Партугальскі журналіст назваў Крышціяну Раналду карысным ідыётам на службе адной з найгоршых дыктатур у свеце
Партугалец Энрыке Рапоза, аглядальнік Expresso і былы рэдактар часопіса Atlantico, падзяліўся меркаваннем пра трансфер Крышціяну Раналду ў «Аль-Наср» у Саудаўскай Аравіі, піша «Трыбуна».
«Праблема пачынаецца з Раналду, які стаў карысным ідыётам для адной з найгоршых у свеце дыктатур і адкрыў для іншых гульцоў магчымасць стаць карыснымі ідыётамі для дыктатуры, якая спрабуе сябе легітымізаваць.
Там ёсць такі чалавек, як Мухамед ібн Салман Аль Сауд (прэм'ер-міністр Саудаўскай Аравіі), які адбірае паўнамоцтвы ў мясцовых улад і ператварае Саудаўскую Аравію ў своеасаблівую цэнтралізаваную дыктатуру еўрапейскага тыпу. У абмен на гэта ён даў некаторыя правы жанчынам, але цяпер ён іх даў, а праз некалькі гадоў можа забраць, калі захоча.
І крыху сумна бачыць, як футбалісты — зоркі, сімвалы, прыклад для дзяцей па ўсім свеце — ператвараюцца ў карысных ідыётаў для дыктатуры. Ёсць гульцы, якія зарабляюць у Еўропе чыстымі 5, 6, 10 млн еўра, а там ім прапануюць 50, 60, 70…
Паглядзіце, што ў Еўропе адбываецца з моладдзю — яна ў роспачы. У рабочага класа няма працы. Проста паглядзіце на адчай людзей у Францыі. І трохі сюррэалістычна абмяркоўваць футбаліста, які зарабляе 60 мільёнаў, на фоне мільёнаў маладых людзей, якія аказаліся ў бязвыхадным становішчы», — заявіў Рапоза.
Нагадаем, што Крышціяну Раналду перайшоў у «Аль-Наср» у снежні 2022 года пасля двух дзесяцігоддзяў зорнай кар'еры ў партугальскім «Спортынгу» (2002—2003), «Манчэстэр Юнайтэд» (2003—2009, 2021—2022), «Рэале» (2009—2018) і «Ювентусе» (2018—2021). Паведамлялася, што ў Саудаўскай Аравіі ён заробіць 200 мільёнаў еўра.
Таксама ў Саудаўскую Аравію перабраліся Карым Бензема («Рэал») і Н'Гало Кантэ («Чэлсі»).
Таксама сёння з'явілася інфармацыя, што адзін з саудаўскіх клубаў прапануе 30 мільёнаў еўра 45-гадоваму італьянскаму галкіперу Джанлуіджы Буфону, які пасля зорнай кар'еры ў «Ювентусе» і двух сезонаў у ПСЖ, вярнуўся ў «Парму» (Серыя Б), дзе пачынаў кар'еру.
У той жа час Ліянэль Месі і Лука Модрыч адмовіліся пераходзіць у аравійскія клубы. Месі будзе гуляць за «Інтэр» з Маямі, а 37-гадовы Модрыч яшчэ на год працягнуў кантракт з «Рэалам».
Паўлу Вабішчэвічу, якога абвінавацілі нібыта ў спробе падрыву пасажырскага цягніка, далі 23 гады калоніі1
Каментары
Ды нават пацалунак на вуліцы нельга.
Ганьба