«Łukašenka pierajšoŭ stolki čyrvonych linij, što Kijeŭ stanovicca bolš adkrytym». Franak Viačorka pra pajezdku va Ukrainu
Hałoŭny daradca Śviatłany Cichanoŭskaj Franak Viačorka ŭ hadavinu vajny Rasii suprać Ukrainy byŭ u Kijevie razam sa svaim kaleham Anatolem Labiedźkam. Jany ŭdzielničali ŭ mižnarodnaj Jałcinskaj kanfierencyi. Sustrakalisia z ukrainskimi i jeŭrapiejskimi palitykami, a taksama z supracoŭnikami ofisa prezidenta Zialenskaha. Pieramaŭlali z kamandavańniem Pałka Kalinoŭskaha.
«Dla ŭkraincaŭ Biełaruś — kraina, ź jakoj laciać rakiety»
Franak Viačorka kaža: pieršačarhovaja meta vizitu ŭ važny dla Ukrainy dzień była ŭ tym, kab pakazać ukraincam, što Łukašenka — nie ŭsia Biełaruś. Pajezdka nie stała revalucyjnaj. Nijakich dakumientaŭ na joj nie padpisvałasia. Jana była pracoŭnaj. Z takich sustreč, pavodle Viačorki, pačynajucca vialikija spravy.
«U nas składanyja adnosiny z Ukrainaj. Biełaruś akazałasia i suahresaram, i zakładnikam. Treba vyraŭnoŭvać ukrainskuju hramadskuju dumku adnosna Biełarusi», — davodzić jon.
Viačorka kanstatuje, što ŭkrainskaje hramadstva ŭsprymaje biełarusaŭ niehatyŭna praź dziejańni Łukašenki. Biełaruś dla ŭkraincaŭ — kraina, ź jakoj laciać rakiety.
Pavodle daradcy Cichanoŭskaj, kali na ŭzroŭni elitaŭ udałosia patłumačyć i vybudavać davier, to z hramadstvam treba pracavać usim: biełaruskaj dyjaspary, demakratyčnym siłam, dobraachvotnikam.
Viačorka spadziajecca, što nastupnyja vizity buduć pryśviečanyja pracy z šyrokaj ukrainskaj hramadskaściu.
«Kali ŭ bolšaści ŭkraincaŭ staŭleńnie da Biełarusi budzie pazityŭnym i jany buduć raździalać Łukašenku dy prostych biełarusaŭ, to nie budzie nijakaj prablemy ŭ kamunikacyi.
Ciapier ža palityki adčuvajuć, što staŭleńnie da biełarusaŭ niehatyŭnaje, tamu mohuć paźbiahać takich sustreč, kab nie zhubić padtrymku ŭnutry ŭkrainskaha hramadstva», — tłumačyć Viačorka.
Va ŭkrainskaj palitycy šmat intaresaŭ, jakija kankurujuć pamiž saboj.
Pavodle słovaŭ Viačorki, Biełaruś i supraca z demakratyčnymi siłami nie ŭ pryjarytecie miascovych palitykaŭ. Razumieńnie, što takoje ciapierašniaja Biełaruś, čym jana žyvie i žyła, u ich paviarchoŭnaje.
«Ščylnaj kamunikacyi z demakratyčnymi siłami ŭ ich nie było nikoli, skažam ščyra, — adznačaje daradca Cichanoŭskaj. — Ale, majo adčuvańnie, što jany ŭsio ž razumiejuć, čym demakratyčnaja Biełaruś moža być karysnaj».
Adnoj z zadač pajezdki było pašyreńnie hrupy siabroŭ Biełarusi ŭ Viarchoŭnaj radzie, kab tam byli pradstaŭlenyja ŭsie partyi. Z ukrainskimi palitykami abhavorvaŭsia płan pa stratehičnym dyjałohu, jaki jość z ZŠA, Jeŭrasajuzam, Savietam Jeŭropy.
«Niemahčyma niedaaceńvać vahu Ukrainy»
Viačorka kaža, što dla ofisa Cichanoŭskaj važna naładzić adnosiny z usimi krainami, jakija bačać Biełaruś demakratyčnaj i niezaležnaj. Biez padtrymki Ukrainy zrabić u Biełarusi pieramieny i vyvieści jaje z rasijskaj arbity budzie nadzvyčajna ciažka.
«Ukraina stała vialikim hieapalityčnym aktaram. Jak buduć usprymajuć Biełaruś ciapier i ŭ budučyni, u vialikaj stupieni zaležyć ad Ukrainy. Niemahčyma niedaaceńvać vahu Ukrainy», — adznačaje Viačorka.
Jon nastojvaje, što dobryja adnosiny z Kijevam u intaresach biełaruskaha narodu i Ofis budzie padtrymlivać Ukrainu nakolki moža niezaležna ad taho, jak buduć hetyja adnosiny raźvivacca.
