Viadomy IT-inviestar patłumačyŭ, čamu ŭ Polščy niama svajho EPAM i čym krutyja Mikada i Mielničak
Vienčurny inviestar Ihar Machaniok u novym vypusku tok-šou «Žyćcio-malina» daŭ acenku biełaruskamu IT i patłumačyŭ, chto dasiahaje pośpiechu.
Čamu ŭ Polščy niama Flo i EPAM
Ihar Machaniok raniej vykazvaŭ mierkavańnie ab tym, što Biełaruś moža stać padobnaj da Šviejcaryi, kali znojdzie svaju śpiecyjalizacyju.
Jon tłumačyć, što Šviejcaryja stała viadoma śvietu svajoj śpiecyjalizacyjaj na finansach. U Biełarusi heta mahła stać IT-śfiera.
«Biełaruski tek (tech — tak u anhłamoŭnym śviecie nazyvajuć IT-śfieru. — NN) byŭ značna bolšy, čym luby ŭ susiednich krainach. Polšča bolšaja za Biełaruś, a tek z Polščy byŭ značna mienšy».
Na pohlad mužčyny, heta tłumačycca tym, što ŭ inšych krainach bolš kamfortnyja ŭmovy, jakija dazvalajuć raźvivacca ŭ roznych śfierach. I ludzi mohuć zarablać hrošy ŭ toj halinie, jakaja padabajecca.
«U Polščy ŭ 90-ch ekanomika padymałasia ŭsia razam, pa roznych siektarach. I Jeŭrasajuz dapamahaŭ. (…) U ich razumnyja ludzi mahli znajści sabie pracu za hrošy. (…) A ŭ Biełarusi albo ty biedny zusim, u ciabie niama ničoha, albo ty ŭ tek. (…)
Usie maje znajomyja, majho ŭzrostu, jakija byli razumnyja, jany ŭsie pajšli ŭ tek. Navat tyja, chto chacieŭ być chimikam, fizikam, hieohrafam, historykam, fiłołaham. Usie pajšli ŭ tek».
Jak źbierahčy biełaruskaje ajci
U ciapierašnich umovach, na pohlad Machańka, «treba zrabić usio, kab vytrymać».
«Ja zaraz razumieju, što adziny sposab — heta ludziam, jakim heta cikava, jakim heta važna, budavać biełaruskaje kamjunici tek i IT za miežami Biełarusi. Hurtavać usich biełarusaŭ, kab ludzi mahli i kazali, što jany biełarusy ŭ tek. I pry hetym dzialicca niejkaj ekśpiertyzaj, budavać niejkija instytuty, u sensie kamjunici, miescy, kudy možna patrapić, niejkija kanfierencyi. I potym na bazie hetaha, moža być, adnavić i samu krainu. A pakul dapamahać adno adnamu adnavić brend biełarusaŭ», — ličyć pradprymalnik.
Jak Machaniok razhladzieŭ PandaDoc
Ihar Machaniok pryznajecca, što jaho inviestycyi ŭ startapy prynosiać jamu siamikratny prybytak. Ale byŭ čas, kali jon składaŭ ch10.
Zhadvajučy historyju z padtrymkaj PandaDoc, inviestar raskazvaje, što ŭbačyŭ, jak zasnavalniki startapu pieramahli ŭ niejkim konkursie videa-pitčaŭ. U 2012 hodzie taki padychod da pošuku inviestaraŭ byŭ dastatkova novym.
«Ja pabačyŭ, što jany byli adzinymi biełarusami siarod inšych nacyjanalnaściej. Na toj momant ź Biełarusi byŭ adzin junikorn (startap, jaki dasiahnuŭ acenki ŭ 1 miljard dalaraŭ abo bolš biez vychadu na fondavy rynak. — NN) — EPAM. I naohuł startapaŭ ź biełaruskimi karaniami, asabliva jakija buduć B2B nie było.
Ja baču — o, B2B startap ź biełaruskimi zasnavalnikami, jaki jašče pieramahaje, treba parazmaŭlać. Akazałasia, što ŭ mianie ź imi jość ahulnyja znajomyja. (…)
Što było cikava — mianie ŭraziŭ asabista Mikita [Mikada] i jahony partnior Siarhiej [Barysiuk]. (…) Jany znajšli pradukt, jaki atrymlivajecca pradavać. (…)
Ja baču, što jany majuć čujku, jak dać klijentam pradukt. Dalej ja pabačyŭ, što čałaviek, kamanda, ale asabliva Mikita, umiejuć pitčyć, rabić pradukt, jaho pradavać. Jamu tolki nie chapaje być u pravilnym miescy (jon tady jašče žyŭ u Minsku). Vielmi koratka paśla taho, jak ja jaho prainviestavaŭ, jon užo pierajechaŭ u San-Francyska».
Samoha Mikitu Mikada Machaniok charaktaryzuje jak čałavieka ź nievierahodnaj kolkaściu enierhii: «Jon nikoli nie spyniajecca. Jon pracuje prosta 20 hadzin na dzień, napeŭna. (…) Jon zaŭsiody šukaje, jak siabie paraŭnać z bolš krutymi za jaho, jak vyjści na novy ŭzrovień znajomstvaŭ ludziej, jakija kruciejšyja za jaho. I jon maje vielmi vysokija patrabavańni da tych ludziej, jakich jon najmaje».
Čym kruty Mielničak
IT-inviestar Juryj Mielničak vučyŭsia razam z Machańkom, ale byŭ na kurs starejšy. Budučy zasnavalnik MapsMe paźniej parekamiendavaŭ Machańka na pracu ŭ Google.
«U Jury samaje hałoŭnaje toje, što jon sfakusavany na zonie, jakuju jon vielmi dobra razumieje. (…) I jon bačyŭ, jak svaju ekśpiertyzu maksimalna pravilna dałučać da inšych kampanij, ludziej, praduktaŭ. Jon bačyć ahulnaje pamiž roznymi. Jon vielmi razumny čałaviek i mnie vielmi padabajecca ź im razmaŭlać. (…)
Jon sfakusavany na tym, čym zajmajecca, i pry hetym nie stanovicca zanadta emacyjna pryviazanym da čahości. Voś pradaŭ MapsMe i pajšoŭ dalej, i robić novyja pradukty, jakija jašče bolš paśpiachovyja».
Kamientary