heta ŭdar u śpinu krainie i prezidentu. Vy sprabujecie zamachnucca na jaho ŭładu. Heta dziaržaŭny pieravarot.
Bolšaha ŭdaru pa Uzbrojenych siłach Rasii i jaje prestyžu być nie moža. Nam jašče brakavała tolki raźviazać hramadzianskuju vajnu ŭnutry krainy, adumajciesia!»
Padzieńnie akcyj
Upłyŭ na situacyju ciapierašnich padziej moža być nie tolki na palityčnym, ale i na ekanamičnym poli. Paśla atrymańnia pieršych viestak pra «miaciež Pryhožyna» pačali padać akcyi najbujniejšych rasijskich kampanij.
Reakcyja na inšym baku frontu
Nie pakinuła abyjakavymi razhortvańnie situacyi ŭ Rasii ludziej, jakija najbolš zacikaŭlenyja ŭ razładzie siarod rasijskich elit, tych, chto zmahajecca suprać Rasii na ŭkrainskim froncie.
Ruski dobraachvotnicki korpus, jaki apošnim časam byŭ zaŭvažany ŭ praviadzieńni dyviersij na pamiežnych z Ukrainaj terytoryjach Rasii, adhuknuŭsia nastupnym čynam: «Napružańnie ŭ vyšejšych ešałonach ułady RF rasło, sankcyi i niaŭdačy na froncie ŭzmacnili pracesy «hnijeńnia i raspadu». I voś my majem: ambicyjnaha, razzłavanaha, papularnaha ŭ narodzie i vajskovym asiarodździ patryjota, jaki vałodaje ŭłasnaj pryvatnaj armijaj; demaralizavanaje zaciahnutaj kryvavaj vajnoj nasielnictva i nievyraznuju palityčnuju ŭładu. Rychtujemsia!»
Reakcyja Ministerstva abarony Ukrainy pakul što nadzvyčaj łakaničnaja: «My nazirajem».
Całkam padtrymała takuju pazicyju i Śviatłana Cichanoŭskaja, napisaŭšy: «My taksama».
A voś połk Kalinoŭskaha na situacyju adreahavaŭ z humaram.
Łukašenkaŭskija prapahandysty taksama nie śpiać i z chvalavańniem sočać za situacyjaj u Rasii. Zrabili dla vas padborku ich vykazvańniaŭ
Sproba vajennaha pieravarotu ŭ Rasii: FSB zaviało kryminalnuju spravu ab uzbrojenym miaciažy, patrabujuć ad Pryhožyna spynić jahonyja dziejańni
Pačalisia bajavyja sutyknieńni pamiž PVK «Vahnier» i siłami Minabarony Rasii — Pryhožyn
Skandał na abłasnoj alimpijadzie pa niamieckaj movie. Dyrektar škoły, dzie vučycca pieramožca, adkazaŭ chiejtaram25
Kamientary