Pierad pryjezdam Łukašenki ŭ Pakistan tam zabaranili ahulnanacyjanalny marš apazicyi. Tysiačy zatrymanych
Ahulnanacyjanalny marš apazicyi z usich kutkoŭ Pakistana na stalicu krainy Isłamabad rušyŭ u niadzielu, a da punktu pryznačeńnia pavinien pryjści ŭ paniadziełak ranicaj. U hety ž samy čas u krainu prylataje Łukašenka, čyj vizit byŭ vykarystany pakistanskimi ŭładami ŭ jakaści adnoj z pryčyn dla masavych aryštaŭ i ŭviadzieńnia biesprecedentnych mieraŭ pa abaronie stalicy.
U Pakistanie sotni tysiač prychilnikaŭ byłoha premjer-ministra krainy Imrana Chana, jaki ciapier znachodzicca ŭ turmie, pa jahonym zakliku raspačali dniom u niadzielu ahulnanacyjanalny marš apazicyi na pakistanskuju stalicu Isłamabad z usich kutkoŭ krainy, patrabujučy vyzvaleńnia ich lidara i adstaŭki dziejnaha ŭrada.
Apazicyjnaje šeście sustreła žorstkuju reakcyju z boku pakistanskich uładaŭ, jakija mabilizavali siłavikoŭ i vajskoŭcaŭ, adklučyli mabilny internet u zonach šeścia pratestoŭcaŭ, a taksama zabłakavali stalicu z usich bakoŭ, pierakryŭšy klučavyja darohi na ŭjeździe ŭ horad transpartnymi kantejnierami.
Pa źviestkach indyjskaha telekanała News18, ułady Pakistana praviali maštabnyja aryšty siarod členaŭ i aktyvistaŭ bujnoj apazicyjnaj Partyi spraviadlivaści (PTI), jakoj kiruje Imran Chan. Na dadzieny momant viadoma pra zatrymańnie jak minimum 4 tysiač pratestoŭcaŭ pa ŭsioj krainie (siarod aryštavanych jość i parłamientaryi). Adnak da maršu praciahvajuć dałučacca ludzi z rehijonaŭ i jon praciahvaje iści na stalicu.
Partyja spraviadlivaści (PTI) pa vynikach parłamienckich vybaraŭ u lutym 2024 hoda nabrała najbolšuju kolkaść miescaŭ (92) u Nacyjanalnaj asamblei Pakistana (nižniaja pałata parłamienta) praz padtrymku niezaležnych kandydataŭ, bo samoj partyi byŭ zabaronieny ŭdzieł u vybarach uładami Pakistana. Pavodle apošnich sacyjałahičnych apytańniaŭ, PTI padtrymlivajuć 35% nasielnictva (kala 85 miljonaŭ čałaviek), a sama partyja maje siabroŭskija znosiny z krainami Zachadu.
U samy razhar hetych padziej u Pakistan prylataje Alaksandr Łukašenka — palityk apyniecca ŭ Isłamabadzie ŭ paniadziełak, kali asnoŭny marš pratestoŭcaŭ dojdzie da stalicy, i, pa infarmacyi pakistanskaha vydańnia Arab News Pakistan, źbirajecca pravieści ŭ krainie try dni.
Hety źbieh abstavin byŭ vykarystany pakistanskimi ŭładami ŭ jakaści adnoj z pryčyn zabarony ahulnanacyjanalnaha maršu apazicyi i masavych aryštaŭ.
Źviartajučysia da suśvietnych i miascovych ŚMI ŭ Isłamabadzie, ministr unutranych spraŭ krainy Mochsin Nakvi raskrytykavaŭ dziejańni Partyi spraviadlivaści (PTI) napiaredadni trochdzionnaha vizitu Alaksandra Łukašenki, padčas jakoha płanujecca abmierkavańnie dvuchbakovaha ekanamičnaha supracoŭnictva.
«Padčas pryjezdu zamiežnych haściej parušeńni paradku niedapuščalnyja ni pry jakich abstavinach. Luboha, chto raspaŭsiudžvaje chaos, buduć aryštoŭvać», cytuje ministra Arab News Pakistan.
Rychtavać vizit Łukašenki pryniałasia vialikaja delehacyja ź Biełarusi na čale ź ministram zamiežnych spraŭ Maksimam Ryžankovym, jakaja prybyła ŭ Isłamabad u niadzielu. Jak paviedamlaje vydańnie Republic World, metaj vizitu delehacyi taksama źjaŭlajecca ŭmacavańnie dvuchbakovych suviaziaŭ, asabliva ŭ ekanamičnaj i pramysłovaj śfierach.
On the eve of the visit of the President of Belarus, a Ministerial delegation led by Foreign Minister Maxim Ryzhenkov has arrived in Islamabad. It was welcomed by Interior Minister Mohsin Naqvi, Addl Foreign Secretary Amb. Shafqat Ali Khan & Ambassador to Belarus, Sajjad Khan. pic.twitter.com/8dRplnpF21
«Maja pamyłka, što zapisvaju videa». Čym skončylisia rezanansnyja zvaroty da Łukašenki?7
Kamientary