Pieramoha Ukrainy — šaniec dla pieramienaŭ u Biełarusi.
«My razumiejem, čamu Kijeŭ dystancyjujecca ad kantaktaŭ z demakratyčnymi siłami, — kaža Viačorka. — Da vajny jany staralisia zachoŭvać niejtralna-chałodnyja adnosiny z Łukašenkam, ale praciahvali handlavać, bo było zrazumieła, što Ukraina vajuje. Kali vajna pačałasia, Kijeŭ nie chacieŭ pravakavać Łukašenku na adkryćcio druhoha frontu i na ŭdzieł biełaruskich vojskaŭ u vajnie».
Ciapier ža, pavodle jaho, Łukašenka pierajšoŭ stolki čyrvonych linij, što Kijeŭ stanovicca bolš adkrytym dla publičnaj supracy z demakratyčnymi siłami.
Ofis Cichanoŭskaj hatovy pracavać z Kijevam u baraćbie z łukašenkaŭskaj i rasijskaj prapahandaj, abmieńvacca infarmacyjaj, uzajemadziejničać u padtrymcy partyzanskaha ruchu, biełaruskich dobraachvotnikaŭ i dyjaspary. Heta dziasiatki tysiač ludziej.
«Mnohija žyvuć šmat hadoŭ va Ukrainie, a dobraachvotniki vajujuć za jaje. Treba razam šukać šlachi, jak ich padtrymlivać. Pakul u Kijeva niama vyraznaha razumieńnia, jak stavicca da ŭsiaho hetaha. Połk Kalinoŭskaha padtrymlivajecca, ale, naprykład, vypłaty dobraachvotnikam abmiežavanyja, jość pytańni ŭ lehalizacyi», — adznačaje Viačorka.
Jon kaža, što nieabchodnyja zachady, kab biełaruskija dobraachvotniki mieli roŭnyja pravy z ukrainskimi vajskoŭcami. Dla hetaha kalinoŭcy niamała robiać, ale hetaha niedastatkova, kab prablemu zrušyć ź miesca.
Pavodle jaho słoŭ, nieabchodnaja supraca z Ukrainaj na mižnarodnaj arenie, kab razam pryciahvać uvahu da našaha rehijona i supolnaj baraćby. Raźvivać kulturna-aśvietnickaje supracoŭnictva, kab hramadstvy daviedvalisia bolš adno pra adnaho.
«Kab nie było takoj situacyi, jak sa ściaham u Krakavie. Kali ŭkraincy nie zachacieli bačyć biełaruski ściah, nie razumiejučy roźnicy miž bieł-čyrvona-biełym i čyrvona-zialonym», — ilustruje prykładam prablemu Viačorka.
«Padalak kazaŭ, što jość dźvie Biełarusi…»
Pradstaŭniki Ofisa Cichanoŭskaj sustrelisia z daradcam kiraŭnika Ofisa prezidenta Michaiłam Padalakom. Viačorka cenić jaho za toje, što jon robić u administracyi Zialenskaha.
Padalak blizki da kiraŭnika krainy i ŭpłyvaje na pazicyju prezidenta, adznačaje daradca Cichanoŭskaj. Jamu padałosia, što rytoryka Padalaka pra biełarusaŭ na sustrečach była ščyraj.
Padalak kazaŭ, što jość dźvie Biełarusi: zachoplenaja Rasijaj łukašenkaŭskaja — i jana varožaja — i demakratyčnaja, ź jakoj treba pracavać.
Kazaŭ mocna i vyrazna, što budučynia Biełarusi ŭ Jeŭrasajuzie, zaŭvažaje Viačorka.
«I pra toje jon kazaŭ u prysutnaści inšych palitykaŭ, deputataŭ, zamiežnikaŭ. Hetaha my časam dabivajemsia ad zachodnich palitykaŭ, a jon kazaŭ nie saromiejučysia, adkryta, naŭprost. Było pryjemna čuć. Dumaju, što jon nasamreč tak i dumaje», — adznačaje daradca Cichanoŭskaj.
«Supraca Ofisa i Pałka važnaja, bo ŭ biełarusaŭ jość zapyt na adzinstva»
Pavodle Viačorki, niervovaj była sustreča z kiraŭnictvam Pałka Kalinoŭskaha.
U strymie Jeŭraradyjo jon pryznaŭ, što adnosiny miž Ofisam i kalinoŭcami nie idealnyja. Jość niedavier. Viačorka kazaŭ, što na sustrečy «trochu pasvarylisia, pamirylisia» i abhavaryli dalejšyja kroki.
