Niamieckaja ekanomika pałamałasia, a «płana B» ni ŭ koha niama

Hihant bolš nie hihant

Inhalštat — horad z nasielnictvam kala 140 tysiač čałaviek — jašče niadaŭna ličyŭsia druhim (paśla Miunchiena) pa zamožnaści ŭ Hiermanii. Mienavita tut zdaŭna mieścicca štab-kvatera aŭtamabilnaha hihanta Audi, čyje padatki štohod prynosili haradskoj kaźnie zvyš 100 miljonaŭ jeŭra. Ciapier hetyja finansavyja patoki pierasychajuć.

U listapadzie 2024 hoda Audi paviedamiła, što za try miesiacy jaje prybytak pamienšaŭ na 91%. Skaračeńnie tysiač pracoŭnych miescaŭ — niepaźbiežnaść.

Prodažy Audi ŭ Kitai, jaki raniej byŭ adnym z asnoŭnych rynkaŭ kampanii, upali na čverć u paraŭnańni ź minułym hodam. Raniej zachodnija aŭtavytvorcy nie ŭsprymali kitajskich kampanij usurjoz, ale ciapier tyja stali mocnymi kankurentami i adbirajuć rynak.

Zapavolvańnie ekanomiki Kitaja i ŭzmacnieńnie miascovaj kankurencyi ŭdaryli pa ŭsioj niamieckaj pramysłovaści. Da hetaha dadalisia vysokija ceny na enierhanośbity, a zaraz nie daj boh jašče i novyja myty z boku ZŠA.

Ekanomika Hiermanii nie raście z 2019 hoda — heta samy praciahły pieryjad stahnacyi z časoŭ Druhoj suśvietnaj vajny. Ekśpierty miarkujuć, što sioleta situacyja nie palepšaje.

«Deindustryjalizacyja ŭ samym razhary», — iranizuje Stefan Volf (Stefan Wolf), prezident łabisckaj hrupy pramysłovych vytvorcaŭ.

Rasparadziŭsia radziej kasić hazony. Bo treba aščadžać

Hiermanija z 83 miljonami žycharoŭ stała treciaj ekanomikaj śvietu dziakujučy vytvorčaści i ekspartu pradukcyi mašynabudavańnia. Śviet kuplaŭ niamieckija aŭtamabili, robataŭ, ciahniki i abstalavańnie. Ciapier popyt źnižajecca, a płana B u Hiermanii niama, — kanstatujuć aŭtary WSJ.

Ciapier, kali duša niamieckaj ekanomiki — aŭtapramysłovaść — u kryzisie, prablemy raspaŭsiudžvajucca na sumiežnyja siektary. U Švajnfurcie rabočyja Schaeffler bastavali suprać skaračeńnia da 700 pracoŭnych miescaŭ.

Inšy pastaŭščyk, ZF Friedrichshafen, skaračaje pracoŭny čas ofisnych rabotnikaŭ na 7% i płanuje zvolnić da 14 tysiač čałaviek va ŭsioj krainie. Prafsajuz IG Metall papiaredžvaje, što ŭ centralnaj Hiermanii taksama mohuć skaracić tysiačy pracoŭnych miescaŭ.

U Inhalštacie mer Chrystyjan Šarpf apantana šukaje lubuju mahčymaść, kab pakryć deficyt. Jon pavysiŭ płatu za muziei, parkoŭki i aŭtobusy i navat zamachnuŭsia na śviatoje dla niemcaŭ — rasparadziŭsia radziej kasić hramadskija hazony. Ciapier mer razhladaje pavyšeńnie padatku na nieruchomaść i dalejšaje skaračeńnie vydatkaŭ.

«My byli sapsavanyja časami, kali da nas jechaŭ biznes dziela Audi. Ciapier usio źmianiłasia», — kaža ŭładalnica hatela Karalina Błok.

Prablemy — sistemnyja

Pavodle danych niamieckaj strachavoj hrupy Allianz, tracina pramysłovych kampanij źnižaje inviestycyi z pryčyny darahoŭli enierhanośbitaŭ. Dźvie traciny pradpryjemstvaŭ znachodziacca ŭ zonie ryzyki pa kankurentazdolnaści.

