U Biełarusi razharajecca valutny kryzis — repartaž rasijskaha Pieršaha kanała

Viečaram 24 krasavika rasijski Pieršy kanał pakazaŭ siužet pra situacyju z adsutnaściu valuty ŭ abmiennych punktach.

Na hetym tydni čerhi da abmiennych punktaŭ tak razraślisia, što ŭ ich pačalisia bojki, što pryznała Ministerstva ŭnutranych spravaŭ respubliki, zajaviŭšy, što vymušanaje nadavać asablivuju ŭvahu achovie paradku kala punktaŭ abmienu valuty.

Aficyjnyja biełaruskija ŭłady zapeŭnivajuć, što ažyjataž stvarajecca štučna i panika na rynkach Biełarusi nie maje pad saboj ekanamičnych padstavaŭ.

Natoŭp šturmuje adkryty ranicaj minski handlovy centr, u jakim pracuje abmienny punkt. Z takim zapałam ludzi imknucca pazbavicca ad biełaruskaha rubla. U honcy za valutaj hałoŭnaje — pieršym paśpieć da kasy.

Šmat chto na hetaj dystancyi ŭspomniŭ siabie ŭ pačatku 90-ch. Tak užo było 20 hadoŭ tamu. Historyja paŭtarajecca i siońnia — z toj tolki roźnicaj, što ludzi sprabujuć nie atavaryć charčovyja kartki, a kupić u biełaruskich abmieńnikach lubuju valutu. Užo niekalki tydniaŭ mnohija abmiennyja punkty biełaruskich bankaŭ pracujuć u adnabakovym režymie — valutu tolki kuplajuć.

Ciapier kala abmiennych punktaŭ dziažurać tyja, chto hatovy pierapłacić i pierakupić dalary, jeŭra i rasijskija rubli ŭ tych, chto pryniasie valutu ŭ abmieńnik. Kab kupić, naprykład, sto dalaraŭ z ruk, ludziam davodzicca raspačynać bojki. Stajać u čerhach i dniom, i nočču.

Ludzi kažuć, što čarhu pačynajuć zajmać adrazu paśla zakryćcia abmiennych punktaŭ uviečary.

«Naš narod taki bajaźlivy, usiaho jon baicca, nu čamu my takija, słuchajcie, ja pryjšła kupić 100 dalaraŭ ci navat rasijskich rubloŭ, mnie treba pajechać, i čamu ja pavinna chavacca?», — kaža žycharka Biełarusi.

Mnohija tut zakryvajuć svaje tvary. Bajučysia milicyi, jakaja paluje na tych, chto ažyćciaŭlaje «niezakonnyja valutnyja apieracyi», praściej kažučy, pradaje i kuplaje z ruk. Tyja, chto straciŭ nadzieju kupić valutu, sprabujučy pazbavicca ad biełaruskich rubloŭ, pačali skuplać litaralna ŭsio. Spačatku zapaślisia žetonami ŭ mietro, čakajučy padaražeńnia. Na ich prodaž navat daviałosia ŭvieści abmiežavańni. Kali žetony padaraželi, ludzi pačali skuplać bienzin. Na zapraŭkach dniom i nočču aŭtamabilisty zapaŭniali i baki, i kanistry nakolki mažliva. Bienzin padaražeŭ na 10%. Zahadzia zapasajucca ciapier cukram, alejem i krupami. Pakul biez abmiežavańniaŭ. Ceny na pradukty charčavańnia taksama ŭžo vyraśli ŭ siarednim na 30%. Paśla doŭhaha maŭčańnia Łukašenka ŭsio ž pačaŭ kazać pra prablemy ŭ ekanomicy. Jak zaŭsiody, chutka znajšoŭšy vinavatych.

«Viadoma, nas vielmi mocna padkasiŭ voś hety ažyjataž z aŭtamabilami. My pahladzieli, tam bolš za miljard. Byli navat prapanovy ŭvieści hetuju pošlinu, nie čakajučy», — skazaŭ Alaksandr Łukašenka.

Jon maje na ŭvazie — zapłanavanaje pavyšeńnie pošlin na patrymanyja inšamarki. Pierahonščyki i praŭda pracujuć ciapier niaspynna, na miažy ź Litvoj kiłamietrovyja čerhi.