U hutarcy z «Našaj Nivaj» jon adznačyŭ, što, na jaho pohlad, u bakoŭ jość supolnaje razumieńnie: što isnuje palityčnaje kryło, dzie Śviatłana Cichanoŭskaja — biezumoŭny lidar i pradstaŭnik biełarusaŭ. A taksama jość vajennaje kryło, dzie lidar — Połk Kalinoŭskaha.
«My robim adnu spravu. Zmahajemsia za adnu Biełaruś», — kaža Viačorka.
Połk nie partyjnaja adzinka, a vialikaja struktura, dzie sabralisia ludzi z roznymi pohladami. Tamu adnosiny mohuć być składanyja. Akramia jak kamunikavańniem i supracaj, prablemy nie vyrašyš, zaŭvažaje jon.
Kali jość asabistyja kryŭdy, to ich treba vyrašać na asabistym uzroŭni, prahavorvajučy prablemu.
«Takija sustrečy, — havoryć Viačorka, — patrebnyja, kab vyhavarycca, kab nie było plotak i intryh. Tady spakajniej, možna vydychnuć i pracavać».
Viačorka kaža, što Pałku nie chapaje padtrymki. Ofis budzie zaklikać biełarusaŭ danacić dobraachvotnikam i zapisvacca ŭ Połk.
Daradca Cichanoŭskaj kaža, što supraca Ofisa i Pałka važnaja dla biełarusaŭ, bo jość zapyt na adzinstva.
Biełarusy chočuć bačyć parazumieńnie, bo stamilisia ad kanfliktaŭ.
Pa słovach Viačorki, nichto nie spračajecca ź lidarskaj rolaj Pałka Kalinoŭskaha, ale nie zabytyja i inšyja dobraachvotnickija abjadnańni, jakija taksama pavinny być dałučanyja da supracoŭnictva.
«Zdajecca, my pieraraśli čas, kab niešta dzialić», — adznačaje jon.
— Nas nie tak šmat i my nie takija mahutnyja, kab svarycca i raskołvacca. Nadyšoŭ momant abjadnoŭvacca, sinchranizavacca. Šmat krokaŭ zroblena. Važnym krokam da abjadnańnia stała kanfierencyja kalinoŭcaŭ u Kijevie».
Pavodle jaho słovaŭ, zadača dla Śviatłany Cichanoŭskaj jak nacyjanalnaj lidarki razmaŭlać z usimi i abjadnoŭvać biełarusaŭ niezaležna ad ich palityčnych pohladaŭ.
Uzajemadziejańnie ŭsich centraŭ palityčnaha, vajskovaha, hramadskaha i kulturnickaha žyćcia važna bačyć zamiežnym partnioram.
U nastupny vizit zapłanavanaja sustreča ź biełaruskaj dyjasparaj Ukrainy, abiacaje Viačorka. Na paradku dnia vyrašeńnia prablemaŭ z praterminavanymi pašpartami, razbłakavańnie bankaŭskich rachunkaŭ i raźviazańnie pytańniaŭ z patrabavańniem apastylaŭ.
«Naša Niva» — bastyjon biełaruščyny
PADTRYMAĆHladzicie taksama:
«Ja čakaŭ, što Biełaruś blizkaja pa duchu z Rasijaj, ale zrazumieŭ, što pamylaŭsia» — Kšyštaf Zanusi
Vajenny ekśpiert: Rasija rychtujecca da vialikaj suśvietnaj vajny, daty vyznačanyja
«Adčyniajem dźviery, a tam terabarona». Pasoł Polščy raskazaŭ pra pieršyja vajennyja tydni ŭ Kijevie
Aktyvisty, žurnalisty, palityki, dobraachvotniki. Kaho ź biełarusaŭ abviaścili ŭ vyšuk u Rasi
-
U Minsku praź jaŭrejskija mohiłki prakłali tranšeju. Ź ziamli vyciahnuli mnostva nadmahillaŭ
-
Stała viadoma, za što buduć sudzić pieršaha namieśnika načalnika Kiraŭnictva spravami Łukašenki
-
«Jašče ŭ škole damovilisia, što kali da 30 nie zaviadziem siemji, to paženimsia». Historyi biełaruskich par, jakija paznajomilisia padčas vučoby
Stała viadoma, za što buduć sudzić pieršaha namieśnika načalnika Kiraŭnictva spravami Łukašenki1
Kamientary
Voś i sunuć jany svaje sytyja rylcy ŭsiudy, kudy mahčyma.
Pryncessa čakaje zaprašeńnia Zialenskaha, tamu i vysłała na sustreču svaich prydvarovych daradcaŭ z Khb.
Nie tolki praź dziejańni Łukašenki, ale i praź dziejańni niekatorych prarasiejskich dziejačoŭ, jakija ŭ apazicyi da Łukašenki.
Aliharch Parašenka ź vienhierskich devidentaŭ padkinuŭ trochi Natachie Radzinaj na Chartyju, mabyć i Śviecie daść na novaje modnaje adzieńnie.