Hiermanija adstaje ŭ śfierach prahramnaha zabieśpiačeńnia i štučnaha intelektu. Na daśledavańni i raspracoŭki (R&D) — klučavy faktar ekanamičnaha i technałahičnaha raźvićcia — u 2022 hodzie jana vydatkoŭvała tolki 3,1% VUP. U ZŠA hety pakazčyk dasiahaje 3,6%, a ŭ Paŭdniovaj Karei — 5,2%.

Ekśpierty ličać, što Hiermanii nieabchodna 600 miljardaŭ jeŭra za 10 hadoŭ, kab madernizavać adukacyju, darohi i elektrasietki. Taksama patrabujucca značnyja srodki, kab utrymlivać abaronny biudžet chacia b na ŭzroŭni 2% VUP. A Tramp niadaŭna zapatrabavaŭ pavieličeńnia vydatkaŭ na abaronu da 5% VUP. Biez hetaha nie budzie biaśpieki.

Hiermanskija spažyŭcy płaciać adny z samych vysokich padatkaŭ u śviecie. U 2024 hodzie niamiecki rabotnik bieź dziaciej addavaŭ amal 48% zarpłaty na padatki i sacyjalnaje strachavańnie. Niemcy taksama tradycyjna adkładajuć 20% svaich dachodaŭ, što bje pa spažyvańni.

Pavodle Rolfa Biurkla (Rolf Bürkl) ź Niurnbierhskaha instytuta rynkavych rašeńniaŭ, kožny dadatkovy pracent źbieražeńniaŭ pazbaŭlaje ekanomiku popytu na 25 miljardaŭ jeŭra. Častka hetych hrošaj zavisła na bankaŭskich rachunkach, choć ich možna było b inviestavać.

Skaračeńnie sacyjalnych vypłat? Niama advažnych

Doŭhi čas rost prablem zastavaŭsia amal niezaŭvažnym dla vybarščykaŭ. Ale ciapier ekanomika vyjšła na pieršaje miesca siarod palityčnych pytańniaŭ, jakija chvalujuć narod, apiaredziŭšy prablemy mihracyi, biaśpieki i klimatu. A ŭrad kanclera Ołafa Šolca — samy niepapularny z 1949 hoda.

Palityki, adnak, nie hatovyja da niepapularnych reformaŭ. Jany «nie chočuć hladzieć prablemie ŭ tvar. Mnohija pa-raniejšamu dumajuć, što heta časovy zboj i što jaho možna vyrašyć zvykłymi mietadami», — kaža hałoŭny ekanamist strachavoj kampanii Allianz Ludovik Zubran (Ludovic Subran).

Bolšaść palitykaŭ prosta sprabuje padcyravać staruju madel, jakaja hruntavałasia na eksparcie i ciažkaj pramysłovaści. Šolc nastojvaje na novych handlovych pahadnieńniach Jeŭrasajuza. Jahony supiernik Frydrych Mierc choča źnizić padatki i rehulavańnie.

U vybarčaj kampanii amal nie abmiarkoŭvajucca takija niepapularnyja miery, jak skaračeńnie sacyjalnych vypłat dziela finansavańnia inviestycyj. Navat antysistemnyja partyi-vyskački, jakija lubiać atakavać «stary kansensus», nie schilnyja pryncypova mianiać situacyju.

«Kali vy pytajeciesia pra płan B, ja liču, što my pavinny viarnucca da płana A», — kaža Lejf-Eryk Cholm (Leif-Erik Holm), ekanamičny ekśpiert partyi «Alternatyva dla Hiermanii» (AfD).

Cholm ličyć, što treba prosta viarnucca da raniejšaj madeli — z tannymi enierharesursami i mienš strohimi ekałahičnymi normami. Nijakich kardynalnych źmien.

Što budzie ź niamieckaj ekanomikaj pry takim padychodzie — čas pakaža. Ale ekanamisty nie prahnazujuć ničoha dobraha.

• 5
• 0
• 3
• 12
• 7
• 13
• 3
• 0