Абыходзіць санкцыі «кашальку Лукашэнкі» Зайцаву дапамагае стаўбцоўскі ксёндз Лашук — БРЦ
Адзін з «кашалькоў» Аляксандра Лукашэнкі, а з нядаўняга часу і ватыканскі рыцар Аляксандр Зайцаў карыстаецца дзеля абыходу еўрапейскіх санкцый дапамогай свайго знаёмага — каталіцкага святара Ігара Лашука. Гэта сцвярджаецца ў новым расследаванні журналістаў «Беларускага расследавальніцкага цэнтра».
Бізнэсовец Аляксандр Зайцаў вядомы як стваральнік кампаніі Sohra Overseas, саўладальнік кампаніі «Брэміна груп» і футбольных клубаў. «Брэміна груп» была створаная на ўказ Аляксандра Лукашэнкі для набліжаных да яго бізнэсменаў. Праз яе і звязаныя з ёй кампаніі ідзе істотная частка афіцыйнага транзіту праз Беларусь.
Таксама Зайцаў меў дачыненне і да абаронных праектаў, звязаных з кампаніямі ў Беларусі, Латвіі і ва Украіне. Пад санкцыі Еўразвяза ён трапіў у чэрвені 2021 года.
Пра тое, што Зайцаў першым у гісторыі Беларусі атрымаў ватыканскі тытул рыцара Ордэна святога Рыгора Вялікага, стала вядома ў снежні 2022 года. Гэта найвышэйшая адзнака для свецкіх асобаў, якая прызнаецца Папам. Пра падзею не паведамлялася на афіцыйных каталіцкіх парталах, але ўсё ж такі стала вядома, што высвяціў рэгаліі і прыняў прысягу ад новага рыцара арцыбіскуп Мінска-Магілёўскі Юзаф Станеўскі, а ва ўрачыстасцях удзельнічалі ксяндзы Ігар Лашук са Стоўбцаў і Юрый Жагарын з Наваградка.
Ксёндз Лашук адзначыў, што ведае алігарха «шмат гадоў», «ён не толькі асабіста ўзрастаў у веры, але распаўсюджваў і пашыраў веру Касцёла тут, на беларускай зямлі». А арцыбіскуп Станеўскі падкрэсліў, што сам Зайцаў не шукаў гэтай узнагароды, а «ўзнагарода шукала рыцара Аляксандра, рыцарская годнасць шукала яго».
Ініцыятыва «Хрысціянская візія», якая першай паведаміла пра факт уганаравання Зайцава, меркавала тады, што Зайцаў падтрымліваў некаторыя каталіцкія праекты фінансамі, у тым ліку ў пытаннях будаўніцтва. Аднак «Беларускі расследавальніцкі цэнтр» выявіў больш шчыльныя сувязі Зайцава і ксяндза Лашука.
Паводле БРЦ, у верасні 2021 года святар заснаваў кампанію «Аліс ма», на якую падсанкцыйныя ўладальнікі кампаніі «Брэміна груп» перапісалі частку сваёй маёмасці. Прытым, што займацца бізнэсам каталіцкім святарам забараняе нават кананічнае права.
«Наша заданне — служэнне. Святар не можа ўдзельнічаць ні ў палітычных партыях, ні займацца бізнэсам. Гэта немагчыма нават па кананічным праве. Такая заява — вельмі цікавая нават для нас. Таму мы таксама ў гэтым пастараемся разабрацца», — расказаў журналістам Юрый Санько, прэс-сакратар Каталіцкай царквы ў Беларусі.
Сам ксёндз Лашук не стаў тлумачыць, як ён стаў уладальнікам кампаніі, звязанай з «Брэміна груп». Свае сувязі з Зайцавым ён каментаваць адмовіўся.
«Гэта мая асабістая справа, я святар. На некаторыя пытанні я не адказваю нікому, нават Папу, разумееце? Ёсць пытанні, якія толькі перад мной ёсць і Госпадам Богам», — сказаў Ігар Лашук у тэлефоннай размове.
Цікава пры гэтым, што ў красавіку 2022 года ксяндза Лашука судзілі за «распаўсюд экстрэмісцкай інфармацыі» і прызначылі яму штраф памерам у 30 базавых велічынь.
У Маскве падарвалі прарасійскага аўтарытэта з Данбаса, які арганізоўваў цітушак
Каментары
не-а. не разумеем. святарам што - можна ўсё?
Вучылісь ..