MZS Łatvii płanuje abmiežavać pryjom zajaŭ na vizu dla hramadzian Biełarusi
Praduhledžvajecca ŭvieści abmiežavańni na padaču vizavych zajaŭ i ŭjezd u Łatviju dla hramadzian Rasii i Biełarusi, havorycca ŭ anatacyi da prajekta pravavoha akta, padrychtavanaha Ministerstvam zamiežnych spraŭ, paviedamlaje Delfi.lv sa spasyłkaj na ahienctva LETA.
U anatacyi da prajekta tłumačycca, što «z momantu poŭnamaštabnaha ŭvarvańnia Rasii va Ukrainu, jakoje taksama padtrymlivaje biełaruski režym, raźviedvalnyja i hibrydnyja pahrozy ŭ rehijonie značna ŭzraśli».
«Kab praduchilić ujezd u Łatviju zamiežnikaŭ abo inšych asob, jakija niasuć ryzyku i mohuć być źviazanyja sa słužbami raźviedki i biaśpieki Rasii, ź lutaha 2022 hoda ŭ Łatvii nie tolki ŭzmocnieny mihracyjny kantrol i praviadzieńnie roznych pravierak, ale i ŭviedzieny dadatkovyja miery, što abmiažoŭvajuć ujezd u krainu», — havorycca ŭ dakumiencie.
Pastanovy Kabmina, pryniatyja try hady tamu, uvodzili abmiežavańni na ŭjezd dla hramadzian Rasii, a taksama praduhledžvali, što hramadzianie RF i RB, jakim vydajecca viza abo vid na žycharstva, pavinny prajści dadatkovuju pravierku, kab acanić, ci nie źjaŭlajecca ich ujezd pahrozaj nacyjanalnaj biaśpiecy abo hramadskamu paradku.
Rasparadžeńnie Kabmina ab dadatkovych pravierkach dla hramadzian RF i RB dziejničaje da 5 sakavika 2025 hoda.
«Nadalej, z metaj praduchileńnia pahroz hramadskamu paradku, mižnarodnym adnosinam i ŭnutranaj biaśpiecy Łatvii, jakija źviazanyja ź dziejańniami suprać nacyjanalnaj niezaležnaści, suvierenitetu, terytaryjalnaj cełasnaści, dziaržaŭnaj ułady abo demakratyčnaha ładu Łatvijskaj Respubliki», u prajekcie pravavoha akta płanujecca ŭdakładnić abmiežavańni, źviazanyja z pryjomam zajaŭ na atrymańnie vizy i pierasiačeńniem źniešniaj miažy Łatvii.
Biełaruska nie znajšła siabie ŭ śpisie vypusknikoŭ škoły — ličyć, što praz palityčnyja pohlady1
Kamientary