І ў тыктоку ёсць старонкі, што могуць быць цікавыя аматарам беларускай мовы.
@natatnik (Natatnik Belarus)
«Здымаем таямнічую і прыгожую Беларусь», — пішуць пра сябе аўтары гэтага акаўнта. На іх роліках закінуты дзіцячы лагер, 100-гадовая майстэрня з беларускай вёскі, дыялектны палескі верш і багата іншых цікавых фактаў, якія вы наўрад ці знойдзеце ў кагосьці іншага. А яшчэ падкасты і традыцыйныя рэцэпты, напрыклад, класічны рэцэпт смажанкі.
Найбольш праглядаў (931 тысячу) сабраў ролік з доўгай назвай, якая пачынаецца досыць правакацыйна, — «Чаму беларусы не бульбашы». Ён разбурае стэрэатыпы. У каментарах да відэа багата допісаў ад людзей, якія захапляюцца прыгажосцю беларускай мовы.
@illasiucou (ільля сіўцоў)
Малады тыктокер прысвяціў свой акаўнт беларускай мове і складаным выпадкам у ёй, з якімі можа сутыкнуцца кожны. Напрыклад, ці ведаеце вы, як падабраць у беларускай мове належны адпаведнік папулярнаму рускаму дзеяслову «общаться»? А як яшчэ назваць па-беларуску «бутэрброд»? Ілья адказвае на ўсе гэтыя пытанні.
Яшчэ хлопец выбірае слова дня, і часцей за ўсё гэта нешта, пра што вы наўрад ці чулі раней. Тут можна вывучыць слоўцы накшталт «кадук», «анігадкі», «прышласць» і іншыя — чым не знаходка для тых, хто хоча ўзбагаціць сваё маўленне? Нарэшце, Ілья раскажа і пра эратычную лексіку, навучыць лаяцца, вітацца і жадаць смачна есці па-беларуску — і шмат іншага.
@ellgone (Lizaveta Hancharova)
Утульны акаўнт ад Лізаветы Ганчаровай, маладой ілюстратаркі, якая жыве ў Кракаве. Дзяўчына паказвае на сваёй старонцы прыгажосць, з якой сутыкаецца (як вам Опера Гарнье ў Парыжы?), а таксама шчыра расказвае пра перажыванні эмігранткі і былой зняволенай беларускай турмы.
Лізавета дзеліцца і тым, што яе натхняе, у тым ліку песнямі, вершамі і ілюстрацыямі, зробленымі, відаць, уласнаручна. Не забывае дзяўчына і пра пытанні беларускай мовы — некалькі відэа прысвечаныя якраз ёй.
@alicetsyos (Cioś/Цёсь)
На прасторах тыктоку знайшлося месца і беларускай лацінцы. У сваіх роліках яе прадстаўляе юная тыктокерка Аліса.
Гэты акаўнт вылучаецца яшчэ і сваёй эстэтыкай. Тут вам і падарожжы па Беларусі, і гарадскія пейзажы, і прыгожыя народныя касцюмы (часам у незвычайным асяроддзі). Здаецца, сапраўднае хараство — тое, што нам усім цяпер патрэбна.
@afmarie (mary_afonina)
Вы яшчэ скажыце, што не было..
Ролікі ў акаўнце @afmarie вострыя, без аніякіх шкадаванняў да беларусафобаў. Уласна, дыскрымінацыя беларускай мовы і ёсць адна з тэм, пра якія кажа аўтарка акаўнта.
Маладая блогерка і феміністка здымае ролікі і пра навіны з радзімы накшталт прызнання лозунга «Жыве Беларусь» забароненым, і пра смачную беларускую ежу. Нейкі час дзяўчына пражыла ва Украіне — адгэтуль, магчыма, і ўкраінская мова ў некаторых роліках.
@bjapru
Пазітыўны акаўнт, прысвечаны беларускай мове і розным трапным слоўцам, якія вы маглі не ведаць. Простая і шчырая падача, файны настрой плюс арыгінальны вобраз аўтара — відаць, вось сакрэт, чаму @bjapru мае 520 тысяч падпісантаў.
Папулярныя рубрыкі апошняга часу ў акаўнце — «Слова дня» і «Беларускія мацюкі», але свае паўмільёна падпісантаў @bjapru зарабіў і на іншым кантэнце. Тут ёсць відэа з беларускай лацінкай і ролікі, прысвечаныя простаму студэнцкаму жыццю — карацей, усё як мае быць, калі табе 19 гадоў.
«Наша Нiва» — бастыён беларушчыны
ПАДТРЫМАЦЬЯк перавесці сацсеткі і месенджары на беларускую мову
Дзевяць мабільных праграм, якія павялічаць колькасць беларускамоўнага кантэнту ў вашым жыцці
«Мая маці хоча новую краіну, яна разумее, што дзеля гэтага трэба пачаць з сябе». Дзяўчына расказала, як яе маці прыйшла да беларускай мовы
Стала вядома імя чалавека, якога сілавікі назвалі першым затрыманым па справе «Гаюна»11
Каментары