Kab viarnuć svaich sałdat z pałonu, Ukraina hatova mianiać ich navat na kałabarantaŭ i pareštki savieckaha raźviedčyka

Jak piša The Wall Street Jornal, pa nieaficyjnych acenkach, u Rasii ciapier znachodzicca kala 8 tysiač ukrainskich vajskoŭcaŭ, a va Ukrainie — kala 5 tysiač rasijan.

Vydańnie padkreślivaje, što, niahledziačy na toje, što Kijeŭ i Maskva pieryjadyčna pravodziać abmien vajennapałonnymi, viartańnie svaich ludziej zastajecca adnoj ź ciažkavyrašalnych prablem dla Ukrainy.

Tysiačy čałaviek usio jašče znachodziacca ŭ «šeraj zonie». Siarod ich i sałdaty, jakija trapili ŭ pałon u pieršyja dni poŭnamaštabnaj vajny. Rasija ciahnie čas i vykarystoŭvaje prablemu dla cisku na prezidenta Ukrainy.

Kijeŭ abvinavačvaje Maskvu ŭ sprobie pasiejać niezadavolenaść siarod svajakoŭ ukrainskich vajennapałonnych. Niekatoryja skardzilisia na zvanki z rasijskich telefonnych numaroŭ z zaklikami arhanizoŭvać vuličnyja pratesty. Rasijskaje telebačańnie taksama tranśluje repartažy, u jakich źniasilenyja ŭkrainskija pałonnyja skardziacca, što ŭrad nie choča ich viartać.

«Rasijanam usio roŭna, ci znachodziacca ich sałdaty ŭ pałonie. U ich niama sacyjalnych chvalavańniaŭ (…) U nas na vulicach pastajanna jość svajaki, jakija vystupajuć, publikujuć infarmacyju i akazvajuć cisk na ŭradavyja ŭstanovy», — cytuje WSJ starejšaha daradcu Zialenskaha Michaiła Padalaka.

Jak piša WSJ, u hetym hodzie było abmieniena bolš za 1000 sałdat z kožnaha boku. U chodzie abmienu, praviedzienaha ŭ kastryčniku pry pasrednictvie Abjadnanych Arabskich Emirataŭ, na radzimu viarnułasia amal 200 ukrainskich i rasijskich sałdat. Ale abmienaŭ niedastatkova, kab spynić rost kolkaści vajennapałonnych z abodvuch bakoŭ.

U 2023 hodzie va Ukrainie adkryłasia try novyja centry ŭtrymańnia vajennapałonnych, a ŭ hetym hodzie byŭ stvorany piaty, tamu što ŭsie astatnija ŭžo byli zapoŭnienyja.

Ukraina publična nie raskryvaje miescaznachodžańnie hetych abjektaŭ. Žurnalisty vydańnia pabyvali ŭ adnym z takich centraŭ i pišuć, što pałonnyja tam pracujuć na vytvorčaści mebli i suvienirnych sumak z nadpisami kštałtu «Ja lublu Lvoŭ». Šmat chto z rasijan znachodziacca tam bolš za hod. Siarod pałonnych dziasiatki paranienych.

Ukraina imkniecca vykarystać raznastajnyja schiemy, kab viarnuć svaich sałdat. Tak, Kijeŭ prapanoŭvaje abmianiać ukraincaŭ, jakija abvinavačvajucca ŭ supracoŭnictvie z Rasijaj, na ŭkrainskich sałdat i cyvilnych asobaŭ, jakija ŭtrymlivajucca ŭ Rasii.

Jak piša WSJ, sotni ŭkraincaŭ, abvinavačanych u supracoŭnictvie, adbyvajuć pakarańnie ŭ śpiecyjalnaj turmie ŭ 20 kiłamietrach ad uschodniaj linii frontu. Kijeŭ śćviardžaje, što dziasiatki ź ich padpisali dakumienty, što zhodnyja na pieradaču ŭ Rasiju, ale pakul što takim čynam byŭ abmienieny tolki adzin čałaviek.

Navat kostki špijona savieckaj epochi, jaki pachavany na zachadzie Ukrainy, vykarystoŭvajucca Kijevam u jakaści raźmiennaj maniety. Maskva nieadnarazova prasiła Ukrainu viarnuć joj pareštki savieckaha raźviedčyka Mikałaja Kuźniacova, jaki ŭ 1942-1943 hadach dziejničaŭ na terytoryi zachodniaj Ukrainy i arhanizavaŭ 11 paśpiachovych zamachaŭ na hitleraŭskich funkcyjanieraŭ.

U 1944 hodzie Kuźniacoŭ zahinuŭ u sutyknieńni z bajcami Ukrainskaj paŭstanckaj armii ŭ Lvoŭskaj vobłaści. Jaho pareštki paśla vajny byli znojdzieny i pachavany ŭ Lvovie. Jašče ŭ 2020 hodzie mer Lvova zajaviŭ, što rašeńnie ab pieradačy pareštkaŭ Kuźniacova pavinna prymacca ŭ ramkach viartańnia z Rasii na radzimu ŭkrainskich vajennapałonnych.

Pa słovach žurnalistaŭ, Rasija ličyć, što Ukraina stavić nierealnyja ŭmovy dla abmienu vajennapałonnymi. Adnak rasijski čynoŭnik, adkazny za kaardynacyju abmienu pałonnymi, nie adkazaŭ na prośbu ab kamientaryi.

• 2
• 1
• 0
• 0
• 1
• 1
• 1
• 0