ZŠA buduć adkazvać za abaronu Polščy, Hiermanija — Litvy, Kanada — Łatvii. Staŭ viadomy płan NATA
U čym jon zaklučajecca i nakolki realny?
Jak piša The Wall Street Journal, pahroza sutyknieńnia z Rasijaj prymusiła NATA raspracavać płan sumiesnych dziejańniaŭ. Upieršyniu z časoŭ chałodnaj vajny padrychtoŭka da kaalicyjnych vojnaŭ stała pryjarytetam aljansu, i ŭpieršyniu za apošnija dziesiacihodździ jeŭrapiejskija členy NATA całkam vykanali svaje finansavyja abaviazki. Adbyłosia taksama pašyreńnie błoku za košt dałučeńnia Finlandyi i Šviecyi.
Ciapier meta NATA — padrychtoŭka sajuźnikaŭ da boju plačo ŭ plačo. Ab hetym śviedčać samyja bujnyja z 1988 hoda vajskovyja vučeńni Steadfast Defender, jakija pravodziacca na praciahu čatyroch miesiacaŭ na terytoryi ad Paŭnočnaha palarnaha kruha da Čornaha mora. U ich zadziejničana 90 tysiač vajskoŭcaŭ, 1100 bajavych mašyn, 80 samalotaŭ i 50 sudnaŭ.
Jašče ŭ 2016 hodzie paśla zachopu Rasijaj Krymu i padziej na ŭschodzie Ukrainy členy NATA damovilisia pra pastajannuju ratacyju vojskaŭ pamiž krainami błoku, što znachodziacca ŭzdoŭž uschodniaj miažy aljansu i źjaŭlajucca najbolš uraźlivymi.
Adpaviedna płanu, abaronu kožnaj takoj krainy ŭznačalvaje adna kraina-siabar, a astatnija akazvajuć joj padtrymku. Tak, ZŠA ŭznačalili inicyjatyvu pa abaronie Polščy, Hiermanija — Litvy, Vialikabrytanija — Estonii, Kanada — Łatvii.
Paśla pačatku vajennaha kanfliktu ŭ lutym 2022 hoda NATA ŭzmacniła svaje siły ŭ hetych krainach i dadała partniorstvy ŭ Słavakii, Vienhryi, Rumynii i Bałharyi.
Abaronu Słavakii maje ŭznačalvać Čechija, Rumynii — Francyja, Bałharyi — Italija.
Ciapier partniorskija adnosiny, jak adznačaje vydańnie, źviazvajuć sajuźnikaŭ ciaśniej, čym kali-niebudź da hetaha z časoŭ chałodnaj vajny, kali ZŠA, Vialikabrytanija i Francyja trymali vojski na pastajannaj asnovie ŭ Zachodniaj Hiermanii.
U toj ža čas unutry NATA viadziecca šmat sprečak. Lidary razychodziacca ŭ mierkavańniach adnosna dazvołu Ukrainie i inšym pretendentam ustupić u aljans. Abvastreńnie pamiž daŭnimi siabrami NATA i novymi členami z byłoha ŭschodniaha błoka vyklikaŭ konkurs na post pierajemnika Jensa Stołtenbierha ŭ kancy hetaha hoda.
Akramia hetaha, šmat krain NATA (ź ich šeść z dvanaccaci zasnavalnikaŭ błoku), usio jašče dalokija ad dasiahnieńnia patrabavanaha ŭzroŭniu vajskovaha biudžetu ŭ 2 % ad VUP. Heta vyklikała napadki z boku Donalda Trampa i sumnievy ŭ budučyni aljansu ŭ vypadku pieramohi apošniaha na prezidenckich vybarach u ZŠA ŭ listapadzie hetaha hoda.
Adnym z samych surjoznych roznahałośsiaŭ u aljansie źjaŭlajecca adroźnieńnie ŭ pohladach krain-členaŭ na pahrozy. NATA nazyvaje teraryzm i Rasiju svaimi hałoŭnymi pahrozami. Ale mnohija čynoŭniki ŭ Turcyi i inšych krainach — siabroŭkach aljansu, raźmieščanych uzdoŭž Mižziemnaha mora, bolš turbujucca pra rehijanalnyja kanflikty, nielehalnuju mihracyju i teraryzm, čym pra Rasiju.
Sumiesnyja vučeńni NATA vyjavili prablemy, jakija pieraškadžajuć efiektyŭnamu ŭzajemadziejańniu. Siarod ich — moŭny barjer. Uzrovień vałodańnia vajskoŭcami anhlijskaj i francuzskaj — aficyjnymi movami NATA, vielmi rozny.
Vyklikam źjaŭlajecca i adsutnaść adzinstva va ŭzbrajeńni. Kožnaja kraina maje svaju vajskovuju techniku, dla jakoj patrabujucca admysłovyja zapčastki i techničnaje absłuhoŭvańnie. Standartyzacyja techniki, jak adznačaje vydańnie, składanaja zadača, bo jaje vytvorčaść — prybytkovy biznes, ad jakoha mała chto hatovy admaŭlacca.
U ZŠA naličvajecca kala troch dziasiatkaŭ asnoŭnych vajskovych sistem, u Jeŭropie členy aljansu vykarystoŭvajuć 172 madeli roznaj zbroi.
Jašče adna prablema, na jakuju źviarnuŭ uvahu kamandujučy abaronnymi siłami padčas vučeńniaŭ na terytoryi Łatvii, kanadski padpałkoŭnik Koks (Cox) — heta racyi, jakija ŭ bolšaści nie ŭzajemaspałučalnyja, chacia šmat hadoŭ viaducca pracy pa zabieśpiačeńni sumiaščalnaści abaronienych palavych radyjostancyj z roznych krain. Hetaja prablema paharšajecca nieabchodnaściu ličbavaha šyfravańnia i mier pa supraćdziejańni radyjoelektronnaj baraćbie.
Paśla chałodnaj vajny takija techničnyja adroźnieńni nie mieli vialikaha značeńnia, pakolki vojski NATA z roznych krain redka vajavali pobač na adnym teatry vajennych dziejańniaŭ. Ciapier ža im nieabchodna mieć mahčymaść abmieńvacca abstalavańniem i dabicca, kab artyleryja adnoj armii mahła stralać snaradami inšaj.
Na pošuk šlachoŭ pieraadoleńnia adroźnieńniaŭ i nakiravanyja takija vučeńni, jak Steadfast Defender.
Kamientary
nu ŭsio - byvaj Kłajpieda?)