Mienavita kupla patrymanych niamieckich aŭtamabilaŭ, jak śćviardžaje Łukašenka, abrynuła valutny rynak.

ekanomika nie vytrymała vykanańnia pieradvybarčych abiacańniaŭ Alaksandra Łukašenki.

Pa słovach ekanamista Leanida Zaiki, «pryčyny abiasceńvańnia biełaruskaha rubla bolš surjoznyja, jany zakapanyja ŭ tym, što ŭvieś čas defarmavalisia makraekanamičnyja praporcyi». «Voś, da prykładu, VUP raście na 7%, a zarabotnaja płata raście na 12. Za heta za savieckim časam pasyłali ambasadarami ŭ Zambiju abo ŭ Burundzi», — dadaŭ ekanamist.

Pavieličeńnie zarabotnaj płaty nasupierak usim zakonam ekanomiki ŭ minułym hodzie adbyvałasia pastajanna. I da kanca hoda pierad vybarami pavyšeńnie dasiahnuła 30%.

Prezident Biełarusi, jak moh tady, demanstravaŭ dabrabyt krainy — navat paziravaŭ na załatych źlitkach razam z synam Kolem, pakazvajučy zapasy krainy.

«Zołata, jakoje tam pakazanaje na ekranie, — heta techničnaje zołata, nie tyja samyja źlitki, dzie pišuć „9999“. Heta techničnaje zołata — zdarovyja hetyja špały. Ale heta dla naroda bahaćcie — my bahataja kraina, nasamreč niama nijakich zołatavalutnych resursaŭ» , — kaža palitołah Andrej Suzdalcaŭ.

Niama resursaŭ, zatoje jość abaviazki. Zamiežny doŭh užo vyras da 52% ad VUP Biełarusi, kažuć ekśpierty. Heta amal 25 miljardaŭ dalaraŭ. Kraina ŭvieś čas žyła za košt adnych kredytaŭ. U asnoŭnym z Rasii.

Ladovyja pałacy, śvinakompleksy i šklanaja biblijateka, jakoj tak hanarycca «prezident» Biełarusi, pabudavanyja za čužy košt, śćviardžajuć analityki.

«Valuty nie apynułasia na mižbankaŭskim rynku. Nacyjanalny bank Biełarusi vyrašyŭ reziervavać valutu pa 30 dzion. Pierapynilisia kantrakty na pastaŭku kamplektujučych, syraviny dla biełaruskaj vytvorčaści. U hetaj situacyi pačali spyniacca pradpryjemstvy — ciapier, dapuścim, składana kupić mietał, tamu što jon kuplajecca za valutu», — skazaŭ palitołah Andrej Suzdalcaŭ.

Toje, jak raźvivajecca situacyja siońnia, užo ŭ niedalokaj budučyni pryviadzie da taho, što spyniacca ŭsie pradpryjemstvy, prahnazujuć ekanamisty. Jak by Alaksandr Łukašenka ni patrabavaŭ vyrablać bolš i chutčej, vyratavać «biełaruski ekanamičny cud» moža tolki novy cud. I heta, zdajecca, razumieje ciapier i «prezident» Biełarusi.

«Mnie zdajecca, što ŭsio-tki nafta ŭ nas jość. Ale kali jość nafta, nie moža być, kab nie prarvała dzieści pryrodnym hazam, ja spadziajusia. Viadoma, ja śpiecyjalistaŭ tarmasiŭ, kab jany pahladzieli, što tam u nas jość» , — skazaŭ Alaksandr Łukašenka.

Pakul naftu znajści nie ŭdałosia, dla vychadu z kryzisu Minsku nieabchodnyja novyja kredyty. Pryčym, pavodle acenak ekśpiertaŭ, štomiesiac dla apietytaŭ krainy patrabujecca paŭtara miljarda dalaraŭ. Heta značyć u hod kala 18 miljardaŭ. Hetaha niama. I ludzi ciapier imknucca nazapasić nie tolki luboj valuty, ale i praduktaŭ, i bienzinu, rychtujučysia da horšaha.

• 0
• 0
• 0
• 0
• 0
• 0
• 0
• 0